Jeremías 12 - Quechua Ayacucho Bible 1987

Tayta Diosman Jeremias willakusqanmanta

¹ Dios Taytalláy, qamqa allin ruraqmi kanki. Qanwan churanakunaypaqqa allin ruraqmi kanki. Chaywanpas qamtam tapukusqayki: ¿Imanasqataq mana allin ruraq runakunaqa allinllapi kawsakunku? ¿Imanasqataq traicionaq runakunaqa hawkalla kawsakunku?

² Plantachkaq hina plantaruptikim sapichakururqaku. Wiñaruspankum ruruchkaq hina rikurirurqaku. Sutikitaqa chaylla-chayllam rimanku. Sonqonkupim ichaqa karunchasqa kachkanku.

³ Dios Taytalláy, ñoqatam ichaqa reqsiwanki. Qawawaspaykim qanman sonqoyoq kasqayta yachanki. Nakanapaq ovejakunata hinayá paykunataqa pusaruy. Nakananku punchawpaqyá paykunataqa sapaqcharuy.

⁴ ¿Haykapikamataq allpaqa chakisqalla kanqa? ¿Haykapikamataq campopi qorakunaqa qawirayanqa? Kay nacionpi *f**yachaqkunapa mana allinkuna rurasqankuraykum animalkunapas chinkarun. Kay nacionpi *f**yachaqkunapa mana allinkuna rurasqankuraykum pawaq animalkunapas chinkarun. Runakunam ninku: Diosqa manam yachanchu imam pasawananchikta, nispanku.

Jeremiasta Dios contestasqanmanta

⁵ Kallpaqkunallata qatichkaspapas anchatam pisipanki. Caballopi kallpaqkunawanqa ¿imaynataq churanakunki? Seguro allpapim qamqa confiakuchkanki. Jordan Mayupa patanpi montekunapiqa ¿imatataq ruranki?

⁶ Hina wawqekikunallam traicionasurqanki. Hina ayllullaykim traicionasurqanki. Qepaykipi qaparisparaqmi insultasurqanki. Amayá paykunapiqa hapipakuychu. Allinllata rimapayasuptikipas amayá confiakuychu.

Runankunarayku Diospa llakikusqanmanta

⁷ Runaykunatam saqeruni. Dueñochakusqaytam qepanchakuruni. Kuyasqay naciontam qoykurqani. Enemigonkunamanmi qoykurqani.

⁸ Dueñochakusqay runakunam montepi leon hinaña rikurirunku. Leon hinaraqmi paykunaqa contraypi qaparinku. Chayraykum paykunaqa cheqnisqayña kachkanku.

⁹ Runaykunaqa cheqchi purayoq animal hinañam rikurirunku. Wakin pawaq animalkunam paykunataqa muyu-muyurispa atacanku. Llapallan monte animalkuna, huñunakamuychik. Convido mikuypaqyá qamkunaqa hamuychik.

¹⁰ Achkallaña michiqkunam uvas huertayta purmarachinku. Enemigoypa jefenkunam chakrayta saruparunku. Ancha kuyasqay allpaytam manaña imayoq kananpaq chunnirachinku. Ancha kuyasqay allpaytam pasaypaqta purmarachinku.

¹¹ Waqanapaqta hinam purmarachinku. Qayllaypim chaynata rurarunku. Enteron nacionmi purmachisqa kachkan. Pipapas manaña yuyarisqanmi kachkan.

¹² Chunniqpi kaq tukuy orqontam ñakarichikuq runakuna hamunqa. Ñoqa Tayta Diospa kachamusqay guerram paykunataqa tukunqa. Naciontam cantonmanta qallarispa huklaw cantonkama tukunqa. Pipas manaña hawkayaypi kananpaqmi chaynataqa tukunqa.

¹³ Kichkallatam cosecharqaku trigota tarpuspankupas. Manam provecharqakuchu pisipanankama llamkaspapas. Cosechasqaykichik chaynalla kasqanraykuyá penqaypi rikuriychik. Ñoqa Tayta Diospa llumpay piñakuyniyraykuyá chayna rikuriychik.

Israel nacionpa vecinonkunapaq Tayta Diospa prometesqanmanta

¹⁴ Tayta Diosmi kaynata nin: —Israel castakunapa mana allin vecinonkunataqa otaq Israel casta runaykunaman qosqay allpan qechuruqkunataqa sapinmanta sachata horqochkaq hinam allpankumanta horqorusaq. Hina chaynallatam Juda castakunatapas paykuna ukumanta horqorusaq.

¹⁵ Ichaqa chaynata horqoruspaypas llakipayarikuspaymi kutichisaq sapakamata nacionninkupi allpaman.

¹⁶ Cheqaptapunipas chay vecinonkum runaykunata yachachirqaku Baal sutiyoq taytacharayku juranankupaq. Chaywanpas kaqllamantam paykunaqa runaykuna ukupi *f**yachanqaku. Runaykuna hinaña kawsayta yachaspankum ñoqa Tayta Diospa sutiypi juraspanku ninqaku: “Kawsaq Diosraykum jurani” nispa.

¹⁷ Mana kasuqniy naciontam ichaqa sapinmanta sachata horqoruchkaq hina pasaypaqta chinkarachisaq. Ñoqa Tayta Diosmi chaynata nini.