Jeremías 11 - Quechua Ayacucho Bible 1987

Diospa contraton mana kasukusqankumanta

¹ Tayta Diosmi ñoqa Jeremiasta rimapayawaspan kaynata niwarqa:

² —Uyariychikyá kay contratopa nisqankunata. Juda nacionpi runakunamanwan Jerusalen llaqtapi *f**yachaqkunamanmi nimunki

³ Israelpa yupaychasqan ñoqa Tayta Diospa kayna nisqayta: “Contratoypa nisqankunata mana kasukuq runaqa ñakasqayá kachun.

⁴ Chay contratoytam kamachirqani abueloykichikkunaman, chaynataqa kamachirqani fierro chulluchina hornomanta horqomuchkaq hina Egipto nacionmanta horqomuspaymi. Chay tiempopim kaynata nirqani: ‘Tukuy nisqaykunata kasukuspaykichikqa chaynataq llapallan kamachisqaykunata ruraspaykichikqa, runaykunam kankichik, ñoqañataqmi Diosnikichik kasaq.

⁵ Chaynata ruraptikichikqa abueloykichikkunaman prometesqaytam cumplisaq. Paykunamanmi prometerqani tukuy imapapas wiñanan kay *f**yachasqaykichik allpata’ nispa. Chaymi ñoqa Jeremiasñataq nirqani: —Chaynayá kachun Dios Taytalláy —nispa.

⁶ Hinaptinmi Tayta Dios niwarqa: —Juda nacionpa llaqtakunapiwan Jerusalen llaqtapa callenkunapiyá kaynata nimuy: “Kay contratoypa nisqankunata uyarispayá ruraychik.

⁷ Abueloykichikkunata Egipto nacionmanta horqomuspaymi chaylla-chaylla kunarqani kasuwanankupaq. Chay tiempomantaraqmi kunankama kunapayarqani kasuwanankupaq.

⁸ Ichaqa mana kasukuspankum mana uyarirqakuchu mana allin rumi sonqonkuman hina kawsaspanku. Chayraykum chay contratopi nisqay castigokunata paykunapa contranpi kachamurqani, chay kamachisqay contratotaqa manamá cumplirqakuchu.”

⁹ Tayta Diosqa niwarqataqmi: —Juda nacionpi *f**yachaqkunapiwan Jerusalen llaqtapi kaqkunam contraypi hoqarikurunku.

¹⁰ Ñawpa abuelonkupa mana allin rurasqankumanmi kutirikunku. Paykunaqa nisqaykunata mana kasukuyta munaspam taytacha-mamachakunataña adorarqaku. Israel nacionpi castakunawan Juda nacionpi castakunam abuelonkuwan contrato rurasqayta yanqacharunku.

¹¹ Chayraykum ñoqa Tayta Dios nini: Paykunatam castigasaq lluptiytapas mana atinankukama. Yanapanaypaq qayakamuwaptinkupas manam paykunataqa uyarisaqchu.

¹² Juda llaqtakunapi runakunawan Jerusalen llaqtapi *f**yachaqkunam qayakunqaku inciensota kañasqanku taytacha-mamachakunataña. Desgracia tiempopiqa chaykunaqa manam salvayta atinqachu.

¹³ Juda nacionpi *f**yachaqkuna, achkallaña llaqtaykichik kasqanman hinam achkallañataq kachkan taytacha-mamachaykikunapas. Jerusalen llaqtapi kaqkuna, achkallaña callekichikpas kasqanman hinataqmi achkallatañataq altarkunatapas hatarichirqankichik chaynapi Baal sutiyoq taytachaman inciensota kañanaykichikpaq.

¹⁴ Chaynaqa Jeremias, amañayá kay runakunapa favorninpiqa mañakuwayñachu nitaq qaparispapas ruegakuwayñachu. Desgraciapi kaspanku mañakuwaptinkuqa manañam uyarisaqchu.

¹⁵ Juda nacionpi kuyasqay runakuna, tukuy mana allinta ruraruchkaspaqa ¿imatataq temploypiqa rurankichik? ¿Sapaqchapuwasqaykichik aychata ofrecespachu castigoyta qamkunamanta chinkachinkichik? ¿Mana allinkunapi kachkaspachu anchata kusikunkichik?

¹⁶ Ñoqa Tayta Diosmi suticharqaykichik sumaq rapisapa aceitunas sachawan. Ñoqa Tayta Diosmi suticharqaykichik sumaq ruruyoq aceitunas sachawan. Kunanmi ichaqa qaparillawanña hamuq wayra-parawan rapikikunata kañarusaq. Kunanmi ichaqa qaparillawanña hamuq wayra-parawan kallmaykikunatapas pakiparusaq.

¹⁷ Llapallan Kamachiq ñoqa Tayta Diosmi sacha plantachkaq hina qamkunata plantarqaykichik. Israel nacionpi chaynataq Juda nacionpi *f**yachaqkuna, contraykichikpim castigokunata kachamusaq mana allinkunata rurasqaykichikrayku. Qamkunam rabiachiwarqankichik Baal sutiyoq taytachaman inciensota kañapuspaykichik.

Enemigonkuna Jeremiasta wañuchiypi risqankumanta

¹⁸ Tayta Diosmi willawarqa enemigoykunapa mana allinkuna rimanakusqankumanta. Paymi qawachiwarqa cuentata qokunaypaq.

¹⁹ Nakanankupaq pusasqanku manso carnero hinam ñoqaqa kachkarqani. Manam yacharqanichu contraypi kayna rimanakusqankutaqa: —Ruruchkaq sachata kuchuchkaq hinayá paytaqa wañurachisunchik. Kay pachapi kaqkunamantayá qarqorusunchik. Paymantaqa manaña pipas yuyarinankupaqyá chinkarachisunchik —nispa.

²⁰ Llapallan kamachiq Dios Taytalláy, allin arreglaq juezmi qamqa kanki. Runakunapa tukuy piensasqankunata chaynataq sonqon pruebaqmi qamqa kanki. Paykuna vengakusqaykitayá qawachiway. Qanmanmi asuntoytaqa willakamurqayki.

^21-22 Wañuchiwayta munaq runakunamantam otaq: “Tayta Diospa sutinpi manaña willakuptikiqa manam wañuchisqaykikuchu” nispa niwaqniykunamantam Llapallan Kamachiq Tayta Dios kaynata nin: —Ñoqam paykunata castigasaq. Mozokunam guerrapi wañunqaku. Churinkunam yarqaymanta wañunqaku.

²³ Manam paykunamantaqa chullapas puchunqachu. Anatot llaqtapi runakunamanmi kachamusaq desgraciata castiganay watapi —nispa.