Jeremías 10 - Quechua Ayacucho Bible 1987

Cheqap Diosllata adoraymanta

¹ Israel castakuna, uyariychik Tayta Diospa nisusqaykichikta.

² Tayta Diosmi kaynata nin: Mana reqsiwaqniy nacionkunapa kawsasqanman hinaqa amayá kawsaychikchu. Cielokunapi señalkuna kaptinpas amayá mancharikuychikchu. Chaykunawan mancharikuq nacionkuna hinaqa amayá mancharikuychikchu.

³ Chay nacionpi runakunaqa mana imapaq valeqmi kanku. Montepi sachata kuchuramuspam kullunta aparamunku. Chayta aparamuspam llaqllarunku azuelawan.

⁴ Chaymantam adornanku qori-qollqewan. Mana kuyutyananpaqmi hapichinku. Clavokunawan takaspam hapichinku.

⁵ Chakrapi manchachiku hinam sayarayachkanku. Mana rimaq, mana puriq kasqanraykum kayman-chayman apaykachanku. Chaykunataqa amayá manchakuychikchu. Manam pipapas allinninpiqa ruranmanchu. Manam pipapas mana allinninpiqa ruranmanchu.

⁶ Dios Taytalláy, manam pipas kanchu qam hinaqa. Ancha hatunmi kanki qamqa, “Hatun Atiyniyoqwan” sutichasqam kanki qamqa.

⁷ Nacionkunapa Reynin Diosnilláy, qamqa lliwpa respetananmi kanki. Qamqa anchallaña respetanam kanki. Qanmanqa manam tupachikunmanchu nacionkunapi yachayniyoqkunapas. Qanmanqa manam tupachikunmanchu gobiernonkupi lliw gobiernaqkunapas.

⁸ Paykunaqa mana yachayniyoqmi kachkanku. Kullukunapa yachachisqallanmi kachkanku.

⁹ Taytachankuqa Tarsis lawmanta llaspayachisqa qollqellamantam. Taytachankuqa Ufaz lawmanta apamusqa fino qorillamantam. Chaykunaqa taytacha ruraqkunapa rurasqallanmi. Chaykunaqa metal chulluchiqkunapa rurasqallanmi. Morado telawan pachachisqam kachkanku. Grosella telawan ustuykachisqam kachkanku. Maestrokunapa rurasqallanmi lliwpas kachkanku.

¹⁰ Tayta Diosllam cheqap Diosqa. Kawsaq Diosmi payqa. Wiñaypaq reymi payqa. Allpapas katkatatanmi pay piñakuptinqa. Nacionkunapas manam aguantanmanchu rabiakuptinqa.

¹¹ Israel castakuna, mana reqsiwaqniy nacionpi runakunatam kaynata ninkichik: “Kay pachatawan cielokunata mana ruraq dioskunaqa kay pachamantam chinkanqaku, manam mayqanninpas kay pachapiqa puchunqakuchu” nispa.

Tayta Diosta alabanapaq taki

¹² Tayta Diosmi kay pachata rurarqa atiyninwan. Tukuy kay pachapi kaqtam takyachirqa yachayninwan. Cielokunatapas mastarirqam ancha entiendeyninwan.

¹³ Rimariptinmi cielopi yakukuna sinchillataña qaparimun. Kay pachapa patankunamantam puyukunata hatarichimun. Paymi paramunanpaqpas llipyachimun. Waqaychasqanmantam wayratapas horqomun.

¹⁴ Llapallan runakunam asno hinaña rikurirun. Llapallan runakunam mana yachayniyoqña rikurirun. Taytacha-mamacha ruraqkunam penqarikunku. Metal chulluchisqanmantam penqarikunku. Fundisqa taytachakunaqa engañollam rikurirun. Mana espirituyoq kaspam engañolla rikurirun.

¹⁵ Mana imapaq valeqmi chay taytachakunaqa. Asikuypaq hinam chay taytachakunaqa. Pasaypaq chinkachisqam kanqaku. Castigo punchawpim chinkanqaku.

¹⁶ Manam chaynachu Jacobpa Diosninqa. Tukuy imapas unanchaqmi payqa. Runankunapaqmi Israel aylluta akllakurqa. Llapallan Kamachiq Tayta Dioswan sutichasqam payqa.

Juda nacionpa contranpi Jeremiaspa willakusqanmanta.

¹⁷ Enemigopa muyurusqan runakuna, uyariwaychik. Qamkunaqa tukuy kapuqnikichiktayá huñuychik.

¹⁸ Tayta Diosmi kaynata nin: Kunanmi kay nacionpi *f**yachaqkunata qarqorusaq. Warakachkaq hinam paykunataqa qarqorusaq. Castigota tarinankupaqmi paykunataqa ñakarichisaq.

¹⁹ ¡Imaynaraq kasaq kay ñakarisqaywan! ¡Imaynaraq kasaq kay llumpay nanaq heridaywan! Piensarqanim: Onqochkanim ñoqaqa, nispa. Piensarqanim: Aguantasaqmi kay nanayniytaqa, nispa.

²⁰ Karpaykunatam lliw saqmaparunku. Waskaykunatam lliw tipiparunku. Churiykunam saqeruwaspa chinkarunku. Manañam pipas karpay sayachiq kanchu. Manañam pipas telay chutariq kanchu.

²¹ Kamachikuqkunapas mana allin michiqkuna hinam asnoyarunku. Tayta Diosta mana maskasqankuraykum wichirunku. Ovejakuna hinam runankunapas lliw cheqerunku.

²² Sumaqta uyariychik. Noticiam hamuchkan. Norte law nacionmantam qapariypaq-qaparimuchkan Juda nacionpi llaqtakunata tuñichinanpaq, atoqkunapa *f**yachananmanña tikrarunaypaq.

²³ Dios Taytalláy, yachanim runaqa mana kikillanmanta kawsasqanta. Yachanim runaqa mana kikillanmanta purisqanta.

²⁴ Dios Taytalláy, allin arregloykiman hinayá corregiykullaway. Dios Taytalláy, amayá piñakuynikiman hinachu corregiykullaway. Ama puchukarachiwanaykipaqyá corregiykullaway.

²⁵ Mana reqsisuqniki nacionkunatayá piñakuspa castigay. Mana mañakusuqniki runakunatayá piñakuspa castigay. Jacob castakunatam paykunaqa chinkarachirqaku. Chinkarachispam pasaypaqta tukururqaku. Wasillankutapas pasaypaqtam purmarachirqaku.