Jeremías 1 - Quechua Ayacucho Bible 1987

Jeremiasta Tayta Dios sapaqchasqanmanta

¹ Kaykunam Jeremiaspa rimasqankuna. Paymi karqa sacerdotekunapa castanmanta kaq Hilciaspa churin. Chay sacerdotekunam *f**yacharqaku Benjamin castapa allpan Anatot llaqtapi.

² Tayta Diosmi Jeremiasta rimapayarqa Amonpa churin Rey Josias chunka kimsayoq watamanña Juda nacionpi gobiernachkaptin.

³ Rimapayarqataqmi Juda nacionpa reynin Joacimpa tiemponpipas chaynataq Juda nacionpa reynin Sedequiaspa tiemponpipas. Chay reykunaqa karqa Rey Josiaspa churinmi. Rimapayarqaqariki Rey Sedequiaspa chunka hukniyoq wata gobiernasqankamam otaq chay watapa pichqa kaq killankamam. Chay killapim Jerusalen llaqtapi *f**yachaqkunata huklaw nacionman presochasqata pusarqaku.

⁴ Tayta Diosmi rimapayawaspan niwarqa:

⁵ Mamaykipa wiksanpi manaraqpas unanchachkaspaymi reqsirqaykiña. Manaraqpas nacechkaptikim qamtaqa sapaqchakurqaykiña. Nacionkunamanmi ñoqamanta willakunaykipaq churarqaykiña.

⁶ Ñoqam payta nirqani: ¡Ay Señor Diosnilláy, ancha warmaraqmi kallani! Manaraq rimaypas yachaqmi kallani.

⁷ Ichaqa Tayta Diosmi niwarqa: Ama rimaychu ancha warmaraq kasqaykimantaqa. Qamqa rinkim maymanpas kachaptiyqa. Rimamunkitaqmi ñoqapa kamachisqaytaqa.

⁸ Amam manchakunkichu pitapas. Qanwanmi kachkani libranaypaqpas. Ñoqa Tayta Diosmi chaynata nini.

⁹ Tayta Dios makinta haywariykamuspanmi simiyta llachpaykuwaspan niwarqa: Kunanmi palabraykunata simikiman churani.

¹⁰ Kunanmantam nacionkunapi churayki. Reykunapa gobiernasqanpim churayki. Rachusqa, tuñichisqa kanankupaqmi churayki. Chinkachisqa, taqmasqa kanankupaqmi churayki. Hatarichisqa, plantasqa kanankupaqmi churayki.

¹¹ Tayta Diosmi tapuwarqa: Jeremias ¿imatataq qawachkanki? —nispa. Chaymi ñoqañataq nirqani: Almendras sachapa kallmantam —nispa.

¹² Tayta Diosmi niwarqa: Allintam rikurunki, cheqaptapunipas nisqaykunata cumplinaypaqmi chaylla kachkani —nispa.

¹³ Yapamantam Tayta Dios tapuwarqa: ¿Imatataq qawachkanki? —nispa. Chaymi ñoqañataq nirqani: Timpuchkaq mankatam, norte lawmanta taqtakuykuchkaqña mankatam —nispa.

¹⁴ Tayta Diosmi niwarqa: Kay nacionpi llapallan yachaqkunata ñakarichiqmi hamunqa. Norte lawmantam paykunaman taqtakaykamunqa.

¹⁵ Ñoqa Tayta Diosmi nini: Nacionkunatam qayamusaq, norte lawpi reykunapa gobiernasqantam qayamusaq. Reyninkunam hamunqaku. Jerusalenpa zaguanninkunapim churanqaku. Gobiernanankupaqmi tiyanankuta churanqaku. Llapallan murallapa muyuriqninpim churanqaku. Juda nacionpa contranpim churanqaku. Llapallan llaqtakunapa contranpim churanqaku.

¹⁶ Chaynatam ñoqa sentenciani. Mana allin rurasqankuraykum sentenciani. Saqeruwasqankuraykum sentenciani. Sentencianiqa sapaq dioskunapaqña inciensotapas kañapusqankuraykum chaynataq kikinkupa rurasqankumanña qonqorakusqankuraykum.

¹⁷ Kallpatayá qamqa hapiy. Paykunamanyá kunan riy. Nimuyá lliw kamachisqaykunata. Amam manchakunkichu paykunata. Manchakuptikiqa ñoqam katkatatachisqayki. Paykunapa qayllanpim katkatatachisqayki.

¹⁸ Murallasqa llaqtata hinam churayki. Fierromanta pilarta hinam churayki. Broncemanta murallata hinam churayki Juda nacionpi runakunapa contranpi, Juda nacionpi reykunapa contranpi chaynataq kamachiqninkupa contranpipas chaynataq sacerdotenkunapa contranpipas, llapallan chaypi *f**yachaqkunapa contranpipas.

¹⁹ Qampa contraykipi peleaspankuqa manam vencesunkichu paykunaqa. Qanwan kasqayraykum librasqayki. Ñoqa Tayta Diosmi chaynata niki.