Hebreos 3 - Quechua Ayacucho Bible 1987

Moisesmantapas Jesusqa aswan munayniyoq kasqanmanta

¹ Waqe-panillaykuna, qamkunaqa kachkankichik Diospaq rakisqam chaynataq hanaq pachapi huñunasqa kanaykichikpaq qayasqam chaynaqa Diospa kachamusqan *f**sacerdotekunapa jefen chaskisqanchik Jesucristopiyá yuyaymanaychik.

² Payqa confianza runam karqa churaqnin Diospa kamachisqanta cumplispa, payqa cumplirqa Moisespas Diospa enteron wasinpi rurasqanta hinam.

³ Wasimantaqa ruraqninmi aswan reqsisqa, chaynam Jesuspas Moisesmantaqa aswan reqsisqa.

⁴ Wasiqa runapa rurasqallanmi, Diosmi ichaqa tukuy imata rurarqa.

⁵ Diospa wasinpim Moisesqa confianza runa karqa, chaywanpas payqa servikuqllam karqa imapas Diospa nisqankunamanta willakunanpaq.

⁶ Cristom ichaqa Churi kasqanrayku Diospa wasinpi munayniyoq karqa, chay wasi hinam ñoqanchikpas kanchik paypi hatun confianzawan kallpanchakuspaqa.

Runankunataqa Diospuni samachisqanmanta

⁷ Chuya Espiritum nin: Kunan tiempopi Diospa nisqanta uyarichkaspaqa,

⁸ amayá sonqoykichikta rumiyachiychikchu piñachiwasqanku punchawpi hinaqa, chunniqpi pruebawaspanku rurasqankuta hinaqa.

⁹ Chay chunniqpim ñawpa abueloykichikkuna rurasqaykunata rikurqaku. Tawa chunka watapuni chaykunata rikuchkaspankupas piñachiwaspankum pruebawarqaku.

¹⁰ Chayraykum chay runakunawan piñasqa karqani, chayraykum paykunata kaynata nirqani: “Tukuy tiempo pantaq sonqokunam kankichik” nispa. “Ñanniykunatapas mana reqsiqmi kankichik” nispa.

¹¹ Chayraykum piñakuyniypi jurarqani: “Samanankupaq qosqaymanmi mana yaykunqakuchu” nispa.

¹² Wawqe-panillaykuna, cuidakuychikyá, yanqañataq mayqannikichikpas mana iñiq kaspa hinaspa, mana allin sonqoyoq kaspa kawsaq Diosmanta rakikurunman.

¹³ Tiempo kachkaptinraqqa sapa punchawyá kallpanchakuychik chaynapi mayqannikichiktapas hucha engañaptin sonqoykichik ama rumiyarunanpaq.

¹⁴ Cristoman hukllawasqañam kachkankichik paypi iñisqanchik punchawpi hina mana iskayrayaspa wañunaykichikkama confiakuspaqa.

¹⁵ Bibliam nin: Kunan tiempopi Diospa nisqanta uyarispaykichikqa, amayá sonqoykichikta rumiyachiychikchu piñachiwasqanku punchawpi hinaqa.

¹⁶ Diospa rimasqanta uyarichkaspankuqa ¿pikunataq payta piñachirqaku? Moisespa pusamusqan llapallan runakunam.

¹⁷ ¿Pikunapaqtaq Diosqa tawa chunka watapuni piñakururqa? Payqa piñakururqa contranpi huchallikuq chunniqpi wañuqkunapaqmi.

¹⁸ ¿Pikunamantaq jurarqa samanankupaq qosqanman mana yaykunankupaq? Payqa jurarqa mana kasuqninkunapa contranpim.

¹⁹ Chaynaqa, mana confiakusqankuraykumá mana yaykuyta atirqakuchu.