Génesis 9 - Quechua Ayacucho Bible 1987

Noeywan Dios contrato rurasqanmanta

¹ Diosmi Noeyta hinaspa churinkunata bendecispan nirqa: —Achka wawa-churiyoqyá kaychik, kay pachatayá huntachiychik.

² Qamkunatam katkatataspa manchakusunkichik purun animalkuna, alton pawaqkuna, allpapi llapallan qasqonpa puriqkuna chaynataq lamar qochapi challwakunapas. Chaykunapimá munaychakunkichik.

³ Chaykunatam llapallanta qamkunaman qoykichik mikunaykichikpaq, verdura plantakunatapas qosqayta hinam qoykichik.

⁴ Ichaqa amam mikunkichikchu kawsachiqnin yawarniyoq aychataqa.

⁵ Cheqaptapunim qamkuna wañuchiq animaltaqa wañuchisaq, wañuchisaqtaqmi runamasin wañuchiq runatapas.

⁶ Pipas runamasin wañuchiqtaqa paytapas runamasintaqmi wañuchinqa. Runaqa Diosman rikchakuqmi rurasqa karqa.

⁷ Qamkunaqa achka wawa-churiyoqyá kaychik, kay pachamanyá huntaychik, kay pachapiyá miraychik.

⁸ Diosmá Noeytawan churinkunata nirqa:

⁹ —Kunanmi contratoyta rurani qamkunawan hinaspa qepaykichik hamuq miraynikichikwan,

¹⁰ ruranitaqmi buquemanta qamkunawan lloqsimuq kay llapallan kawsaq animalkunawanpas, alton pawaq animalkunawanpas, uywa animalkunawanpas, purun animalkunawanpas chaynataq kay pachapi llapallan animalkunawanpas.

¹¹ Contratoytam rurani qamkunawan, manañam sinchi parawanqa wañuchisaqñachu llapallan kawsaqkunataqa, manañamá kanqachu sinchi paraqa kay pachata puchukachinanpaq.

¹² Qamkunawanpas chaynataq llapallan qamkunawan kaq kawsaqkunawanpas wiñaypaq contrato rurasqaypa señalninmi kayna kanqa:

¹³ Chirapaytam churani puyupi, chay chirapam kay pachapi kawsaqkunawan contratoypa señalnin kanqa.

¹⁴ Chaymi kay pachapa hawanman puyuchimuptiy chirapa puyukunapi rikurinqa.

¹⁵ Hinaptinmi qamkunawan chaynataq llapallan animalkunawan contrato rurasqayta mana qonqasaqchu, manañam kanqachu sinchi paraqa chaynapi llapallan kawsaqkunaqa yakuwan manaña puchukananpaq.

¹⁶ Puyupi chirapa rikurimuptinmi chayta qawaspay yuyarisaq llapallan kawsaqkunawan hinaspa kay pachapi animalkunawan wiñaypaq contrato rurasqayta —nispa.

¹⁷ Diosmá nirqa Noeyta: —Chay chirapam llapallan kay pachapi kawsaqkunawan contratoypa señalnin —nispa.

Noeymantawan churinkunamanta

¹⁸ Buquemanta lloqsiq Noeypa churinkunam karqa: Sem, Cam hinaspa Jafet, Canaanpa taytanmi Cam.

¹⁹ Noeypamá kimsa churinkuna karqa, paykunapa mirayninwantaqmi kay pacha huntasqa karqa.

²⁰ Chaymantam Noey chakrapi llamkayta qallarirqa hinaspam uvas huertata rurarqa.

²¹ Chaymi vinota tomaruspan sinkarurqa hinaspam qalalla kachkarqa karpanpi.

²² Hinaptinmi Canaampa taytan Cam rikururqa taytanqa qalalla kasqanta chaymi hawapi iskaynin wawqenkunaman willarqa.

²³ Chaymi Sem wawqen Jafetwan pachata aparikuspanku hombronkupa hawanman churaykuspa asuykurqaku qepanpalla hinaspankum taytankuta tapaykurqaku. Chaynapim taytankupa qalalla kaynintaqa mana rikurqakuchu.

²⁴ Sinkaruspa puñurusqanmanta Noey rikchariruspam sullka kaq churinpa rurasqanta yacharurqa.

²⁵ Chaymi nirqa: ¡Canaanqa ñakasqayá kachun! ¡Ayllunkunapa sirvientenmantapas aswan humillasqaraqyá kachun!

²⁶ Noeyqa nirqataqmi: Sempa yupaychasqan Tayta Diosqa alabasqayá kachun, Canaanñataqyá paypa sirvienten kachun.

²⁷ Jafettayá Dios hatunyachichun, Sempa karpankunapiyá *f**yachachun, Canaanñataqyá paypa sirvienten kachun.

²⁸ Sinchi para pasasqanmantam Noey kawsarqa kimsa pachak pichqa chunkan watataraq.

²⁹ Chaynaqa Noeymi isqon pachak pichqa chunkan watata kawsaruspan wañukurqa.