Génesis 7 - Quechua Ayacucho Bible 1987

Sinchi parawan castigomanta

¹ Chaymantam Noeyta Tayta Dios nirqa: —Qamqa wasikipi lliw kaqkunapiwanyá yaykuy buqueman, runakunapa qayllanpim qamllata qawayki allin ruraqta.

² Ofrecewanaykipaq hina llapan animalkunamantam yaykuchinki qanchis pares orqontin-chinantin animalkunata. Ñoqaman mana ofrecena animalkunamantañataqmi yaykuchinki huk paresta orqontin-chinantinta.

³ Alton pawaqkunamantapas orqontin-chinantintam yaykuchinki qanchis parestakama chaynapi kawsaspanku kay pachapi miranankupaq.

⁴ Qanchis punchawmantam parachimusaq kay pachapa hawanman tawa chunka punchaw tawa chunka tutan, llapallan kawsaqkuna rurasqaytam puchukachisaq —nispa.

⁵ Chaymi Tayta Diospa tukuy kamachisqanta hina Noey rurarqa.

⁶ Kay pachaman sinchi para chayamuptinmi Noey karqa soqta pachak watayoq.

⁷ Chay sinchi para chayaykamuptinmi Noey warmintin buqueman yaykurqa chaynataq churinkunapas warmintinkama.

⁸ Tayta Diosman ofrecenapaq hina animalkunam Noeypa kasqan buqueman yaykurqa, yaykurqataqmi mana ofrecenapaq hina animalkunapas, alton pawaqkunapas chaynataq allpapi qasqonpa puriqkunapas,

⁹ orqontin-chinantinmi yaykurqa pares-pareskama Noeyman Diospa kamachisqanpi hina.

¹⁰ Chaymi qanchis punchawmanta sinchi para kay pachaman chayamurqa.

¹¹ Noey soqta pachak watayoq kachkaptinmi iskay kaq killapi, chunka qanchisniyoq punchawpipuni lamar qochapa ukunmanta llapallan yakukuna toqyaramurqa, taqtakaykamurqataqmi cielokunapi llapa yakukunapas.

¹² Pararamurqamá kay pachapa hawanman tawa chunka punchaw tawa chunka tutan.

¹³ Chay punchawpipunim Noey warmintin buqueman yaykurqa, yaykurqataqmi churin Sempas, Campas hinaspa Jafetpas warmintinkama.

¹⁴ Paykunawan kuskamá yaykurqa castapura purunpi animalkunapas, uywa animalkunapas, allpapi qasqonpa puriqkunapas, alton pawaqkunapas hinaspa tukuy raprayoqkunapas.

¹⁵ Llapallan kawsaq animalkunam paresnintinkama yaykurqaku Noeypa kasqan buqueman.

¹⁶ Chay yaykuqkunam karqa orqontin-chinantin tukuy rikchaq animalkuna. Diospa kamachisqanman hinam yaykurqaku, Noey yaykuruptinñataqmi Tayta Dios wichqarurqa punkuta.

¹⁷ Chaymi tawa chunka punchaw kay pachaman sinchi para chayamurqa, yakukuna miraruspan buquetapas wampurachisqanraykum pampamanta hoqarikururqa.

¹⁸ Yakukuna aswan-aswan kay pachaman huntaruptinmi buquepas yakukunapa hawanpi muyurqa.

¹⁹ Yakukunam kay pachaman huntarurqa llumpa-llumpayta kay pachapi kaq alto orqokunatapas tapaykunankama.

²⁰ Orqokunata taparuspanpas qanchis metro mas altotaraqmi yakukunaqa hoqarikururqa.

²¹ Chaymi kay pachapi tukuy rikchaq qasqonpa puriq animalkuna wañururqa, wañurqataqmi alton pawaq animalkunapas, uywa animalkunapas, purunpi kaq animalkunapas, llapallan uruchakunapas chaynataq lliw runakunapas.

²² Samatyaspa kawsaq allpapi llapallan kaqkunapas wañururqam.

²³ Chaynapim kay pachapi llapallan kawsaqkuna puchukarurqa. Runakunamanta qallaykuspam puchukarachirqa uywa animalkunatapas, qasqonpa puriqkunatapas chaynataq alton pawaqkunatapas. Hinaptinmi buquepiqa Noeyllaña quedarurqa paywan kaqkunapiwan.

²⁴ Yakum qocharayakurqa kay pachapi pachak pichqa chunkan punchaw.