Génesis 5 - Quechua Ayacucho Bible 1987

Adanpa mirayninkunamanta

¹ Kay listasqa sutikunam Adanpa mirayninkuna. Adanta chay punchaw Dios unanchaspanmi rurarqa kikinman rikchakuqta.

² Qaritawan warmitam unancharqa hinaspam unanchasqa kasqanku punchawpi bendecispan suticharqa Adanwan.

³ Adan pachak kimsa chunkan watayoq kachkaptinmi huknin qari churin nacemurqa, paytam suticharqa Setwan.

⁴ Paymi karqa Adan kaqlla rikchayniyoq, churin Set nacesqanmantam Adanqa kawsarqa pusaq pachak watataraq. Chay watakunapim karqaraq qarikunapas warmikunapas wakin churinkuna.

⁵ Chaynaqa Adanmi isqon pachak kimsa chunkan watata kawsaruspan wañukurqa.

⁶ Set pachak pichqan watayoq kachkaptinmi churin Enos nacerqa.

⁷ Enospa nacesqanmantam Setqa kawsarqa pusaq pachak qanchisnin watataraq. Chay watakunapim karqaraq qarikunapas warmikunapas wakin churinkuna.

⁸ Chaynaqa Setmi isqon pachak chunka iskayniyoq watata kawsaruspan wañukurqa.

⁹ Enos isqon chunka watayoq kachkaptinmi churin Cainan nacerqa.

¹⁰ Churin Cainanpa nacesqanmantam Enosqa kawsarqa pusaq pachak chunka pichqan watataraq. Chay watakunapim karqaraq qarikunapas warmikunapas wakin churinkuna.

¹¹ Chaynaqa Enosmi isqon pachak pichqan watata kawsaruspan wañukurqa.

¹² Cainan qanchis chunka watayoq kachkaptinmi churin Mahalaleel nacerqa.

¹³ Churin Mahalaleel nacesqanmantam Cainanqa kawsarqa pusaq pachak tawa chunkan watataraq. Chay watakunapim karqaraq qarikunapas warmikunapas wakin churinkuna.

¹⁴ Chaynaqa Cainanmi isqon pachak chunkan watata kawsaruspan wañukurqa.

¹⁵ Mahalaleel soqta chunka pichqan watayoq kachkaptinmi churin Jared nacerqa.

¹⁶ Churin Jaredpa nacesqanmantam Mahalaleelqa kawsarqa pusaq pachak kimsa chunkan watataraq. Chay watakunapim karqaraq qarikunapas warmikunapas wakin churinkuna.

¹⁷ Chaynaqa Mahalaleelmi pusaq pachak isqon chunkan pichqayoq watata kawsaruspan wañukurqa.

¹⁸ Jared pachak soqta chunkan iskaynin watayoq kachkaptinmi churin Enoc nacerqa.

¹⁹ Churin Enocpa nacesqanmantam Jaredqa kawsarqa pusaq pachak watataraq. Chay watakunapim karqaraq qarikunapas warmikunapas wakin churinkuna.

²⁰ Chaynaqa Jaredmi isqon pachak soqta chunkan iskaynin watata kawsaruspan wañukurqa.

²¹ Enoc soqta chunka pichqan watayoq kachkaptinmi churin Matusalen nacerqa.

²² Churin Matusalenpa nacesqanmantam kawsarqa kimsa pachak watataraq Diospa agradonpaq kawsaspan. Chay watakunapim karqaraq qarikunapas warmikunapas wakin churinkuna.

²³ Chaynaqa Enocmi kawsarqa kimsa pachak soqta chunkan pichqayoq watata.

²⁴ Diospa agradonpaq kawsasqanraykum Dios pusakuptin chinkarurqa.

²⁵ Matusalen pachak pusaq chunkan qanchisnin watayoq kachkaptinmi churin Lamec nacerqa.

²⁶ Churin Lamec nacesqanmantam kawsarqa qanchis pachak pusaq chunkan iskaynin watataraq. Chay watakunapim karqaraq qarikunapas warmikunapas wakin churinkuna.

²⁷ Matusalenmi isqon pachak soqta chunkan isqonnin watata kawsaruspan wañukurqa.

²⁸ Lamec pachak pusaq chunkan iskaynin watayoq kachkaptinmi churin nacerqa.

²⁹ Paytam Noeywan suticharqa kaynata piensaspa: —Paymi llamkayninchikkunamantawan sasachakuyninchikkunamanta consuelawasun allpataqa Tayta Dios ñakasqanrayku —nispa.

³⁰ Churin Noey nacesqanmantam Lamec kawsarqa pichqa pachak isqon chunkan pichqayoq watataraq. Chay watakunapim karqaraq qarikunapas warmikunapas wakin churinkuna.

³¹ Chaynaqa Lamecmi qanchis pachak qanchis chunkan qanchisniyoq watata kawsaruspan wañukurqa.

³² Noey pichqa pachak watayoq kachkaptinmi churinkuna nacerqa. Paykunapa sutinmi karqa Sem, Cam hinaspa Jafet.