Génesis 49 - Quechua Ayacucho Bible 1987

Wañukunallanpaqña churinkunapa imaynam kananmanta Jacobpa rimarisqan

¹ Jacobmi churinkunata qayaykuspan nirqa: —Huñunakamuychik hinaptin willasqaykichik qepa punchawkunapi imam pasasunaykichikmanta.

² Jacobpa churinkuna, huñunakuspayá uyariychik. Israelpa churinkuna, kay taytaykichiktayá uyariychik.

³ Ruben, qamqa piwi churiymi kanki. Qamqa atiyniy hinam kanki. Kallpaypa qallariyninmi kanki. Sinchi honrasqam kanki qamqa. sinchi atiyniyoqmi kanki qamqa.

⁴ Lloqlla hina mana harkay atinam kanki. chayraykum mana piwi churiy hinañachu kanki. Chaynaqa kanki ñoqa taytaykipa compañeraywan puñusqaykimantam. Chaynaqa kanki casado vidayta qanrachasqaykimantam.

⁵ Simeonwan Leviyqa wawqentinmi kanku. Armankuwanmi mana amachay atina kanku.

⁶ Tanteanakusqankumanqa manam yaykuymanchu. Rimanakuptinkuqa manam hukllawakuymanchu. Paykunaqa piñakuyninpim runata wañuchirqaku. Paykunaqa caprichakuspam toropa ankunta kuchurqaku.

⁷ Ñakasqayá kachunku piñakuynin nisyu kasqanrayku. Ñakasqayá kachunku mana llakipayarikuspa rabiasqankurayku. Jacobpa miraynin ukupim mirayninkunataqa rakinasaq. Israel nacionpipas mirayninkunatam cheqechisaq.

⁸ Juda, qamtam wawqekikuna alabasunki. Enemigoykikunatam kunkanmanta hapinki. Wawqekikunam ñawpaqnikipi kumuykusunki.

⁹ Malta leon hinam kanki, churiy Juda. Leonpa uñan hinam qamqa kanki, churiy Juda. Hapimusqaykiwan saksaspam waqtapanki. Hatun leon kaqllam kurkuykachaspayki waqtapanki. Wawayoq leon hina kachkaptikiqa ¿pitaqsi rikchachisunkimanqa?

¹⁰ Judapa mirayninkunamantam reykuna kanqa. Dueño hamunankamam manataq pipas qechunqachu rey kaynintaqa. Payllatañam kasukunqaku runakunaqa.

¹¹ Uvas sachamanmi malta asnonta wataykunqa. Sumaqllaña uvas sachamanmi uña asnochanta wataykunqa. Vinowanmi payqariki pachanta taqsanqa. Uvaspa yakunwanmi saconninta taqsanqa.

¹² Vinomantapas aswan mas pukam ñawinkunapas. Lechemantapas aswan mas yuraqmi kirunkunapas.

¹³ Zabulonpa mirayninkunam lamar qochapa patanpi *f**yachanqa. Chaypitaqmi buquekunapa sayananpas kanqa. Linderonñataqmi Sidon llaqtakama kanqa.

¹⁴ Isacarqa poqosqa asno hinam. Payqa corralninpi waqtapaq asno hinam.

¹⁵ Rikurqam samakuyqa allin kasqanta. Rikurqataqmi sumaqllaña kasqanta. Wasanta kurkuykachispam cargaykachikurqa. Sirviente hinam hukpaq llamkarqa.

¹⁶ Danqa castankunatam allinta arreglanqa. Israelpa huknin ayllun hinam allinta arreglanqa.

¹⁷ Payqa ñanpa patanpi culebra hinam. Pasaq caballokunapa chakinta kachuq hinam. Payqa sillakuqtapas wichiykachinqa culebra hinam.

¹⁸ Tayta Dioslláy salvaykuwanaykitam suyachkani.

¹⁹ Gadqa salteasqam kallanqapas. Ichaqa salteanqam paykunatapas.

²⁰ Aserpa tantanqa kanqa miskillañam. Payqa qonqa reypaq hina miskillaña mikuykunatañam.

²¹ Neftaliyqa munasqanpi purikuq luwichu hinam. Payqa kuyayllapaq uñachayoq luwichu hinam.

²² Ruruq kallma hinam Joseyqa. Pukyupa hichpanpi ruruq sachapa kallman hinam payqa. Perqapa hawanman mastarikuq kallma hinam payqa.

²³ Paytaqa cheqnispankum flechanku. Flechaqkunaqa siemprepunim wateqanku.

²⁴ Joseyqa flechanantam takyachin allinta. Kallpanchanmi brazonkunatapas allinneqta. Chaynataqa ruranqa Jacobpa atiyniyoq Diosninraykum. Chaynataqa ruranqa Israelpa Michiqnin Diosraykum. Chaynataqa ruranqa Israelpa harkaqnin Diosraykum.

²⁵ Taytaykipa Diosninmi yanapasunki. Tukuy Atiyniyoq Diosmi bendecisunki. Payqa bendecisunki cielokunapi kaqkunawanmi. Payqa bendecisunki lamar qochapi kaqkunawanmi. Warmikiqa achka wawakunatayá ñuñuchun. Warmikiqa achka wawakunatayá wachakuchun.

²⁶ Ñoqa taytaykim bendicionta rimaripuchkayki. Wiñaypaq kaq orqokunamantapas mastaraqmi bendecichkayki. Wiñaypaq kaq moqokunamantapas mastaraqmi bendecichkayki. Qam Joseypa umayki hawanpim kanqa kay bendicionkunaqa. Wawqekikunamanta sapaqchasqam karqanki qamqa.

²⁷ Benjaminqa tisaparuq atoq hinam. Achikyaruptin hapimusqanta mikuq hinam. Tardekuqtañataq qechumusqankunata rakinakuq runa hinam.

²⁸ Kay llapallankum karqa Israelpa mirayninmanta chunka iskayniyoq ayllukuna. Chaykunatam taytanku rimarirqa paykunapaq bendicionta mañakuspan.

Jacob wañukuptin pampakusqanmanta

²⁹ Churinkunatam Jacob kamachispan nirqa: —Wañukuptiymi pampawankichik abueloykunapa pampakusqan sitiopi. Paykunaqa pampakurqa Het casta Efronpa chakranpi kaq machaypim.

³⁰ Chay machayqa kachkan Canaan law Mamrepa chimpan Macpela chakrapim. Chay machaytam Abraham rantirqa Het casta runa Efronmanta chaypi mirayninkuna pampakunanpaq.

³¹ Chaypim Abrahamtawan warmin Sarata pamparqaku, chaypitaqmi pamparqaku Isaactapas hinaspa warmin Rebecatapas. Chaypitaqmi pamparqani Leatapas.

³² Chakrapiwan machayqa Hetpa mirayninkunamanta rantisqam karqa —nispa.

³³ Jacobmi churinkunaman kamachiyta tukuykuspa waqtapaykuspa wañukurqa hinaspam abuelonkunapa kasqanman rirqa.