Génesis 46 - Quechua Ayacucho Bible 1987

Egipto nacionman Jacob risqanmanta

¹ Israelmi tukuy kapuqnintin rirqa Beerseba llaqtaman hinaspam taytan Isaacpa Diosninta adorananpaq wañuchirqa animalkunata.

² Israeltam mosqoyninpi Dios rimapayaspan nirqa: —Jacob, Jacob —nispan. Payñataqmi nirqa: —¿Imata Taytalláy? —nispa.

³ Chaymi Diosñataq nirqa: —Ñoqam kani Dios, taytaykipa Diosnin. Ama manchakuychu Egipto nacionman riyta, chaypim hatun nacionta qanmanta hatarichisaq.

⁴ Ñoqam risaq Egipto nacionman qanwan kuska. Ñoqataqmi kutichimusqayki, wañukuptikipas Joseymi kanqa ladoykipi —nispa.

⁵ Chaymi Jacob Beerseba llaqtamanta rirqa. Churinkunam aparqaku taytanku Jacobta chaynataq wawakunatapas mamantinta Faraonpa apachimusqan carretakunapi.

⁶ Jacobmi lliw mirayninkunapiwan rirqaku Egipto nacionman. Animalninkuta qatispam aparqakutaq Canaan lawpi armasqankutapas hinaspam rirqaku Egipto nacionman.

⁷ Jacobmi Egipto nacionman pusarqa qaripas-warmipas churinkunata, qaripas-warmipas willkankunata hinaspa llapallan mirayninkunata.

⁸ Egipto nacionman riq Israelpa mirayninkunam otaq Jacobpa mirayninkunam karqa: Jacobpa piwi churin Ruben.

⁹ Rubenpa churinñataqmi karqa Hanoc, Falu, Hezron hinaspa Carmi.

¹⁰ Simeonpa churinkunañataqmi karqa Jemuel, Jamin, Ohad, Jaquin, Zohar hinaspa Canaan warmipa wawan Saul.

¹¹ Leviypa churinkunam karqa Gerson, Coat hinaspa Mirari.

¹² Judapa churinkunam karqa Er, Onan, Sela, Fares hinaspa Zara. Erwan Onanqa wañururqaku Canaan lawpim. Farespa churinkunañataqmi karqa Hezron hinaspa Hamul.

¹³ Isacarpa churinkunam karqa Tola, Fua, Job hinaspa Simron.

¹⁴ Zabulonpa churinkunam karqa Sered, Elon hinaspa Jahleel.

¹⁵ Paykunam karqa Jacobpa warmin Leapa wachakusqan mirayninkuna. Paykunam Padan-aram lawpi nacerqaku. Warmi churin Dinatawan yupaptinkum qaripas-warmipas karqa kimsa chunka kimsayoq.

¹⁶ Gadpa churinkunam karqa Zifion, Hagui, Ezbon, Suni, Eri, Arodi hinaspa Areli.

¹⁷ Aserpa churinkunam karqa Imna, Isua, Isui hinaspa Beria. Paykunapa paninñataqmi karqa Sera. Beriapa churinkunañataqmi karqa Heber hinaspa Malquiel.

¹⁸ Paykunam karqa Zilpapi Jacobpa mirayninkuna, Zilpatam Laban qorqa churin Leaman sirvientanpaq, paypa mirayninkunam karqa chunka soqtayoq.

¹⁹ Jacobpa warmin Raquelpa wawankunañataqmi karqa Joseywan Benjamin.

²⁰ Egipto llaqtapi Joseypa churinkuna naceqmi karqa Manaseswan Efrain, paykunam karqa On llaqtapi sacerdote Potifarpa churin Asenatpa wawankuna.

²¹ Benjaminpa churinkunañataqmi karqa Bela, Bequer, Asbel, Gera, Naaman, Ehi, Ros, Mupim, Hupim hinaspa Ard.

²² Warmin Raquelpi Jacobpa mirayninkunam karqa chunka tawayoq runakuna.

²³ Danpa churinmi karqa Husim.

²⁴ Neftaliypa churinkunañataqmi karqa Jahzeel, Guni, Jezer hinaspa Silem.

²⁵ Paykunam karqa Bilhapi Jacobpa mirayninkuna. Bilhatam Laban qorqa churin Raquelman sirvientanpaq, Bilhapa mirayninkunamá karqa qanchis runakuna.

²⁶ Jacobwan Egipto nacionman riqkunam karqaku soqta chunka soqtayoq runakuna. Jacobpa churinkunapa warminkunam ichaqa mana yupasqachu karqa.

²⁷ Egiptopi naceq Joseypa churinkunam karqa iskay. Egipto nacionman chayaq Jacobpa llapallan mirayninmi karqa qanchis chunka runakuna.

²⁸ Jacobmi churin Judata ñawpachirqa Joseyman chaynapi Gosen lawman pusananpaq chaymi Gosen lawman chayarqaku.

²⁹ Joseymi carretanta preparaspan rirqa Gosen lawman taytan Israelta chaskinanpaq. Joseymi taytanta rikuykuspan abrazakuykurqa hinaspam waqarqa unaysu.

³⁰ Chaymi Joseyta Israel nirqa: —Kayqaya kawsachkaqtaraq rikuykuyki, kunanqa wañukusaqñayá —nispa.

³¹ Joseymi nirqa wawqenkunamanwan taytanpa ayllunkunaman: —Rispayá willamusaq Rey Faraonman: “Canaan lawpi kaq wawqeykunawan taytaypa ayllunkunam chayaramuwan.

³² Paykunaqa animalniyoq oveja michiqkunam chaymi ovejankuta, vacankuta hinaspa tukuy kapuqninkuta aparamunku” nispay.

³³ Rey Faraon qayasuspaykichik “¿Ima oficioyoqtaq kankichik?” nispa tapusuptikichikqa

³⁴ ninkichik: “Kay runallaykikunaqa animalkuna uywakuqllam kaniku warma kayniykumantapunipas chaynataq abueloykumantapunipas” nispa. Chaynapim Gosen lawpi *f**yachankichik Egipto runakunaqa oveja michiqkunataqa millakusqanrayku —nispa.