Génesis 45 - Quechua Ayacucho Bible 1987

Wawqenkunaman Josey reqsiykachikusqanmanta

¹ Joseymi llapallan chaypi sirvientenkunapa qayllanpi manaña waqayta aguantarqachu hinaspam kamachirqa: —Lloqsiychik llapallaykichik ladoymanta —nispa. Chaymi sirvientenkuna lloqsiruptinkuña Josey wawqenkunawan reqsichikurqa.

² Qaparispam waqakurqa, chaymi Egipto runakunapas yacharurqaku, yacharurqakutaqmi Faraonpa wasinpi kaqkunapas.

³ Joseymi nirqa wawqenkunata: —Ñoqaqa kani Joseymi ¿Kawsachkanraqchu taytanchik? —nispa. Wawqenkunañataqmi mana ima niytapas atirqakuchu mancharikuspanku.

⁴ Chaymi Josey nirqa wawqenkunata: —Asuykamuwaychik —nispa. Hinaptinmi paykuna asuykuptinku nirqa: —Ñoqaqa kani kay Egipto nacionman rantikamusqaykichik wawqekichik Joseymi.

⁵ Ichaqa amayá kunan llakikuychikchu nitaq pesakuychikchu kayman rantikamuwasqaykichikmantaqa. Achka runakunata kawsachinaypaqmi Dios puntachimuwarqa.

⁶ Kay pachapim karun iskay wataña muchuy, chaywanpas pichqa wataraqmi faltachkan. Manam kanqachu tarpuypas nitaq cosechapas.

⁷ Diosmi puntachimuwarqa kay pachapi miraynikichikta puchuchinaypaq chaynataq qamkunatapas hatun salvacionwan kawsachinaypaq.

⁸ Chaynaqa manam qamkunachu kaymanqa kachamuwarqankichik aswanqa Diosmi Faraonpa consejaqninta ruraruwan chaynapi lliw wasinpi, lliw Egipto nacionpi kamachikuq kanaypaq.

⁹ Utqayman taytanchikpa kasqanman kutispayá nimuychik: “Kaynatam nin churiki Josey: ‘Diosmi lliw Egipto nacionpi churaruwan kamachikuqpaq, hamuyá ama unamuspa.

¹⁰ Gosen lawpim hichpaypi *f**yachanki churikikunawan, willkaykikunawan, ovejaykikunawan, vacaykikunawan hinaspa lliw kapuqnikikunawan.

¹¹ Pichqa wataraq muchuy kaptinpas kaypim mantienesqayki tukuy kapuqnikipas mana tukurunanpaq’ nispa.

¹² Wawqey Benjaminwan qamkunam testigo kankichik kaykuna ñoqapuni rimasqaymanta.

¹³ Willamuychikyá taytayman lliw Egipto nacionpi honrasqa kasqaymanta hinaspa tukuy qawasqaykichikmantapas. Utqaspayá taytayta kayman pusamuychik.

¹⁴ Chaynata niruspanmi wawqen Benjaminwan abrazanakuykuspa waqarqaku.

¹⁵ Llapallan wawqenkunata muchaykarispam abrasaykuspa waqarqa. Chayraqmi wawqenkunapas Joseyta parlapayarqa.

¹⁶ Rey Faraonpa wasinmanmi Joseypa wawqenkuna hamusqan noticia chayarurqa chaywanmi kusikurqa Faraon chaynataq gobiernonpi yanapaqninkunapas.

¹⁷ Faraonmi Joseyta nirqa: —Wawqekikunata nimuy: “Animalnikichikman cargakuspa kutiychik Canaan lawman.

¹⁸ Taytaykichikta pusamuychik familiaykichiktawan hinaspa hamuychik ñoqaman. Egipto allpapi kaq allinnintam qosqaykichik hinaptinmi kay allpapi wiñaq kawsayta mikunkichik” nispa.

¹⁹ Wawqekikunataqa kamachiytaqyá kay Egipto nacionmanta carretakunata apaspanku churinkunata, warminkunata chaynataq taytaykichikta apamunankupaq. Hampukuchunkuyá.

²⁰ Amayá imankumantapas llakikuchunkuchu, kay Egipto nacionpiqa allin kaqkunam paykunapaq kanqa —nispa.

²¹ Chaymi Israelpa churinkuna chaynata rurarqaku. Joseymi carretakunata qoykurqa Rey Faraonpa kamachisqanman hina hinaspam qoqawchaykurqa kutispa mikunankupaq.

²² Llapallankumantaqmi qoykurqa mudana pachatapas, Benjaminmanñataqmi qoykurqa kimsa kilo parten qollqeta pichqa mudana pachatawan.

²³ Taytanmanñataqmi apachirqa chunka asnopi Egipto nacionpa allinnin kaqkunata, chunka china asnopiñataqmi cargarqa kawsayta hinaspam qoqawta apachirqa taytanman hamustin mikunanpaq.

²⁴ Joseymi wawqenkunata aviaspan nirqa: —Amam ñanpi piñanakunkichikchu —nispa.

²⁵ Chaymi Egipto nacionmanta lloqsispanku Canaan lawpi taytanku Jacobman chayarqaku.

²⁶ Hinaspam willakurqaku: —¡Joseyqa kawsachkasqam! ¡Lliw Egipto nacionpi kamachikuqmi kasqa! —nispa. Hinaptinmi Jacob yaqalla desmayarurqa, manataqmi creerqachu.

²⁷ Chaymi Joseypa tukuy paykunaman nisqanta willarqaku. Apanankupaq Joseypa apachisqan carretakunata qawaykuspanñam Jacob rikcharichkaq hina kusikurqa.

²⁸ Chaymi nirqa Israel: —Kunanqa creeniñam. Churiy Joseyqa kawsachkanchiki, rispayá qawaykamusaq manaraq wañukuchkaspay —nispa.