Génesis 44 - Quechua Ayacucho Bible 1987

Joseypa qollqe vasonmanta

¹ Joseymi kamachirqa wasinpi mayordomonta: —Kay runakunapa costalninman huntachiy kawsayta apay atinankukama, churaytaqyá apamusqanku qollqetapas sapakamapa costalninman kawsay rantisqanku qollqetawan.

² Churaytaq qollqe vasoytapas sullkankupa costalninman kawsay rantisqan qollqetawan —nispa. Chaymi pay rurarqa Joseypa nisqanta hina.

³ Achikyaytam runakunata asnonkunatawan aviarurqaku.

⁴ Paykuna llaqtamanta lloqsiramuspa manaraqpas karupi kachkaptinkum Josey nirqa mayordomonta: —Chaylla qatiy chay runakunata, hayparuspaykim ninki paykunata: “¿Imanasqataq allin rurasusqaykichikta mana allinwan kutirachinkichik? ¿Imanasqataq suwakamurqankichik qollqe vasotaqa?

⁵ ¿Manachu chay vasoqa señorniypa tomanan hinaspa chaywantaq adivinanpas? ¡Kaytaqa manam allintachu rurarunkichik!” nispa.

⁶ Chay mayordomom paykunata hayparuspan nirqa imam Joseypa yachisqanta hina.

⁷ Hinaptinmi paykunañataq nirqaku: —¿Señorllayku imanasqataq kay palabrakunataqa, niwankiku? Manam haykapipas kay runallaykikunaqa chaynataqa ruraymankuchu.

⁸ Canaan lawmantaraqmi costalniykupi qollqe tarisqaykutapas kutichimurqaniku. ¿Imaynataq patronnikipa wasinmantaqa qori-qollqentaqa suwakamuymanku karqa?

⁹ Huk kaqniykupapi vasota tariruspaqa wañuchiy, wakiqniykupas señorniykupa sirviententaq kasaqku —nispa.

¹⁰ Chaymi mayordomo nirqa: —Nisqaykichik hinayá kachun. Pipapipas tarisqay kaqllayá sirvienteyqa kachun, wakinnikichikqa mana huchayoqmi kankichik —nispa.

¹¹ Paykunam costalninkuta utqayman uraykachispanku sapakama kicharqaku.

¹² Chaymi piwi kaqmanta maskayta qallaykuspan sullkan kaqpi tukurqa chaymi Benjaminpa costalninpi vasota tarirurqa.

¹³ Chaymi paykuna mana ima rurakuyta atispa pachankuta llikiparqaku hinaspam asnonkuman cargakuykuspa kutirqaku llaqtaman.

¹⁴ Joseypa wasinmanmi Juda chayarurqa wawqenkunawan hinaptinmi hinallapiraq Josey kachkasqa, chaymi paypa ñawpaqninpi qonqoranpa kumuykurqaku pampaman.

¹⁵ Chaymi Josey paykunata nirqa: —¿Imatam kayta rurarunkichik? ¿Manachum yacharqankichik ñoqaqa adivinaqpuni kasqayta? —nispa.

¹⁶ Chaymi Juda nirqa: —Manam imatapas nikikumanñachu nitaqmi negakuytapas atiymankuñachu. Kay runallaykikunapa mana allin rurasqaykutam Dios rikurirachin. Ñoqaykuqa qam señorniykupa sirvientenñam kaniku vasoyki apaqpiwan kuska —nispa.

¹⁷ Hinaptinmi Josey nirqa: —Manam chaynatachu rurasaq, copa apaqllam sirvienteyqa kanqa, qamkunañataqmi taytaykichikman hawkalla kutikunkichik.

Benjaminpa favorninpi Juda ruegakusqanmanta

¹⁸ Chaymi Joseyman asuykuspan Judá nirqa: —¡Ay! señorlláy, ruegakuykim kay runallaykipa rimarisqayta uyariykuwanaykipaq. Qamqa kanki Rey Faraon hinam, amayá piñakuychu ñoqawanqa.

¹⁹ Qanmi, señorlláy, tapuwarqankiku: “¿Taytaykichik wawqekichikpas kanchu?” nispa.

²⁰ Hinaptinmi nirqaykiku: “Arí kawsachkanraqmi, payqa yuyaqñam. Yuyaq kayninpiñam sullka churin nacerqa, chay churinpa wawqenñataqmi wañukunña chaymi payllaña qeparun mamanmanta kaq warmaqa. Payqa taytaykupa llumpay kuyasqanmi” nispa.

²¹ Qamñataqmi kay runallaykikunata niwarqankiku: “Pusamuwaychik reqsinaypaq chay warmata” nispa.

²² Chaymi ñoqayku nirqaykiku: “Taytantaqa warmaqa manam saqemuyta atinmanchu, saqeramuptinqa taytanmi wañurunman” nispa.

²³ Chaymi kay runallaykikunata niwarqankiku: “Sullka wawqekichikwan mana hamuspaqa manam rikuwankichikchu” nispa.

²⁴ —Taytaykuman chayaruspam willarqaniku qampa niwasqaykikuta hina.

²⁵ Chaymi taytayku niwarqaku: “Kutispa asllatapas kawsayta rantimuychik ñoqanchikpaq” nispa.

²⁶ Hinaptinmi ñoqaykuñataq nirqaniku: “Manam riymankuchu sullka wawqeyku mana ñoqaykuwan riptinqa, paywanmi ichaqa risaqku. Sullka wawqeyku ñoqaykuwan mana riptinqa chay señortaqa manam rikuymankuchu” nispa.

²⁷ Chaymi taytayku niwarqaku: “Qamkunaqa yachankichikmi warmiy Raquelpaqa iskay wawan kasqanta.

²⁸ Hukninmi ladoymanta lloqsirqa hinaspam kunankama mana kutiykamunchu, seguroch purun animal llikiparurqa.

²⁹ Huknintapas ladoymanta pusaruptikichik imapas pasaruptinqa waqasqallaypichá kay machuqa wañukusaq” nispa.

³⁰ —Chaynaqa señorllayku, taytaykupa vidanmi pienden warmapa vidanmanta. Taytaykuman kunan kutiykusaqku mana warmayoq

³¹ hinaptinqa watukuykuspachá wañurunqa hinaptintaqchá ñoqayku huchayoq kasaqku yuyaq taytayku waqasqallanpi wañukuptin.

³² ¿Imaynatataq warmamanta kay runallaykiqa respondesaq taytayman? Paytam nirqani: “Mana kutichimuspayqa ñoqam kasaq wiñaypaq huchayoq” nispay.

³³ Chayraykum ruegakuyki, kay warmapa rantinpiyá sirvientekipaq ñoqaña quedasaq warmañataq kutichun wawqeykunawan.

³⁴ ¿Imaynataq ñoqaqa kutiykuyman mana warmawanqa? Manam taytayta imapas pasarunanta munanichu —nispa.