Génesis 43 - Quechua Ayacucho Bible 1987

Benjaminta Egipto nacionman pusasqankumanta

¹ Muchuymá karqa llumpaysu chay lawkunapi.

² Egipto nacionmanta kawsay apamusqanku tukuruptinmi taytanku Israel nirqa: —Kutiychik hinaspa asllatapas kawsayta rantimuychik ñoqanchikpaq —nispa.

³ Hinaptinmi Juda nirqa: —Chay runam chunkay-chunkayta nimuwarqaku: “Sullka wawqekichikta mana pusamuwaspaykichikqa manam rikuwankichikchu” nispa.

⁴ Wawqeykuta ñoqaykuwan kachaptikiqa risaqkum hinaspam rantimusaqku kawsayta.

⁵ Mana kachariptikim ichaqa mana risaqkuchu. “Sullka wawqekichikta mana pusamuwaspaykichikqa manam rikuwankichikchu” nispam niwarqaku chay runaqa —nispa.

⁶ Chaymi Israel nirqa: —¿Imanasqataq kay mana allinta rurawankichik huknin wawqekichikmantapas willakaramuspaykichik? —nispa.

⁷ Hinaptinmi paykunañataq nirqaku: —Chay runam tapupayawarqaku ayllunchikkunamanta kaynata: “¿Taytaykichik kawsanraqchu? ¿Kanraqchu huk wawqekichikpas?” nispan. Chaymi willakurqaniku tapuwasqankuman hina. Manam yacharqanikuchu “wawqekita pusamuy” nispa niwanankutaqa.

⁸ Chaymi Juda nirqa taytan Israelta: —Kachariyyá warmata ñoqaykuwan rinanpaq chaynapi qampas, ñoqaykupas chaynataq warmaykupas mana wañurunanpaq.

⁹ Ñoqam Benjaminmantaqa nanachikusaq, mana kutichimuptiyqa ñoqatachá cuentata mañawanki, ñoqachá wiñaypaq culpayoq kasaq.

¹⁰ Mana harkaruwaptikikuqa iskaykamañapas kutiruymankuchá karqa —nispa.

¹¹ Chaymi taytanku Israel nirqa: —Chayna kaptinqa kaynatayá ruraychik: kay Canaan lawpi allin kaqkunatayá apaychik regalota chay runaman: as balsamota, mielta, miski asnaqta, mirrata, nuezkunata hinaspa almendrasta.

¹² Apaychiktaqyá qollqetapas rantimunaykichikpaq, kutichiychiktaqyá costalpi qollqe tarisqaykichiktapas, icha pantaspapas hinaramurqaku.

¹³ Wawqekichiktapas pusaspayá kutiychik chay runaman.

¹⁴ Tukuy Atiyniyoq Diosyá chay runapa sonqonman churaykuchun qamkunapaq llakipayakuyta chaynapi Simeonta hinaspa Benjamintapas kacharimunanpaq. Churiykunata qechuruwaptinqa imanasaqñamá —nispa.

¹⁵ Chaymi runakunaqa aparqaku regalokunata ñawpaq apasqanku qollqemantapas huk chaynatawanraq, pusarqakutaqmi Benjamintapas chaymi Egipto nacionman rispanku Joseyman chayarqaku.

¹⁶ Chaymi Josey qawaykurqa Benjamintawan wawqenkunata hinaspam wasinpi mayordomonta kamachirqa: —Kay runakunata wasiyman pusaykuy hinaspa novillota nakaspa mikuyta ruramuy, kay runakunam chawpi punchawta ñoqawan mikunqa —nispa.

¹⁷ Joseypa kamachisqanta hina chay mayordomo ruraspanmi Joseypa wasinman chay runakunata pusaykurqa.

¹⁸ Joseypa wasinman pusaykuptinkum chay runakuna mancharikuspa ninakurqaku: —Punta hamuyninchikpi costalninchikpi qollqe rikurirusqanmantachá tumpaykuwaspanchik kaymanqa pusaykaramuwanchik chaynapi hapiruwananchikpaq, chaynapichá sirvientenña kasunchik asnonchikkunawan kuska —nispa.

^19-20 Joseypa mayordomonman asuykuspankum wasipa punkunpi parlapayarqaku: —Señorlláy, hamurqanikum puntata kawsay rantiq.

²¹ Kutispaykum tuta samana lugarman chayarurqaniku chaymi costalniykuta kichaykuptiyku sapakamapa qollqeyku kachkasqa imam kaq pesoyoq chaymi kutichimuchkaniku.

²² Apamurqanikutaqmi huk chayna qollqetapas kawsay rantinaykupaq ichaqa manam yachanikuchu costalniykuman pim chay qollqe churarusqantaqa —nispa.

²³ Hinaptinmi chay mayordomoñataq nirqa: —Hawkalla kaychik qamkunaqa, ama manchakuychikchu qamkunapa hinaspa taytaykichikpa Diosninmi costalnikichikpi pakata hina qoykusurqankichik, qollqekichiktaqa imam kaqtam chaskirqani —nispa. Chaymantam Simeonta horqomurqa paykunaman.

²⁴ Chay mayordomom runakunata Joseypa wasinman pusaykurqa. Yakuta paykunaman qoykuptinmi chakinkuta mayllakurqaku, chay mayordomoqa asnonkumanpas qaraykurqam.

²⁵ Paykunañataqmi Joseywan chawpi punchawpi mikunankuta yachaspanku regalota prepararqaku.

²⁶ Josey wasiman hamuruptinmi regalota wasiman apamuspanku paypa qayllanpi qonqoranpa pampaman kumuykurqaku.

²⁷ Chaymi Josey tapurqa imaynam kasqankumanta: —Taytaykichik yuyaqñam nisqaykichikqa ¿imaynataq kachkan? ¿Kawsachkanraqchu? —nispa.

²⁸ Hinaptinmi paykuna nirqa: —Allinllam kachkan taytallaykuqa, kawsachkanraqmi —nispa. Hinaspam qonqoranpa pampaman kumuykurqaku.

²⁹ Chaymi Tayta-mamanmanta wawqen Benjaminta Josey qawarispa tapurqa: —¿Paychu chay willawasqaykichik sullka? wawqekichik —nispa. Hinaspam Benjaminta nirqa: —Diosyá bendecisunki, churilláy —nispa.

³⁰ Chaymi Josey wawqenmanta waqanayay hapiruptin cuartonman yaykuruspan waqakururqa.

³¹ Uyanta upakuruspanmi waqanayaynin taniruptin hawaman lloqsimuspan nirqa: —Mikuyta servimuychik —nispa.

³² Joseypaqmi servirqaku sapaq mesapi, sapaq mesapiñataq wawqenkunapaq hinaspa sapaq mesapitaq paywan kuska mikuq Egipto runakunapaqpas. Egipto casta runakunaqa manam kuskaqa mikuqkuchu Hebreo castakunawanqa, paykunapaqqa karqa millakuypaqmi.

³³ Wawqenkunatam tiyachirqa chimpanpi, piwimanta qallaykuspa sullkakama chaymi wawqenkunaqa admirasqallaña qawanakurqaku.

³⁴ Chaymi Josey mesanmanta haywarqa mikuyta paykunaman, Benjaminpa mikuyninqa wakinpamanta pichqa kuti masmi karqa. Tomaspankum kusikurqaku Joseywan.