Génesis 42 - Quechua Ayacucho Bible 1987

Joseypa wawqenkuna kawsay rantiq risqankumanta

¹ Jacobmi Egipto nacionpi kawsaykuna kasqanta yachaspa nirqa churinkunata: —¿Imatataq rurachkankichik qawanakuspallaqa?

² Ñoqam uyarirqani Egipto nacionpiqa kawsaykuna kasqanta, rispayá rantimuychik chaynapi yarqaymanta ama wañurunanchikpaq —nispa.

³ Chaymi Joseypa chunkantin wawqenkuna Egipto nacionman pasarqaku kawsaykunata rantimunankupaq.

⁴ Jacobmi Joseypa wawqen Benjaminta mana kacharirqachu wawqenkunawan rinanpaq: “Yanqañataq imapas pasarunman” nispa.

⁵ Israelpa churinkunam kawsaykuna rantimunankupaq wakin riqkunapiwan rirqaku Canaan lawpipas muchuy kasqanrayku.

⁶ Joseymi karqa Egipto nacionpi munaychakuq, chayraykum llapa runakunaman kawsayta rantikuq. Joseypa wawqenkunam chayaruspanku paypa ñawpaqninpi qonqoranpa pampaman kumuykurqaku.

⁷ Chaymi Josey wawqenkunata qawaykuspa reqsirurqa aswanqa manam reqsiqpas tukurqachu hinaspam piñasqa paykunata tapurqa: —¿Maymantataq hamuchkankichik? —nispa. Chaymi paykunañataq nirqa: —Canaan lawmantam hamuchkaniku kawsaykunata rantinaykupaq —nispa.

⁸ Joseyqa wawqenkunata reqsiruchkaptinpas paykunaqa manam Joseyta reqsirqakuchu.

⁹ Chaymi Josey paykunamanta mosqosqanta yuyariruspa nirqa: —Wateqaqkunam kankichik, kay nacionqa mana defiendesqa kasqanta qawaqmi hamurqankichik —nispa.

¹⁰ Hinaptinmi paykunañataq nirqa: —Señor, runallaykikunaqa kawsay rantiqllam hamurqaniku.

¹¹ Kay lliwchaykum kaniku huk runapa churillan, cheqap rimaq runakunam kaniku. Kay runallaykikunaqa manam wateqaq runakunachu kaniku —nispa.

¹² Chaymi Josey nirqa: —Cheqaptapunim qamkunaqa nacionqa mana defiendesqa kasqan qawaq hamurqankichik —nispa.

¹³ Hinaptinmi paykunañataq nirqa: —Kay runallaykikunaqa chunka iskayniyoq wawqekunam kaniku, Canaan lawpi huk runapa churillanmi kaniku. Sullkaykum kachkan taytaykuwan hukninñataqmi chinkarun —nispa.

¹⁴ Chaymi Josey nirqa paykunata: —Nisqaypi hinam wateqaq kankichik.

¹⁵ Kunanmi pruebasqa kankichik. Juranim Faraonrayku, mana sullka wawqekichik hamuptinqa manam lloqsinkichikchu kaymanta.

¹⁶ Kachaychikyá huknikichikta chay wawqekichikta pusamunanpaq, qamkunañataqyá preso qepaychik rimasqaykichik cheqap kasqan pruebasqa kananpaq, mana chayqa juranim Faraonrayku, wateqaqmi kankichik —nispa.

¹⁷ Hinaspam paykunata carcelman churarqa kimsa punchaw.

¹⁸ Kimsa punchawmantam paykunata Josey nirqa: —Kawsanaykichikpaq kaynata ruraychik: ñoqaqa Diostam respetani.

¹⁹ Cheqap rimaq qarikuna kaspaykichikqa huknin wawqekichiktayá carcelpi presota dejaychik, wakinnikichikñataqyá riychik wasikichikman kawsayta apaspa familiaykichik mikunanpaq.

²⁰ Ichaqa sullka wawqekichiktam pusamuwankichik chaymi cheqap kanqa rimasqaykichik, mana chayna kaptinqa wañunkichikmi —nispa. Paykunam chaynata ruraspanku

²¹ ninakurqaku: —Cheqaptapunim huchallikururqanchik wawqenchikpa contranpi. Ruegakuwachkaptinchikmi ñakariyninta qawachkaspa mana uyarirqanchikchu chayraykum ñoqanchikman kay ñakariy hamuruwanchik —nispa.

²² Chaymi Ruben paykunata nirqa: —¿Manachum nirqaykichik: “Ama huchallikuychikchu warmapa contranpi” nispay? ichaqa manam kasuwarqankichikchu, kunanmi vidanmanta pagachkanchik —nispa.

²³ Paykunaqa manam yacharqakuchu rimasqankutaqa Josey entiendesqanta, Joseywan wawqenkuna rimaptinmi huk runa tikrarqa paykunapaq.

²⁴ Joseymi paykunamanta rakikuykuspan waqarqa, chaymantam paykunaman kasqan kutispan rimapayarqa hinaspam Simeonta qawachkaptinku presochaspa chaqnachirqa.

²⁵ Chaymantam runankunata Josey kamachirqa wawqenkunapa costalninman trigota huntachinankupaq chaynataq sapakamapa qollqenkutapas costalninkuman kutiykachinankupaq hinaspa qoqawchanankupaq. Chaynatamá paykunapaq rurarqaku.

²⁶ Joseypa wawqenkunam kawsaykunata asnonkuman cargakuykuspa kutirqaku.

²⁷ Samasqankupiñam asnonman mikuchinanpaq costalninta huk kaqnin kichaykuspan tarirurqa qollqenta.

²⁸ Chaymi nirqa wawqenkunata: —Qollqeytam kutiykarachimuwasqa, costalniypim kasqa —nispa. Hinaptinmi mancharikuywan katkatataspanku ninakurqaku. —¿Imatataq Diosqa rurawachkanchik? —nispanku.

²⁹ Canaan lawman chayaspam taytanku Jacobman willakurqaku paykunata tukuy ima pasamusqanmanta:

³⁰ —Egipto nacionpi kamachikuq runam piñasqa rimapayawarqaku nacionnin wateqaq kasqaykuta piensaspan.

³¹ Chaymi ñoqayku nirqaniku: “Manam wateqaqkunachu kaniku, ñoqaykuqa cheqap rimaq qarikunam kaniku.

³² Taytaykupa churinkunam kaniku chunka iskayniyoq, hukninmi chinkarun, sullkaykuñataqmi taytaykuwan Canaan lawpi kachkan” nispa.

³³ Chay nacionpi kamachikuq runam niwarqaku: “Kaynapim reqsisqaykichik cheqap runakuna kasqaykichikta: huknin wawqekichikta ñoqawan saqeychik hinaspa kutiychik familiaykichik mikunanpaq kawsayta apaspa,

³⁴ pusamuwankichikmi sullka kaq wawqekichikta chaynapi wateqaqkuna mana kasqaykichikta chaynataq cheqap rimaq runakuna kasqaykichikta yachanaypaq. Chayñam wawqekichikta kacharisaq, chayñam negociotapas rurakunkichik kay nacionpi” nispa.

³⁵ Chaynata niruspa costalninkuta vaciaptinkum sapakamapa qollqenku kipusqa kachkasqa chaymi taytankupiwan qollqenkuta qawaykuspanku mancharikururqaku.

³⁶ Chaymi taytanku Jacob paykunata nirqa: —Manaña churiyoqtachu dejaruwankichik, Joseyqa manam kanñachu nitaqmi Simeonpas kaypiñachu. Benjamintapas qechuruwaytam munachkankichik. Tukuy kaykunaqa ñoqapa contraypim —nispa.

³⁷ Chaymi taytanta Ruben nirqa: —Mana kutirachimuptiyqa iskay churiykunatachá wañurachinki, qoykuwayá Benjaminta ñoqam kutichimusaq —nispa.

³⁸ Hinaptinmi pay nirqa: —Manam churiyqa rinmanchu qamkunawanqa, wawqen wañuruptinmi payqa sapallanña qeparun, chay risqaykichikpi imapas pasaruptinqa waqasqallaypichá kay machuqa wañukusaq —nispa.