Génesis 40 - Quechua Ayacucho Bible 1987

Iskay presokunapa mosqosqanmanta

¹ Chaykuna pasaruptinmi Egipto nacionpi reyman vino serviqwan panaderokunapa jefen reyninkupa contranpi faltakururqaku.

² Chaymi Rey Faraonqa iskay serviqninkunapa contranpi otaq vino serviqkunapa jefenpa contranpi hinaspa panaderokunapa jefenpa contranpi piñakururqa.

³ Paykunatam Joseypa preso kasqan carcelman churarachirqa, chay carcelqa karqa reyta waqaychaq soldadokunapa capitanninpa wasinpim.

⁴ Joseyman chay presokunata capitan qoykuptinmi Josey servirqa paykunata, unaymi karqaku preso.

⁵ Egipto nacionpi reyman vino serviqmi panaderopiwan carcelpi kachkaspanku iskayninku chay tutalla mosqorurqaku, sapa mosqoypam karqa yachachikuynin.

⁶ Paqarinnintin qawananpaq Josey hamuspanñataqmi paykunata tarirurqa hukmanyasqata.

⁷ Hinaptinmi patronninpa wasinpi kaq presomasinkunata otaq Faraonpa serviqninkunata Josey tapurqa: —¿Imanasqataq hukmanyasqa kachkankichik? —nispa.

⁸ Chaymi paykuna nirqaku: —Mosqorunikum hinaptinmi mana pipas kanchu imam ninan niwaqniyku —nispa. Hinaptinmi Josey nirqa paykunata: —Willawaychik, Diosmi qosunkichik mosqoynikichikpa imam ninantaqa —nispa.

⁹ Chaymi vino serviqkunapa jefen willakurqa mosqoyninta Joseyman: —Ñoqam mosqoyniypi rikurqani uvas sacha ñawpaqniypi kachkaqta.

¹⁰ Chay uvas sacham kasqa kimsa kallmayoq, ikllimuspam sisamuchkasqa hinaptinmi uvaspa rurun poqorusqa.

¹¹ Hinaptinmi Faraonpa copan makiypi kachkasqa chaymi uvaskunata Faraonpa copanman qapispay copata payman haywasqani.

¹² Hinaptinmi Josey nirqa: —Kaymi mosqoynikipa imam ninanqa: Kimsa kallmakunam kimsa punchaw.

¹³ Kimsa punchawmantam Faraon pusachisunki hinaspam puestoykiman kutiykachisunki chaymi Faraonman servinki copata imaynam ñawpaqta qosqaykiman hina.

¹⁴ Chayna allinpi kaspaykiqa amamá qonqaruwankichu, ama hina kaspaykimá Rey Faraonta niykapuwanki kay carcelmanta horqowananpaq.

¹⁵ Hebreo casta runakunapa kasqan lawmantam ñoqataqa suwamuwarqaku. Mana imamantataqmi kay carcelmanpas churaruwanku —nispa.

¹⁶ Panaderokunapa jefenpas vino serviqman mosqoyninpa imam ninanta willaykuptinmi Joseyta nirqa: —Ñoqañataqmi kaynata mosqorurqani: Umaypim apachkasqani yuraq tanta apana patanasqa kimsa balayta.

¹⁷ Alton kaq balaypim kachkasqa Faraonpaq tukuy rikchaq miskillaña tantakuna hinaptinmi chay apasqay balaymanta alton pawaq animalkuna mikuchkasqa.

¹⁸ Chaymi Josey nirqa: —Kaymi mosqoynikipa imam ninanqa: Kimsan balaykunam kimsa punchaw.

¹⁹ Kimsa punchawmantam Faraon pusachisunki hinaspam kunkaykimanta sachaman warkuchisunki chaymi alton pawaq animalkuna aychaykita mikunqa —nispa.

²⁰ Kimsa punchawmantam Faraon santonpi convidota rurarqa llapallan serviqninkunapaq hinaspam horqochimurqa carcelmanta vino serviqkunapa jefenta chaynataq panaderokunapa jefentapas.

²¹ Vino serviq jefetam kutiykachirqa puestonman chaymi Faraonman vinota servirqa.

²² Panaderokunapa jefentañataqmi warkurachirqa Joseypa nisqanman hina.

²³ Vino serviqkunapa jefenñataqmi mana yuyarqachu Joseymanta, aswanqa qonqarurqam.