Génesis 4 - Quechua Ayacucho Bible 1987

Wawqen Abelta Cain wañurachisqanmanta

¹ Adanmi warmin Evawan puñurqa hinaptinmi wiksayakuspa wachakurqa Cain sutiyoq wawanta chaymi Eva nirqa: —Tayta Diospa munasqanman hinam tarikuruni qari wawata —nispa.

² Chaymantañataqmi Cainpa wawqen Abelta wachakurqa. Abelqa ovejakuna michiqmi karqa, Cainñataqmi karqa chakrapi llamkaq.

³ Chaymi tiempopa risqanman hina chakranpi tarpusqan kawsaykunata Cain apamurqa Tayta Diosman ofrenda qonanpaq.

⁴ Abelpas apamurqataqmi piwin ovejankunamanta wiran kaq animalta hinaptinmi Abelta Tayta Dios chaskirqa chaynataq ofrendantapas.

⁵ Caintam ichaqa mana chaskirqachu nitaq ofrendantapas chaymi Cain sinchita piñakururqa uyanpas hukmanyarunankama.

⁶ Hinaptinmi Cainta Tayta Dios nirqa: —¿Imanasqataq piñakurunki? ¿Imanasqataq uyaykipas hukmanyarun?

⁷ Allinta ruraspaqa ¿manachum chaskisqa kawaq? Mana allinta ruraptikim ichaqa hucha purun animal hina punkullapiña kachkan vencerusunaykipaq. Chaywanpas qamqariki munaychakuwaqmi huchataqa —nispa.

⁸ Cainmi wawqen Abelta nirqa: —Hakuchik purikuq —nispa. Hinaptinmi chakrapi kachkaptinku wawqen Abelta Cain maqaspa wañurachirqa.

⁹ Hinaptinmi Cainta Tayta Dios nirqa: —¿Maypitaq wawqeki Abel kachkan? —nispa. Chaymi payñataq nirqa: —¡Manam yachanichu! ¿Wawqey waqaychaqchu ñoqaqa kani? —nispa.

¹⁰ Chaymi Tayta Dios nirqa: —¿Imatataq kayta rurarunki? Allpaman chaqchusqayki wawqekipa yawarninmi acusasuchkanki qayllaypi.

¹¹ Wawqekipa yawarnin allpaman chaqchusqaykiraykum kaymanta qarqosqa kanki hinaspa ñakasqa kanki.

¹² Llamkaptikipas allpaqa manañam cosechata qosunkiñachu, kay pachapiqa pakan-pakan purikuqllañam kanki —nispa.

¹³ Chaymi Tayta Diosta Cain nirqa: —Mana allin rurasqaymanta castigoqa ancha hatunmi, manam aguantaymanchu.

¹⁴ Kunanmi kaymanta qarqowanki, qayllaykimantapas pakakusaqchá, hinaspachá kay pachapiqa pakan-pakan purikuqllaña kasaq, pipas tariqniychá wañurachiwanqa —nispa.

¹⁵ Ichaqa Tayta Diosmi nirqa: —Pipas wañuchisuqnikiqa qanchis kutikama castigasqam kanqa —nispa. Chaymi Tayta Dios churarqa Caiman señalta pi tarispapas mana wañuchinanpaq.

¹⁶ Cainmi Tayta Diospa qayllanmanta lloqsirqa hinaspam Nod allpapi yacharqa, chay Nodqa karqa intipa qespimunan law Edenpa waklawninpim.

Cainpa mirayninkunamanta

¹⁷ Cainmi warminwan puñurqa chaymi warminqa wiksayakuspa wachakurqa Enocta. Cainmi huk llaqtata hatarichirqa hinaspam churin Enocpa sutinwan suticharqa.

¹⁸ Enocpa churinmi karqa Irad, Iradpa churinmi Mehujael, Mehujaelpañataqmi churin Metusael, Metusaelpañataqmi Lamec.

¹⁹ Lamecmi casarakurqa iskay warmikunawan, hukninmi karqa Ada, hukninñataqmi Zila.

²⁰ Ada kaqmi wachakurqa Jabalta chaymi paypa mirayninkuna karpapi yachaspa animalkuna uywaq karqaku.

²¹ Jabalpa wawqenñataqmi karqa Jubal, paypa mirayninkunam yacharqaku arpatawan qena tocayta.

²² Zilapas wachakurqam Tubal-cainta, paypa mirayninkunam karqa cobremanta, fierromanta herramientakuna ruraq. Tubal-cainpa paninñataqmi karqa Naama.

²³ Lamecmi warminkunata nirqa: Adawan Zila uyariwaychik. Warmiykuna, nisqaytayá uyariwaychik. Huk qaritam wañurachini heridawaptin, huk warmatañataqmi wañurachini maqawanptin.

²⁴ Sichu Cainmanta qanchis kutita vengakuptinqa ñoqamantaqa qanchis chunka qanchisniyoq kutikamam vengakunqa.

Adanpa kimsa kaq churinmanta

²⁵ Adanmi yapamanta warminwan puñurqa hinaptinmi pay wachakururqa qari wawanta, paytam suticharqa Setwan chaymi Eva nirqa: —Cainpa wañuchisqan Abelpa rantinpim Dios qoykuwan huk qari wawatawan —nispa.

²⁶ Chaymantam Setpapas qari churin nacemurqa, paytam Enoswan suticharqa. Chay tiempokunamantam Tayta Diospa sutinpi mañakuyta qallaykurqaku.