Génesis 39 - Quechua Ayacucho Bible 1987

Joseyta Potifarpa warmin munapayasqanmanta

¹ Egipto nacionman Joseyta aparuptinkum Potifar sutiyoq Egipto nacionniyoq runa rantirurqa apaqnin Ismael casta runakunamanta. Potifarqariki karqa Rey Faraonta waqaychaq soldadokunapa capitanninmi.

² Ichaqa Joseyta Tayta Dios yanapaptinmi favorecesqa karqa Egipto nacionniyoq patronninpa wasinpi kaspan.

³ Patronninmi qawarqa Joseytaqa Tayta Dios yanapasqanta chaynataq tukuy rurasqanpipas Tayta Dios allinllataña favorecesqanta.

⁴ Hinaptinmi Joseyta patronnin favorecerqa hinaspam churarqa wasinpi mayordomonpaq hinaspam tukuy kapuqninkunata confiaykurqa.

⁵ Chaymi wasinta chaynataq tukuy kapuqninkunata cuentallikusqan punchawmanta Potifarpa wasinta Tayta Dios bendecirqa Joseyrayku. Chaymi Tayta Diospa bendicionnin karqa tukuy kapuqninpi, wasinpi chaynataq chakranpipas.

⁶ Chaymi tukuy kapuqninta Joseyman dejaykuspan manaña imamantapas piensarqachu aswanqa mikunallanmantañam. Joseyqa karqa buenmozo allin rikchayniyoqmi.

⁷ Patronninpa warminmi Joseyta qawapayaq hinaspam nirqa: —Ñoqawan puñuy —nispa.

⁸ Joseyñataqmi mana munaspan nirqa patronanta: —Patronniyqa wasinpi kaqkunamantaqa manam preocupakunchu, tukuy imantam confiaykuwan.

⁹ Manam kay wasipiqa ñoqamanta aswan atiyniyoqqa pipas kanchu. Kayqayá wasinpi tukuy kaqta patronniy entregaykuwan ichaqa qamllatañam mana qowanchu warmin kasqaykirayku. ¿Imaynataq kay mana allinta ruraspayqa Diospa contranpiqa huchallikuyman? —nispa.

¹⁰ Chay warmim sapa punchaw Joseyta hikutaq paywan puñunanpaq ichaqa Joseymi mana munarqachu.

¹¹ Chaymi huk punchaw, wasi allichaq Josey yaykuptin mana pipas wasipi karqachu.

¹² Hinaptinmi Joseypa pachanmanta chay warmi hapirurqa: —Puñusun ñoqawan —nispan. Ichaqa hawamanmi lluptikaramurqa warmipa makinpi pachantapas dejaramuspan.

¹³ Chaymi makinpi Joseypa pachan quedaramusqanta warmi qawaykuspan

¹⁴ qayarqa wasinpi sirvientenkunata hinaspam nirqa: —Qawaychik, qosaypa pusamusqan Hebreo casta runam burlakuwachkanchikña. Paymi yaykumuwarqa puñunaykupaq chaymi hatunmanta qaparirqani.

¹⁵ Qaparispay qayakuptiymi lluptiramurqa hawaman pachantapas ladoypi dejaruspan —nispa.

¹⁶ Chay warmim Joseypa pachanta churarqa Joseypa patronnin wasiman kutimunankama.

¹⁷ Chay warmimá chay wakin sirvientenkunaman rimasqanta hinalla qosanman willaspan nirqa: —Hebreo casta pusamusqayki sirvientem yaykumuwarqa burlakuwananpaq

¹⁸ chaymi qaparispay qayakuptiy lluptiramurqa hawaman pachantapas ladoypi dejaruspan.

¹⁹ Kaytam rurawan sirvienteki —nispa. Warmin chaynata willaykuptinmi Joseypa patronnin sinchita piñakururqa.

²⁰ Chaymi Joseyta churarurqa reypa presonkunapa kasqan carcelman hinaptinmi karqa chay carcelpi.

²¹ Aswanqa Tayta Diosmi karqa Joseywan hinaspam favorecerqa, favorecechirqataqmi carcelpi jefewanpas.

²² Chaymi Joseyman carcelpi kamachikuq jefe entregaykurqa carcelpi llapallan presokunata chaynapi payña cuentallikunanpaq, Joseymi chay carcelpi tukuy ima kamachikuq karqa.

²³ Carcelpi jefeqa Joseyman entregasqan punchawmantam mana preocupakurqachu Joseywanqa Tayta Dios kasqanrayku, Tayta Diosmi paypa rurasqanpi favorecerqa.