Génesis 37 - Quechua Ayacucho Bible 1987

¹ Jacobñataqmi taytanpa *f**yachasqan Canaan allpapi yacharqa forastero hina.

Joseymantawan wawqenkunamanta

² Kunanñataqyá Jacobpa mirayninkunamanta willasqaykichik: Joseymi chunka qanchisniyoq watanpi wawqenkunawan ovejakunata michirqaku. Chay wawqenkunaqa karqa taytanpa churi-wachan Bilhapa hinaspa Zilpapa wawankunam. Joseymi willaq taytanman paykunapa mana allin rurasqankuta.

³ Israelmi kuyaq Joseyta llapan churinkunamantapas aswan masta machuyayninpiña churin kasqanrayku chaymi qoysuneq sumaq pachata rurapurqa.

⁴ Taytanmi Joseyta kuyarqa wakin churinkunamantapas aswan masta chayraykum wawqenkuna cheqniqku hinaspam piñasqalla rimapayaqku Joseyta.

⁵ Josey mosqoruspanmi wawqenkunaman willarqa, chayraykum paykunaqa aswanraq cheqnirurqaku.

⁶ Joseymi nirqa paykunata: —Uyariychik kay mosqoyniyta:

⁷ Gavillakunatam watachkasqanchik chakrapi hinaptinmi ñoqapa gavillay sayarirurqa hinaspam derecholla karqa, qamkunapa gavillaykichikñataqmi muyuriqninpi kaspa kurkuykurqa ñoqapa gavillayman —nispa.

⁸ Chaymi wawqenkunañataq nirqa: —¿Qamqa reyniyku kaspachu munaychakunki ñoqaykupi? —nispa. Hinaspam aswanraq cheqnipakururqaku chay mosqoyninmantawan.

⁹ Huktawan mosqospam wawqenkunaman willarqa: —Kunanmi huktawan mosqoruni, intiwan killam lucerokunapiwan ñoqaman kumuykuwarqa —nispa.

¹⁰ Taytanmanpas willakurqam wawqenkunaman hina chaymi taytan qaqchaspan nirqa: —¿Ima mosqoytaq chay mosqoynikiqa? ¿Ñoqachum hamusaq mamaykipiwan hinaspa wawqekikunapiwan ñawpaqnikipi qonqoranpa pampaman kumuykunaykupaq? —nispa.

¹¹ Chaymi wawqenkuna envidiakurqa Joseymanta, taytanñataqmi yuyaymanarqa chay willasqanmanta.

Joseyta wawqenkuna rantikurusqanmanta

¹² Joseypa wawqenkunam taytanpa ovejankuna michiq rirqaku Siquem lawta.

¹³ Chaymi Israel nirqa Joseyta: —Wawqekikunam Siquem lawpi ovejata michichkanku, paykunatayá kunan watukaramuy —nispa. Chaymi Joseyñataq nirqa: —Arí, rirusaqyá —nispa.

¹⁴ Hinaptinmi taytan nirqa: —Rispaykiyá qawaramuy wawqekikunapa imaynam kasqankuta, yacharamuytaqyá ovejakunamantapas willawanaykipaq —nispa. Joseytaqa Hebron qechwamantam kacharqa chaymi rirqa Siquem lawkama.

¹⁵ Chaymi purunpi pantaruspa purichkaqta huk runa tarirurqa hinaspam tapurqa: —¿Imatataq maskachkanki? —nispa.

¹⁶ Joseyñataqmi nirqa: —Wawqeykunatam maskachkani, ruegakuykim maypim michisqankuta willaykuwanaykipaq —nispa.

¹⁷ Hinaptinmi chay runañataq nirqa: —Ñam pasakunkuña kaymantaqa, ñoqam uyarirqani: “Haku Dotan lawman” —niqta. Chaymi Josey rirqa wawqenkunapa qepanta hinaptinmi paykunaqa Dotan lawpi kachkasqaku.

¹⁸ Chaymi paykunaman manaraq chayachkaptin, rikuruspanku Joseyta wañurachinankupaq tanteanakurqaku.

¹⁹ Paykunam ninakurqaku: —Waqayá mosqoykuna mosqoq maqtaqa hamuchkan.

²⁰ Kunanyá wañurachispa wischuykusunchik huk pozoman hinaspayá nisunchik: “Ima purun animalchá mikururqa” nispa. Hinaptinchá yachasunchik mosqoyninkunamanta —nispa.

²¹ Chayta Ruben uyariruspanmi paykunamanta librayta munaspan nirqa: —Ama wañuchisunchikchu —nispa.

²² Wawqenkunamanta librayta munaspanmi taytanman kutichiyta munaspan paykunata Ruben nirqa: —Kay pozoman kachaykuychik, ama wañuchiychikchu inocente warmataqa —nispa.

²³ Josey wawqenkunaman chayaruptinmi paykuna llatanarurqaku chay qoysuneq sumaq pachanta.

²⁴ Hinaspam hapiruspa pozoman kachaykurqaku, pozoqa mana imayoq chakim kasqa.

²⁵ Chaymantam tiyaykurqaku mikunankupaq. Qawarispankum rikururqaku negociante Ismael casta runakunata Galaad lawmanta hamuchkaqta. Paykunam camellonkupi apachkarqaku miski asnaqkunata, balsamokunata hinaspa mirra cargakunata Egipto nacionman.

²⁶ Chaymi wawqenkunata Juda nirqa: —¿Imatataq horqokusunchik wawqenchikta wañurachispanchikqa chaynataq wañusqanmanta pakaspanchikpas?

²⁷ Ismael runakunamanyá rantikurusunchik, amayá paytaqa wañuchisunchikchu, wawqenchikqa aychanchikmi. Chaymi wawqenkunapas “allinmi” nirqaku.

²⁸ Chay negociante Madian casta runakuna pasachkaptinmi Joseyta wawqenkuna horqorqaku pozomanta hinaspam Ismael casta runakunaman rantikururqaku cuarto kilo qollqepi chaymi Joseyta aparqaku Egipto nacionman.

²⁹ Rubenñataqmi chay pozoman kutispan Joseytaqa manaña tarirqachu chaypiqa hinaspam pachankunata llikiparqa llakimanta.

³⁰ Chaymi wawqenkunaman kutirispan nirqa: —Warmaqa manam kanchu. ¿Kunanqa imapitaq rikukuykuni? —nispa.

³¹ Chaymi paykuna Joseypa pachanta hapispanku, huk chivatochata wañurachispa chaypa yawarninwan Joseypa pachanta chapurqaku.

³² Hinaspam Joseypa chay qoysuneq sumaq pachanta apachirqaku taytankuman. —Kayllatam tariruniku, reqsiy kayta churikipa pachanchu icha manachu —nispanku.

³³ Chaymi Jacob reqsiykuspa nirqa: —Churiypa pachanmi kayqa, ima purun animalchiki paytaqa mikurun. Joseypa cuerponqariki llikipasqach kachkan —nispa.

³⁴ Chaymi Jacob pachanta llakimanta llikipaspa luto pachawan churakurqa hinaspam waqallarqa churinmanta achka punchawta.

³⁵ Chaymi llapallan churinkuna asuykurqaku consuelanankupaq ichaqa paymi consuelanankuta mana munaspan nirqa: —Ñoqaqa churiymantaqa llakikusaq wañunaykamam —nispa. Chaynata nispanmi waqallarqa.

³⁶ Madian casta runakunañataqmi Egipto nacionpi Potifarman rantikururqa Joseyta. Potifarqa karqa Egipto nacionpi Rey Faraonta waqaychaq soldadokunapa capitanninmi.