Génesis 35 - Quechua Ayacucho Bible 1987

Betel llaqtapi Jacobta Diospa bendecisqanmanta

¹ Diosmi nirqa Jacobta: —Betel lawman rispayki chaypi *f**yachamuy hinaspa chaypitaq ñoqapaq altarta ruramuy. Ñoqam kani wawqeki Esaumanta lluptichkaptiki rikuriqniki Dios —nispa.

² Chaymi Jacob nirqa familiantawan llapallan paywan kaqkunata: —Wischuychik hatallisqaykichik taytacha-mamachakunata hinaspa limpiakuychik, mudakuychiktaq pachaykichiktapas.

³ Hakuchik Betel lawman, llakiypi rimapayawaqniy Diosmanmi chaypi ruramusaq altarta, paymi purisqaykunapi ñoqawan karqa.

⁴ Chaymi Jacobman qoykurqaku hatallisqanku llapallan taytacha-mamachakunata chaynataq rinrinkupi kaq aretekunatapas chaymi Jacob pamparurqa Siquem llaqtapa hichpan encina sachapa sikinpi.

⁵ Ripukuptinkum Dios qorqa manchakuyta muyuriqnin llaqtapi kaq runakunaman chaynapi Jacobpa churinkunata mana qatinankupaq.

⁶ Jacobmi chayarqa llapallan runakunapiwan “Luz” sutiyoq llaqtaman, chaypa huknin sutinqa Betelmi, chayqariki tarikun Canaan allpapim.

⁷ Chaypi altarta ruraruspam chay sitiota suticharqa El-Betelwan wawqenmanta lluptichkaptin Dios chaypi rikuriykusqanrayku.

⁸ Chaypitaqmi wañururqa Rebeca uywaq Deborapas hinaptinmi pamparurqaku Betel llaqtapa hichpan encina sachapa sikinpi chayraykum Jacob chay sachata suticharqa “Waqaqkunapa Encina Sachan” nispa.

⁹ Chaypim Dios huktawan Jacobman rikurirqa Padan-aram lawmanta kutimuptin hinaspam payta bendecispan

¹⁰ nirqa: Jacobmi karqa qampa sutikiqa Kunanqa manam chayñachu kanqa. Israelwan sutichasqañam kanki kunanmantaqa. Israelwan suticharuspanmi

¹¹ Dios nirqa: Tukuy Atiyniyoq Diosmi kani ñoqaqa. Achka churiyoq kaspayá miray qamqa. Achka nacionkunam miraynikichikmanta kanqa. Reykunam qanmanta lloqsinqa.

¹² Abrahanman qosqay allpatam qosqayki. Isaacman qosqay allpatam qosqayki. Qosqaykimá qanmanpas chaynataq miraynikikunamanpas.

¹³ Hinaptinmi Dios pasakurqa chay sitiopi Jacobwan rimaruspa.

¹⁴ Chaymi Jacob sayachirqa Diospaq huk suytu rumita rimasqanku sitiopi hinaspam sapaqchananpaq hichaykurqa rumipa hawanman vinotawan aceiteta.

¹⁵ Chaymi Dioswan rimasqanku sitiota Jacob suticharqa Betelwan.

Raquelpa wañukusqanmantawan pampakusqanmanta

¹⁶ Betel lawmantam pasarqaku ichaqa Efrata llaqtachaman hichpachkaptinkuñam Raquel wachakuspa llumpayta ñakarirqa.

¹⁷ Wachakuspan sinchita ñakarichkaptinmi partera nirqa: —Ama manchakuychu, kay wawapas qarim kasqa —nispa.

¹⁸ Chaymi Raquelqa wañunayachkaspanña suticharqa Benoniwan hinaspam wañukurqa. Taytanñataqmi suticharurqa Benjaminwan.

¹⁹ Raquel wañuruptinmi Efrata llaqtachaman riq ñanpa patanpi pamparurqaku. Efrata llaqtachapa huknin sutinqa Belen llaqtam.

²⁰ Raquelpa sepulturanpa hawanpim Jacob wasichata hina perqarqa, chaypim Raquelpa sepulturan kachkan kay libro qellqasqa kasqan tiempokama.

²¹ Chaymanta Israel pasaspanmi karpanta sayachirqa Edar torrepa waklawninpi.

²² Israel chay allpapi *f**yachachkaptinmi taytanpa compañeran Bilhawan Ruben puñururqa. Chayta Israel yacharuspam llumpayta piñakurqa. Jacobpa qari churinkunam karqa chunka iskayniyoq.

Jacobpa churinkunamanta

²³ Leapim karqa piwi churin Ruben, qatiqninkunañataqmi karqa Simeon, Leviy, Juda, Isacar hinaspa Zabulon.

²⁴ Raquelpi churinkunam karqa Joseywan Benjamin

²⁵ Raquelpa sirvientan Bilhapi churinkunañataqmi karqa Danwan Neftaliy.

²⁶ Leapa sirvientan Zilpapi churinkunañataqmi karqa Gadwan Aser. Kaykunam Jacobpa qari churinkuna, Padan-aram lawpi naceqkuna.

Isaacpa wañukusqanmanta

²⁷ Chaymantam Jacob chayarqa Isaac taytanpa kasqan Mamre llaqtaman otaq Arba llaqtaman. Chay llaqtapa huknin sutinmi karqa Hebron. Chaypim ñawpaqta Abrahampas chaynataq Isaacpas *f**yacharqa.

²⁸ Isaacmi pachak pusaq chunkan watanpi

²⁹ wañukurqa hinaspam abuelonkunapa kasqanman rirqa. Sinchi yuyaqñam payqa wañukurqa chaymi churin Esauwan, churin Jacob pamparqaku.