Génesis 34 - Quechua Ayacucho Bible 1987

Jacobpa churin Dina abusasqa kasqanmanta

¹ Jacobpa churin Leapa wawan Dinam lloqsirqa chay llaqtapi sipaskuna qawaq.

² Dinata Hamorpa churin Siquem qawaykuspanmi engañowan abusaruspan penqayman churarurqa. Hamorqa karqa chay lawpi kamachikuq Hiv casta runam.

³ Aswanqa Jacobpa churin Dinatam kuyarurqa Siquem hinaspam kuyakuyllawanña rimapayarqa.

⁴ Chaymi Siquemqa taytan Hamorta rimapayarqa: —Yaykupakuy kay sipaswan casarakunaypaq —nispa.

⁵ Ichaqa Jacobmi yacharurqa churin Dinata Siquem penqayman churarusqanmanta. Aswanqa qari churinkuna campopi animalkunawan kaptinmi Jacobqa upallalla karqa paykuna hamunankama.

⁶ Chaymi Siquempa taytan Hamor rirqa Jacobman yaykupakuq.

⁷ Jacobpa churinkunañataqmi yacharuspanku hamurqaku campomanta. (Jacobpa huknin sutinmi Israel.) Jacobpa warmi churinwan Siquem loco hina puñurusqanmanta llakikuruspankum anchata piñakururqaku paykuna ukupiqa chayqa mana haykapipas rurana kasqanrayku.

⁸ Chaymi Hamor paykunawan rimarqa kaynata: —Churiy Siquenmi llumpayta kuyarun panikichikta, ama hina kaspayá ama harkakuychikchu churiywan casarakunanta.

⁹ Ñoqaykuwantaq aylluta ruraspayá warmi churikichikkunatapas casarachiychik ñoqaykumanta kaqkunawan, qamkunapas warmi churiykuwanyá casarakuychik.

¹⁰ Ñoqaykuwanñayá *f**yachakuychik, allpaqa kanqam chaypi yachanaykichikpaq chaynataq negocio ruranaykichikpaqpas. Hapikuychikyá chay allpata qamkunapaqña kananpaq —nispa.

¹¹ Siquemqa nirqataqmi Dinapa taytantawan turinkunata: —Ama hina kaspaykichikyá casarachiwaychik hinaptinqa qosqaykichikmi imapas mañawasqaykichikta.

¹² Ñoqapa parteymanta ima regalokunataña mañakuptikichikpas qosqaykichikmi. Kay sipaswanyá casarachiwaychik —nispa.

¹³ Ichaqa paninku Dinata Siquem penqayman churasqanmantam taytan Hamortawan engañollawan Jacobpa churinkuna

¹⁴ nirqaku: —Ñoqaykuqa penqay kasqanraykum paniykutaqa mana qoymankuchu qari kaynin mana señalasqa runakunamanqa.

¹⁵ Ichaqa aceptaymankumá ñoqayku hina qamkunamanta llapan qarikuna señalasqa kaptikichikqa.

¹⁶ Chayraqmi casarakuwaqchik warmi churiykuwanqa, ñoqaykupas chayraqmi casaraymanku warmi churikichikkunata. Chaynapim qamkunawan *f**yachaspa huk castallaña kasunchik.

¹⁷ Mana señalakuyta munaspa mana kasuwaptikikum ichaqa paniyku sipasta pusarikuspa pasakusaqku —nispa.

¹⁸ Chay rimasqankum Hamorpa churin Siquempaq allin rikchakapurqa.

¹⁹ Jacobpa churin Dinata kuyarusqanraykum Siquemqa chay nisqanta apurawaman rurarqa. Siquemqa karqa taytanpa familianpi llapallanmanta allin respetasqam.

²⁰ Chaymi Hamorqa churin Siquempiwan rirqaku llaqtankupa zaguannin punkupi huñunakuyman hinaspam rimarqaku llaqtankupi runakunawan kaynata:

²¹ —Kay runakunaqa amistadninchikmi, chaynaqa kay allpanchikpi *f**yachaspayá negociata rurachunku. Kay allpaqa hatunmi, paykunapaqpas haypanqam. Ñoqanchikmi warmi churinkunata casarasunchik, paykunapas casaranqam warmi churinchikkunata.

²² Ichaqa munasqankuman hina ñoqanchikwan yachanankupaqmi paykuna hina llapanchik qarikuna señalachikusun chaynapi huk castallaña kananchikpaq.

²³ Lliw kapuqninkupas chaynataq tukuy animalninkupas ñoqanchikpaqmi kanqa. Ichaqa paykunawanyá conveninakuykusun ñoqanchikwan *f**yachanankupaq —nispa.

²⁴ Chaymi llaqtapi kallpayoq llapallan qarikuna kasukurqa Hamorpa hinaspa churin Sequempa nisqanta, llapallankum qari kayninkupa qarachanta kuchuchikurqaku.

²⁵ Aswanqa kimsa punchawña hatun nanayllawanña kachkaptinkum Dinapa turinkuna, Simeonwan Leviy otaq Jacobpa churinkuna sapakama espadankuta hapispa yaykurqaku llaqtaman hinaspam wañurachirqaku llapallan runakunata mana defiendekuy atichkaqta.

²⁶ Hamortapas espadawanmi churin Sequemtawan wañurachirqaku hinaspam Dinata Siquempa wasinmanta horqoruspa kutichirqaku.

²⁷ Jacobpa wakin churinkunapas paninku penqayman churasqa kasqanmantam chay wañuchisqanku runakunapa kasqanman rispanku saquearqaku llaqtata.

²⁸ Qechurqakum ovejakunata, vacakunata hinaspa asnokunata. Apakurqakum llaqtapi llapa ima kaqkunatapas chaynataq campopi kaqkunatapas.

²⁹ Apakurqakumá tukuy imankutapas, llapallan wawakunatapas, warminkutapas chaynataq wasikunapi tukuy kaqkunatapas.

³⁰ Chaymi Simeontawan Leviyta Jacob nirqa: —Kay llaqtapi *f**yachaq Canaan casta runakunawan hinaspa Ferez casta runakunawanmi cheqninarachiwankichik hinaspam penqayman churaruwankichik, as runalla kachkaptinchikqa atacaruwaspanchikchá wañurachiwasun, wañurachinqakutaqchá wasinchikpi llapallan kaqkunatapas —nispa.

³¹ Chaymi paykunañataq nirqaku: —¿Chuchumikata hinachu paniykuta ruranan karqa? —nispanku.