Génesis 33 - Quechua Ayacucho Bible 1987

Jacob wawqen Esauwan allinyanakusqanmanta

¹ Jacobmi rikururqa Esauta tawa pachak runantin hamuchkaqta chaymi rakirqa wawakunata Leaman, Raquelman hinaspa iskaynin sirvientankunaman.

² Puntatam churarqa sirvientankunata wawantintakama, qepanmanñataqmi churarqa Leata wawankunatawan, lliwpa qepanmanñataqmi churarqa Raquelta wawan Joseytawan.

³ Jacobñataqmi pasarqa paykunapa ñawpaqninman hinaspam qanchis kutikama qonqorakuspa pampaman kumuykurqa chaynapi wawqenman asuykunanpaq.

⁴ Chaymi wawqen Esau kallpaykurqa tupaykuq hinaspam Jacobta abrazaykuspan muchaykurqa hinaspam kuskanku waqarqaku.

⁵ Chaymantam Esau rikururqa Jacobpa warminkunatawan churinkunata chaymi tapurqa: —¿Pikunataq kay qanwan hamuqkunaqa? —nispa. Chaymi Jacob nirqa: —Paykunaqa favorecewaspa Diospa qowasqan churiykunam —nispa.

⁶ Chaymi sirvientakuna wawankunapiwan asuykamuspa qonqoranpa kumuykurqaku.

⁷ Leapas wawankunapiwanmi asuykamuspa qonqoranpa kumuykurqaku, chaymantañataqmi asuykamurqa Josey maman Raquelpiwan hinaspam qonqoranpa kumuykurqaku.

⁸ Chaymi Esau tapurqa: —¿Imatataq munanki llapallan hatajontin animalkuna tarimusqaykunawanqa? —nispa. Hinaptinmi Jacob nirqa: —Qampa favorniki tariykuyllatam —nispa.

⁹ Hinaptinmi Esauñataq nirqa: —Wawqelláy, ñoqataqa manam imapas pisiwanchu, kay kapusuqnikiqa qampaqyá kachun —nispa.

¹⁰ Chaymi Jacob nirqa: —Ama hina kaspaykiyá chaskiykuway regaloyta, Diospa uyantapas rikuykuchkaq hinam qampa uyaykita rikuykuni, qampas kusisqamiki kachkanki ñoqawan.

¹¹ Regalo apamusqaytayá chaskiykuway. Tukuy kaykunaqa Diospa qowasqanmi —nispa. Chaynata hikutaptinmi Esau chaskiykurqa.

¹² Chaymi Esau nirqa: —Hakuchik kuska, ñawpaqnikitam risaq —nispan.

¹³ Hinaptinmi Jacob nirqa: —Wawqelláy, rikuchkankim churiykunaqa llumpay wawallaraq kasqanta chaynataq cabraykunapas, ovejaykunapas, vacaykunapas llullu uñayoq kasqanta, pisiparuspankuchá llapallan huk punchawllapi wañurunman.

¹⁴ Taytáy, kay serviqnikipa ñawpaqniytayá puntachkay, ñoqaqa allillamantam hamusaq animalkunapa purisqanman hina. Wawakunapa risqanman hinalla allillamanta hamuspaymi Seir orqopiña tupasunchik —nispa.

¹⁵ Chaymi Esau nirqa: —Chaynaqa ñoqawan hamuq runaykunatayá wakinta saqeykusqayki —nispa. Hinaptinmi Jacobñataq nirqa: —Señorlláy, amañayá saqewaychu —nispa.

¹⁶ Chaynapim Esau kutikurqa Seir lawman chay punchawlla.

¹⁷ Jacobñataqmi pasarqa Sucot lawman hinaspam chaypi wasita rurarqa, animalninkunapaqpas chaypim ramadakunata rurarqa. Chayraykum suticharqa chay sitiota Sucotwan.

¹⁸ Padan-aram lawmanta Jacob hamuspam Canaan allpapi kaq Siquem llaqtaman chayarurqa hinaspam karpankunata sayachirqa chay llaqtapa chimpanpi.

¹⁹ Chaypim huk chakrata rantirurqa Siquempa taytan Hamorpa churinkunamanta tawa kilo parten qollqewan hinaspam chaypi karpanta sayachirqa.

²⁰ Hinaspam chaypi altarta ruraspa suticharqa El-Elohe-Israelwan.