Génesis 32 - Quechua Ayacucho Bible 1987

Jacob wawqen Esauwan tupanakusqanmanta

¹ Jacob riptinmi Diospa angelninkuna lloqsimurqa chaskiqnin.

² Chaymi Jacob paykunata rikuruspan nirqa: —Diospa tropanpa campamentonmi kayqa —nispa. Hinaspam chay lugarta suticharqa Mahanainwan.

³ Chaymi Jacob kacharqa willakuqkunata Esau wawqenman. Paymi kachkarqa Seir law Edom nacionpi.

⁴ Kachaspam nichimurqa: —Kaynatam nin serviqniki Jacob: “Kunankamam *f**yachamurqani tionchik Labanwan.

⁵ Kapuwanñam vacaykuna, asnoykuna, ovejaykuna, cabraykuna chaynataq sirvienteykunawan sirvientaykunapas chaymi qam señorllayman willachimuyki ama hina kaspa favoreceykuwanaykipaq” nispa.

⁶ Chaymantam willakuqkuna kutimurqa Jacobman kaynata nispa: —Rirqanikum wawqeki Esauman chaymi paypas hamuchkan chaskisuqniki tawa pachak runakunawan.

⁷ Chaymi Jacob anchata mancharikuspan hukmanyarurqa, chayraykum paywan kaq runakunata iskayman rakirqa, iskaymantaqmi rakirqa ovejakunatapas, vacakunatapas chaynataq camellokunatapas

⁸ kaynata piensaspan: “Esau hamuspa huknin hatajota wañuchiptinpas huknin hatajoqa lluptinqaraqmi” nispa.

⁹ Jacobmi mañakurqa: —Abueloy Abrahampa chaynataq taytay Isaacpa yupaychasqan Tayta Dios, qanmi niwarqanki: “Kutikuy taytaykipa kasqan aylluykikunaman hinaptinmi allinta rurasqayki” nispa.

¹⁰ Cheqap kuyapayakuynikitaqa manam chaskinaypaq hinachu kani. Tawnallaywanmi kay Jordan Mayutaqa chimpamurqani kunanqa iskay hatajoman rakinasqa kapuqniyoqñam kachkani.

¹¹ Wawqey Esaumantayá libraykullaway Taytáy, paytaqa manchakunim. Hamuspachá wañurachinqa warmiykunata wawantinta.

¹² Qamtaqmi niwarqanki Taytáy: “Ñoqam yanapasqayki allin kanaykipaq chaynataq lamar qochapi aqo hinaña mana yupay atina castayoq kanaykipaq” nispa.

¹³ Chay tutam chaypi Jacob puñururqa hinaspam kapuqninmanta wawqen Esauman regalananpaq akllarqa:

¹⁴ iskay pachak cabrakunata, iskay chunka chivatokunata, iskay pachak ovejakunata, chunka carnerokunata.

¹⁵ kimsa chunka china camellokunata ñuñuq uñantintakama, tawa chunka vacakunata, chunka novillokunata, iskay chunka china asnokunata, chunka orqo asnokunata.

¹⁶ Hinaspam sirvientenkunaman sapa hatajota entregaykurqa kaynata kamachispan: —Ñawpachiychik hatajo animalkunata huknin hatajomanta karunchasqata —nispan.

¹⁷ Punta riqtam kamachirqa: —Wawqey Esauwan tuparuptiki: “¿Pitaq kachkanki? ¿Maytataq richkanki? ¿Pipataq kay qatisqayki animalkunaqa?” nispa tapusuptikiqa kaynatam ninki:

¹⁸ “Señorlláy Esau, kay regalokunaqa serviqniki Jacobpa qanman apachimuwasqanmi, paypas qepaykutam hamuchkan —nispa.

¹⁹ Kamachirqataqmi qepata atajontin riqkunatapas: —Esauwan tupaspaykichikqa chay nisqayman hinamá ninkichik:

²⁰ “Serviqniki Jacobqa qepaykutam hamuchkan” nispa. Chaynataqa nirqa kaynata piensasqanraykum: —Regalokunata puntarachispaymi piñakuyninmanta sonqonta llampuyaykachisaq hinaspañam tupaykusaq icharaqpas chaynapi chaskiykuwanman —nispa.

²¹ Chaymi puntata pasachirqa regalokunata hinaspanmi chay tuta puñurqa campamentopi.

Angelwan Jacob peleasqanmanta

²² Hina chay tutallam hatariruspan iskaynin warminkunata, iskaynin sirvientankunata hinaspa chunka hukniyoq churinkunata Jaboc mayupa vadonta chimparachirqa.

²³ Pasachirqamá paykunata llapa imankunatawan.

²⁴ Chaymi Jacob sapallan qeparurqa hinaspam pelearqa huk qariwan achikyanankama.

²⁵ Hinaptinmi Jacobta mana venceyta atispan waqtarurqa weqaw moqonpi hinaptinmi chay qariwan peleachkaptin Jacobpa huknin piernan moqakururqa.

²⁶ Chay qarim nirqa Jacobta: —Achikyamuchkanñam kachaykuway pasakunaypaq —nispa. Chaymi Jacobñataq nirqa: —Manam kacharikimanchu mana bendiciwaptikiqa —nispa.

²⁷ Hinaptinmi chay qari tapurqa: —¿Imataq sutiki? —nispa. Hinaptinmi payñataq nirqa: —Jacobmi —nispa.

²⁸ Chaymi pay nirqa: —Manañam Jacobñachu sutikiqa kanqa, aswanqa Israelñam Dioswan chaynataq runakunawanpas peleaspa vencerusqaykirayku —nispa.

²⁹ Jacobñataqmi chay qarita tapurqa: —Kunanyá willaykuway sutikita —nispa. Chaymi payñataq nirqa: —¿Imapaqtaq tapuwanki sutiytaqa? —nispa. Hinaspanmi chaypi bendeciykurqa.

³⁰ Chaymi Jacob chay lugarta suticharqa Penielwan: —Diosta rikuruchkaspaypas kawsachkaniraqmi —nispa.

³¹ Penielta pasaruptinmi inti qespiramurqa, Jacobñataqmi rirqa wistutyastin.

³² Jacobta weqaw moqonpi waqtarusqanraykum Israelpa castankunaqa mana mikunkuchu animalpa weqawninpi kaq ankutaqa kay libro qellqasqa kasqan tiempokama.