Génesis 30 - Quechua Ayacucho Bible 1987

¹ Raquelmi Jacobpa churinta mana wachakuspan ñañanmanta envidiakuspan Jacobta nirqa: —Qoway wawakunata mana chayqa wañurusaqmi —nispa.

² Jacobñataqmi Raquelwan piñakuruspan nirqa: —Diosmi mana wachakuqtaqa rurasurqanki, manam ñoqaqa Dioschu kani wawata qonaypaqqa —nispa.

³ Chaymi Raquel nirqa: —Kayqaya sirvientay Bilha, paywanyá puñuy, pay wachakuptinmi paypa wawankuna wawaykuna hina kanqa —nispa.

⁴ Chaymi Raquel qoykurqa sirvientan Bilhata Jacobpa churi-wachan kananpaq hinaptinmi Bilhawan Jacob puñurqa.

⁵ Chaymi wiksayakuspan wachakurqa Jacobpa qari churinta.

⁶ Chaymi nirqa Raquel: —Diosmi allin arreglota ruraykapuwaspan qayakusqaytapas uyariykuwantaq hinaspam qoykuwan huk qari wawata —nispa. Chayraykum suticharqa Danwan.

⁷ Huktawanmi Raquelpa sirvientan Bilha wiksayakurqa Jacobpa churinta hinaspam wachakururqa iskay kaq qari wawanta.

⁸ Chaymi Raquel nirqa: —Anchatam gananakurqani ñañaywan hinaspam venceruni —nispa. Chaymi suticharqa Neftaliywan.

⁹ Leañataqmi manaña masta wachakuspan sirvientan Zilpata qoykurqa Jacobpa churi-wachan kananpaq.

¹⁰ Chaymi Leapa sirvientan Zilpa Jacobpa churinta wiksayakuspa wachakururqa qari wawata.

¹¹ Chaymi Leaqa nirqa: —Allin suertem kayqa —nispan. Chayraykum suticharqa Gadwan.

¹² Huktawanmi Leapa sirvientan Zilpa wachakururqa Jacobpa qari churinta.

¹³ Chaymi Lea nirqa: —Kusikuyniymi kayqa, kusikuyniyoqmi niwanqakuchá warmikunapas —nispa. Chayraykum Aserwan suticharqa.

¹⁴ Rubenmi trigo rutuy tiempopi chakrapi mandragoras sutiyoq frutata tarirurqa hinaspam aparqa maman Leaman hinaptinmi Raquel nirqa Leata: —Qoykuway wawaykipa apamusqan mandragoras frutaykita —nispan.

¹⁵ Chaymi Leañataq nirqa: —¿Qosayta hapikuruchkaspaykipas wawaypa apamusqan mandragoras frutataraqchu qechuruwayta munachkanki? —nispa. Hinaptinmi Raquel nirqa: —Jacobchiki kunan tuta qanwan puñunqa wawaykipa apamusqan mandragoras fruta qowasqaykimanta —nispa.

¹⁶ Chaymi Jacob tarden chakramanta kutimuchkaptin Lea taripaykuspan nirqa: —Ñoqawanmi kunan tutaqa puñunki, wawaypa apamusqan mandragoras frutawanmi contrataruyki —nispa. Chaymi paywan chay tuta puñurqa.

¹⁷ Leapa mañakuynintam Dios uyarirqa. Chaymi Jacobpa churinta wiksayakuspa wachakurqa pichqa kaq qari wawanta.

¹⁸ Chaymi Lea nirqa: —Qosayman sirvientay qoykusqayraykum Dios premiaykuwan kay wawawan —nispa. Chayraykum suticharqa Isacarwan.

¹⁹ Hinaspam huktawan Jacobpa churinta wiksayakuruspa wachakururqa soqta kaq qari wawanta.

²⁰ Hinaspam nirqa: —Diosmi allin regalota qoykuwan. Qosayqa kunanqa alabawanqachá soqta kutikamaña qari churinkunata wachakuchkaptiyqa —nispa. Chaymi suticharqa Zabulonwan.

²¹ Chaymantam Lea wachakururqa warmi wawanta, paytam suticharqa Dinawan.

²² Ichaqa Diosmi Raquelmanta mana qonqarurqachu chaymi mañakuyninta uyarispan yanaparqa wachakuq kananpaq.

²³ Wiksayakuruspam wachakururqa qari wawanta hinaspam nirqa: —Penqakuyniytam Dios chinkarachin —nispa.

²⁴ Hinaspam suticharqa Joseywan: —Tayta Dios yapawachun huk qari wawatawan —nispa.

Jacobwan Laban engañanakusqankumanta

²⁵ Joseyta Raquel wachakuruptillanmi Labanta Jacob nirqa: —Aviawayña, ripusaqñayá maymi kasqay llaqtaman.

²⁶ Ripukunaypaqyá kachariy warmiykunatawan churiykunata. Paykunaraykum servirqayki, qamqariki yachankim imaynam servisqaytaqa —nispa.

²⁷ Chaymi Labanñataq nirqa: —Ama hina kaspaykiyá amaraq ripukuychu, adivinaspam sumaqta yachani qamrayku Tayta Dios bendeciwasqanta.

²⁸ Niykuwayá ¿haykatataq ganayta munanki? ñoqaqa pagapusqaykim —nispa.

²⁹ Chaymi Jacobñataq nirqa: —Yachankim imaynam qam servisqaytaqa chaynataq imaynatam animalnikikuna waqaychasqaytapas.

³⁰ Manaraq kaypi kaptiyqa asllam kapusurqanki. Chayamusqaymantam ichaqa Tayta Dios bendecisurqanki chaymi achkallataña mirarun. ¿Haykapiñamá ñoqaqa llamkasaq familiaykunapaqqa? —nispa.

³¹ Chaymi Labanñataq nirqa: —¿Imatataq pagasqayki? —nispa. Hinaptinmi Jacob nirqa: —Ama imatapas pagawaychu. Kaqllam michimusaq ovejaykikunata, kunan nisqayta munaptikiqa.

³² Ñoqam kunan kanchaykita qawamusaq hinaspam llapallan cheqchi ovejakunata, muru ovejakunata chaynataq llapallan malta yana carnerokunata sapaqchamusaq, sapaqchasaqtaqmi muru cabrakunatawan cheqchi cabrakunatapas, chaykunam ñoqapa pagoy kanqa.

³³ Qepa punchawkunata qanmanta pagoy chaskinay chayamuptinmi qawanki kanchaypi cabrakunaqa chiqchikunalla hinaspa murukunalla kasqanta chaynataq carnerokunapas yanakunalla kasqanta, mana chayna kaptinqa suwapaqmi hapiwanki. Chaynapim honrado kasqayta yachanki —nispa.

³⁴ Chaymi Laban nirqa: —Arí, chayna nisqaykiman hinayá kachun —nispa.

³⁵ Hinaptinmi chay punchawpuni Laban rakirqa allqa chivatokunata, cheqchi cabrakunata, muru cabrakunata otaq yuraqniyoq cabrakunata. Rakirqataqmi yana malta carnerokunatapas, chaykunatam qoykurqa churinkuna michinanpaq.

³⁶ Chaymi chay animalkunata qatirqaku Jacobpa kasqanmanta kimsa punchaw puriykama. Hinaptinmi Jacob michirqa Labanpa animalninkunata.

³⁷ Chaymi Jacob kaspikunata kuchururqa kiswar sachamanta, almendra sachamanta hinaspa castaño sachamanta hinaspam chay kaspikunapa qaranta chustururqa raya-rayata.

³⁸ Chaymi animalkunapa yaku tomanan artesakunapa hichpanpi churarurqa hinaptinmi yaku tomaq animalkuna chaypi muyanakuqku.

³⁹ Animalkunam muyanakuqku chay kaspikunapa ñawpaqninpi hinaspam wachaq allqakunata, cheqchikunata hinaspa murukunata.

⁴⁰ Chay uñakunata rakispanmi Labanpa allqa animalninkunapa hinaspa yana animalninkunapa chinpanman churarqa. Animalninkunataqa manamá taqruchirqachu Labanpa animalninkunawanqa.

⁴¹ Chaymi poqosqa wiran animalkuna chichukuptin Jacob churaq chay kaspikunata animalkunapa yaku tomanan ladonpi chaynapi chay kaspikunapa ñawpaqninpi chichukunanpaq.

⁴² Umpu animalkuna hamuptinñataqmi mana churaqchu, chay umpukunam karqa Labanpaq, poqosqankunañataqmi karqa Jacobpaq.

⁴³ Chayraykum Jacob apuyarurqa anchallataña, paypam kapurqa achkallaña animalninkuna, sirvientenkuna, camellonkuna hinaspa asnonkuna.