Génesis 3 - Quechua Ayacucho Bible 1987

Diosta Adanwan Eva mana kasusqanmanta

¹ Tayta Diospa purunpi llapallan animalkuna unanchasqanmantam culebra aswan sacre karqa. Culebram warmita nirqa: —Diosqariki nisurqankichik: “Huertapi llapa sachakunapa ruruntaqa amam mikunkichikchu” nispam ¿aw?

² Chaymi warmiñataq culebrata nirqa: —Huertapi sachakunapa ruruntaqa mikunikum.

³ Ichaqa Diosmi nirqa: “Huertapa chawpinpi sachapa ruruntaqa amam mikunkichikchu nitaqmi llachpankichikpaschu, mana chayqa wañuruwaqchikmi” nispa.

⁴ Chaymi warmita culebra nirqa: —Manapunim wañunkichikchu.

⁵ Diosmi yachan, maypacham mikuruspaqa ñawikichik kicharikuruptinmi kikin Dios hinaña allin kaqtapas hinaspa mana allin kaqtapas yachaqña rikurirunkichik —nispa.

⁶ Chaymi warmi qawarqa mikunapaq allin sacha kasqanta, qawarqataqmi sumaqllaña kasqantapas chaynataq yachay haypanapaq munayllapaqña kasqantapas chaymi rurunta pallaruspa mikururqa. Qosanmanpas qoykuptinmi paypas mikururqa.

⁷ Hinaptinmi iskayninkupa ñawinku kicharikururqa chaymi mana pachayoq kasqankuta qawakuykuspanku higospa rapinta sirarqaku pachakunankupaq.

⁸ Huertapa chawpinpi wayrarimuptinmi Tayta Diospa purisqanta uyarirurqaku chaymi warmi-qari huerta sachakunapa ukunpi Tayta Diosmanta pakakururqaku.

⁹ Hinaptinmi runata Tayta Dios qayarqa: —¿Maypitaq kachkanki? —nispa.

¹⁰ Chaymi payñataq nirqa: —Huertapim uyarirurqani purisqaykita chaymi mana pachayoq kaspay mancharikuspa pakakururqani —nispa.

¹¹ Hinaptinmi Dios nirqa: —¿Pitaq willasurqanki mana pachayoq kasqaykita? ¿Icha “Amam mikunkichu” nisqay sachapa ruruntachu mikururqanki? —nispa.

¹² Chaymi runañataq nirqa: —Compañawananpaq kay warmi qowasqaykim qoykuwarqa chay sachapa rurunta hinaptinmi mikururqani —nispa.

¹³ Chaymantam warmita Tayta Dios nirqa: —¿Imatataq kayta rurarunki? —nispa. Hinaptinmi warmiñataq nirqa: —Culebram engañaruwarqa chaymi mikururqani —nispa.

¹⁴ Hinaptinmi Tayta Dios nirqa culebrata: Chay rurasqaykiraykum llapallan animalkunamanta ñakasqa kanki. ¡Qasqonpam purinki, ñutu allpatataqmi kawsanayki punchawkama mikunki!

¹⁵ ¡Warmitawan qamtam cheqninachisqayki, cheqninachisaqtaqmi miraynikitawan miraynintapas! Mirayninmi umaykita chamchasunki, qamñataqmi talonninpi kachunki.

¹⁶ Warmitañataqmi nirqa: Wiksayakuptikim ñakariykunata yapasqayki. Nanaywanmi wawaykikunata wachakunki, chaywanpas qosaykitam munaypaq-munanki, hina paytaqmi qamtaqa kamachisunki.

¹⁷ Adantañataqmi nirqa: Warmikipa nisusqaykita kasukuspam “Amam mikunkichu” nisqay ruruta mikurunki. Qampa rurasqaykiraykum allpa ñakasqa kanqa. Kawsanaykikama llamkaspam allpamanta wiñaqta mikunki.

¹⁸ Kichkakuna, cardoskunam allpamanta wiñamunqa. Mikunaykipaqmi purunpi wiñaqkuna kanqa.

¹⁹ Allpaman kutiykunaykikamam sinchita llamkaspa mikunaykita tarinki. Allpamanta horqosqam kanki. Allpallam kanki, allpallamantaqmi tikrakunki.

²⁰ Chaymantam warminta runa suticharqa Evawan, payqa llapallan kawsaq runakunapa maman kasqanrayku.

²¹ Chaymi Adanpaqwan warminpaq Tayta Dios qaramanta pachata ruraspan paykunata pachachirqa.

²² Tayta Diosmi nirqa: —Runaqa ñoqanchik hina Allin kaqtapas hinaspa mana allin kaqtapas yachaqñam rikurirun. Chaynaqa yanqañataqmi kawsay qokuq sachapa ruruntapas pallaruspa mikurunman hinaspa wiñaypaq kawsaqña karunman —nispa.

²³ Chaymi runata Tayta Dios Eden Huertamanta horqomurqa chakrapi llamkananpaq allpamanta rurasqa kasqanrayku.

²⁴ Runata hawaman qarqoruspanñataqmi Eden Huertapa intipa qespimunan lawpi churarqa querubin sutiyoq angelkunata. Paykunaqa karqa ruparichkaq espadayoqkamam chaynapi kawsay qokuq sachaman riq ñanta waqaychanankupaq.