Génesis 29 - Quechua Ayacucho Bible 1987

Haran llaqtapi Jacob *f**yachasqanmanta

¹ Jacob kasqallan rispanmi intipa qespimunan lawpi runakunapaman chayarqa.

² Campopi pozota qawariptinmi chaypa hichpanpi kimsa hatajo ovejakuna kachkasqa. Chay pozomantam animalkuna tomaqku. Chay pozopa hawanpim kachkasqa hatun rumi.

³ Chaypim llapa hatajontin ovejakuna huñunakuq hinaptinmi michiqkuna chay pozopa hawanmanta rumita tikraspa ovejakunaman chayraq tomachiqku, tomayta tukuruptinñataqmi rumita pozopa hawanman kasqallan kutiykachiqku.

⁴ Jacobmi michiqkunata tapurqa: —Taytakuna ¿maylawtaq kankichik? —nispa. Hinaptinmi paykunañataq nirqa: —Haran llaqtapi kaqmi kaniku —nispa.

⁵ Chaymi Jacob paykunata tapurqa: —¿Reqsinkichikchu Nacorpa willkan Labanta? —nispa. Hinaptinmi paykunañataq nirqaku: —Arí, reqsinikum —nispanku.

⁶ Chaymi Jacob nirqa: —¿Allinllachu kachkan? —nispa. Chaymi paykuna nirqaku: —Allinllam kachkan, waqaya churin Raquelpas hamuchkan ovejankunawan —nispa.

⁷ Chaymantam Jacob nirqa: —Punchawsuraqmi kachkan, manaraqmi animalkuna huñuna horaraqchu. Ovejakunaman yakuta tomarachispayá riychik michiq —nispa.

⁸ Chaymi paykunañataq nirqa: —Kay pozopa hawanmanta rumi tikraytam mana atinikuchu llapallan hatajo ovejakuna huñunakamunankama, chayñam rumita tikraptinku animalkunaman tomachisaqku —nispa.

⁹ Paykunawan Jacob rimachkaptinmi taytanpa ovejankunawan Raquel chayaramurqa. Payqa karqa taytanpa ovejankuna michiqmi.

¹⁰ Chaymi Jacob rikururqa Raquelta hinaspam pozoman asuykuspa rumita tikrarurqa pozopa hawanmanta hinaspam tomachirqa yakuta Labanpa ovejankunaman. Raquelqa karqa Labanpa churinmi, Labanñataqmi karqa maman Rebecapa turin.

¹¹ Jacobmi Raquelta muchaykuspan waqarqa.

¹² Jacobmi willarqa taytan Labanpa sobrinon kasqanta otaq Rebecapa wawan kasqanta chaymi Raquel kallpaspan taytanman willamurqa.

¹³ Labanñataqmi paninpa wawan Jacobmanta noticiata uyariruspan kallparqa chaskiqnin. Abrasaykuspa muchaykuspanmi pusarqa wasinman chaymi Jacobñataq Labanman willakurqa tukuy ima pasasqanta.

¹⁴ Chaymi Labanñataq nirqa: —Cheqaptapunipas qamqa aylluymi kanki —nispa. Huk killaña Labanwan Jacob *f**yacharuptinmi.

Leawan hinaspa Raquelwan Jacob casarakusqanmanta

¹⁵ Jacobta Laban nirqa: —¿Sobrinoy kaspaykichu debaldella serviwankiman? Niykuwayá ¿haykatataq ganawaq? —nispa.

¹⁶ Labanpam iskay warmi churinkuna karqa. Piwi kaqmi karqa Lea, sullka kaqñataqmi karqa Raquel.

¹⁷ Leaqa karqa sumaq ñawichayoqmi, Raquelñataqmi karqa buenamozallaña.

¹⁸ Jacobmi Raquelta kuyaruspan nirqa: —Sullka kaq churiki Raquelpaqmi servisqayki qanchis wata —nispa.

¹⁹ Chaymi Laban nirqa: —Allinmi qanmanyá qosqayki huk runaman qonaymantaqa, chaynaqa kaypiyá kasunchik —nispa.

²⁰ Jacobmi Raquelrayku servirqa qanchis watatapuni. Ichaqa payta kuyasqanraykum rikchakarapurqa as punchawkunallapaq.

²¹ Chaymi Jacob nirqa Labanta: —Qowayña Raquelta paywan casarakunaypaq, rimanakusqanchik tiempoqa cumplikurunñam —nispa.

²² Labanmi chay lugarpi llapallan runakunata huñuruspan casarakuy convidota rurarqa.

²³ Ichaqa Labanmi churin Leata tutallan pusarurqa Jacobman chaymi Jacobqa puñururqa Leawan.

²⁴ Churin Leamanmi qoykurqa sirvientan Zilpata paypa sirvientanña kananpaq.

²⁵ Achikyaqtaña Jacob qawaykuspanmi yacharurqa Leawan puñurusqanta. Chaymi Labanta Jacob nirqa: —¿Imatataq kayta ruraruwanki? ¿Imanasqataq engañaruwanki? ¿Manachum Raquelrayku servirqaykiqa? —nispa.

²⁶ Chaymi Labanñataq nirqa: —Manam costumbrechu kay llaqtapiqa sullkanta puntata casarachiyqa.

²⁷ Cumpliykuyraq Leawan casarakusqayki semanata, chaymantañam Raquelwanqa casarachisqayki. Paymantachiki huk qanchis watatawanraq serviwanki —nispa.

²⁸ Jacobmi chaynata rurarqa. Casamienton semana cumplikuruptinñam Raquelwan Laban casarachirqa.

²⁹ Labanqa churin Raquelmanmi qoykurqa sirvientan Bilhata paypa sirvientanña kananpaq.

³⁰ Jacobqa Raquelwanpas puñururqam hinaspam Leamantapas astawanraq kuyarurqa. Labantamá servirqa qanchis watatawanraq.

Jacobpa churinkunamanta

³¹ Leaqa Jacobpa despreciasqan kasqanta Tayta Dios qawaspanmi yanaparqa wachakuq kananpaq. Raquelñataqmi karqa mana wachakuq.

³² Wiksayakuspam Lea wachakurqa qari wawanta hinaspam suticharqa Rubenwan: —Humillasqa kasqaytam Tayta Dios qawariykuwan, kunanqa qosayqa kuyawanqañachá —nispa.

³³ Huktawan wiksayakuspam wachakurqa qari wawanta hinaspam nirqa: —Despreciasqa kasqayta Tayta Dios uyarispanmi kay wawaytawan qoykuwan —nispa. Paytam suticharqa Simeonwan.

³⁴ Wiksayakurqataqmi huktawan hinaspam wachakurqa qari wawanta hinaspam nirqa: —Kunanqa qosayqa ñoqallawanñachá kanqa kimsataña qari churinta wachakuchkaptiyqa —nispa. Chayraykum suticharqa Leviywan.

³⁵ Huktawanmi wiksayakuruspan wachakururqa qari wawanta hinaspam nirqa: —Kunanqa Tayta Diostam alabasaq —nispa. Chayraykum suticharqa Judawan. Chaymantam manaña wachakurqañachu.