Génesis 28 - Quechua Ayacucho Bible 1987

¹ Jacobta Isaac qayaspanmi, bendicionta mañapuspan kamachirqa: —Amam Canaan warmiwanqa casarakunkichu,

² Padan-aram lawtayá riy mamaykipa taytan Betuelpa wasinman hinaspayá mamaykipa turin Labanpa huknin warmi churinwan casarakamuy.

³ Tukuy Atiyniyoq Dios bendecisuptikim churisapallaña kanki. Mirachisunkim achka mirayniyoq kanaykipaq.

⁴ Abrahanman prometisqan bendicionnintam qosunki miraynikikunamanwan. Diosmi payman prometirqa forastero hina *f**yachasqanchik kay allpata —nispa.

⁵ Chaynata nispanmi Isaac kacharqa churin Jacobta chaymi pay rirqa Padan-aram lawpi Labanpa wasinman. Labanqa karqa Aram casta Betuelpa churinmi. Rebecapas karqa Labanpa paninmi hinaspa Jacobpapiwan Esaupa mamanmi.

Esaupa casarakusqanmanta

⁶ Esauñataqmi rikururqa Jacobpaq bendicionta Isaac mañakuspan Padan-aram lawman kachasqanta. Yacharurqataqmi Canaan warmikunawanqa Jacob ama casarakunanpaq taytanpa kamachisqantapas.

⁷ Yacharurqataqmi tayta-mamanta kasuspan Jacobqa Padan-aram lawman risqantapas.

⁸ Chaynapim Esauqa musyarurqa taytan Isaactaqa Canaan warmikunaqa mana gustasqanta

⁹ chaymi payqa Ismael casta warmiwan casarakurqa. Warminkuna kachkaptinpas casarakurqamá Mahalat sutiyoq warmiwanpas. Chay warmiqa karqa Ismaelpa churinmi otaq Nebaiotpa paninmi otaq Abrahampa willkanmi.

Betel lawpi Jacobman Dios rikurisqanmanta

¹⁰ Jacobmá lloqsirqa Beerseba llaqtamanta hinaspam rirqa Haran llaqtaman.

¹¹ Samanan sitioman chayaruptinmi inti seqaykurqa, chaypim rumiwan sawnakuykuspa puñururqa.

¹² Chaymi mosqoyninpi rikururqa huk escalerata pampamanta hanaq pachaman haypaqta hinaspa chaynintakama Diospa angelninkuna seqaspa uraykamuchkaqta.

¹³ Rikururqataqmi ladonpi sayachkaq Tayta Diostapas, paymi nirqa: —Ñoqaqa kani abueloyki Abrahampa hinaspa taytayki Isaacpa yupaychasqan Tayta Diosmi. Kay puñusqayki allpatam qosqayki miraynikikunamanwan.

¹⁴ Chaymi miraynikikuna kanqa ñutu allpa hina mana yupay atina. Paykunam cheqenqa tukuy hinastinman chaymi kay pachapi llapallan ayllukuna bendecisqa kanqa qamrayku hinaspa miraynikirayku.

¹⁵ Ñoqam qanwan kachkani chaymi mayman risqaykipipas waqaychasqayki hinaspam kay allpaman kutichimusqayki. Manam saqesqaykichu, ñoqaqa qanman nisqaykunatam rurasaq —nispa.

¹⁶ Chaymi Jacob puñusqanmanta rikchariruspan nirqa: “Cheqappunim Tayta Diosqa kaypi kasqa, manam ñoqaqa yacharqanichu” nispa.

¹⁷ Mancharikuspam nirqa: “Manchakuypaqmi kay lugarqa kasqa. Kayqariki Diospa wasin hanaq pachapa punkunpunim kasqa” nispa.

¹⁸ Tutapayta Jacob hatarispanmi sawnanpaq churasqan rumita hapispan sayachirqa suytu rumita hinaspanmi chaypa hawanman hichaykurqa aceiteta Diosman sapaqchaspan.

¹⁹ Chay lugartam suticharqa Betelwan, puntataqa chay llaqtapa sutinmi karqa Luz.

²⁰ Chaypim Jacob prometikurqa kaynata nispan: —Dios Taytalláy, kay risqaypi waqaychawaspayki mikuytapas pachatapas qowaptikiqa

²¹ chaynataq taytaypa wasinman hawkallata kutichiwaptikiqa qanmi kanki Diosniy.

²² Chaymi kay sayachisqay suytu rumi kanqa Diospa Wasin. Lliw qowasqaykimantapas qosqaykim diezmota —nispa.