Génesis 27 - Quechua Ayacucho Bible 1987

Churinkunapaq Diospa bendicionninta Isaac mañakusqanmanta

¹ Isaacmi yuyaqyaruspan qawakurqa qaspa-qaspallataña chaymi huk punchaw piwi churinta qayaspan nirqa: —Churillay Esau —nispa. Chaymi Esauñataq nirqa: —¿Imata taytáy? —nispa.

² Hinaptinmi Isaac nirqa: —Yuyaqyaruniñam, manam yachakunichu ima punchaw wañukunaytapas.

³ Chaynaqa flechaykitawan arcoykita aparikuspayá purun animalta hapirapamuway.

⁴ Hinaspaykiyá gustasqayta hina yanuykuspa apamuway mikuykunaypaq chaynapi manaraq wañukuchkaspay qampaq bendicionta mañakunaypaq —nispa.

⁵ Rebecañataqmi uyarichkarqa Esauman taytan Isaacpa nisqanta. Esaumá pasarqa purunta animal hapimuq.

⁶ Hinaptinmi Rebeca wawan Jacobta nirqa: —Ñoqam uyariramuni wawqeki Esauman taytaykipa kayna nisqanta:

⁷ “Purun animalta hapiramuspa yanuykapamuway mikuykunaypaq hinaptinyá manaraq wañukuchkaspay Tayta Diospa bendicioninta mañapusqayki” niqta.

⁸ Chaynaqa wawalláy, kay kamachisqaytayá kasuway,

⁹ kanchaman pasaspayá iskay allinnin chivatochakunata aparamuy chaynapi chay aychamanta mikuyta taytaykipa gustasqanman hina yanurapunaypaq.

¹⁰ Chaymi qamñataq apaykunki taytayki mikuykunanpaq chaynapi manaraq wañukuchkaspan bendicionta mañapusunaykipaq —nispa.

¹¹ Chaymi maman Rebecata Jacob nirqa: —Esau wawqeyqa pelosapa cuerpoyoqmi ñoqam ichaqa kani mana pelosapachu,

¹² taytayqa qonqaytachá llachpaykuwanqa asuykuptiy, chaynaqa yanqañataq burlakuqpaq hapiwanman hinaptin bendecisqa kanaymanta ñakasqa karuyman —nispa.

¹³ Chaymi mamanñataq nirqa: —Ñakasusqaykiqa ñoqamanyá chayawachun, ichaqa kasuwaspaykiyá apamuway nisqayta —nispa.

¹⁴ Chaymi Jacob rispan chivatochakunata aparamurqa mamanman hinaptinmi maman yanurapurqa qosanpa gustasqanta hina.

¹⁵ Rebecam horqoramurqa piwi wawan Esaupa pachankunata. Chay allinnin pachankunam karqa Rebecapa wasinpi chaymi sullka kaq wawan Jacobta pacharachirqa.

¹⁶ Chivatochakunapa qaranwanmi wankirurqa Jacobpa mana peloyoq matankantawan makinkunata.

¹⁷ Hinaspam Rebecaqa mikuy yanusqantawan tantata wawan Jacobman qoykurqa.

¹⁸ Chaymi Jacobñataq taytanman rispa nirqa: —Taytáy —nispa. Hinaptinmi payñataq nirqa: —¿Imata? ¿Mayqannin churiytaq kachkanki? —nispa.

¹⁹ Chaymi taytanta Jacob nirqa: —Ñoqaqa piwi churiki Esaumi kani, niwasqaykita hinam ruramurqani, tiyaykuspayá hapimusqay animalmanta preparamusqayta mikuykuy hinaspayá bendicionta mañaykapuway —nispa.

²⁰ Chaymi churinta Isaac nirqa: —¿Imaynataq ratollaqa hapiramurqanki? —nispa. Chaymi Jacobñataq nirqa: —Yupaychasqayki Tayta Diosmi ñawpaqniypi rikuriykachirqa —nispa.

²¹ Chaymi Isaac nirqa: —Asuykamuwayá, llachpaykusqayki ¿cheqapchus kanki churiy Esau icha manachu? —nispa.

²² Jacobmi asuykurqa taytan Isaacman chaymi pay llachpaykuspa nirqa: —Voznikiqa Jacobpa vozninmi, makikikunam ichaqa Esaupa makinkunaman rikchakun —nispa.

²³ Manam reqsirqachu Jacobpa makinkunaqa Esaupa makin hina pelosapallaña kasqanrayku, bendicionta rimariykapuchkaspañam.

²⁴ huktawan tapurqa: —¿Qamchu kanki churiy Esau? —nispa. Hinaptinmi Jacobñataq nirqa: —Ñoqam kani —nispa.

²⁵ Chaymi taytan Isaac nirqa: —Churilláy, asuykachimuway, hapimusqaykita mikuykuspay bendicionta mañapunaypaq —nispa. Chaymi pay asuykachiptin mikurqa, vinotawan apamuptinmi tomaykurqa.

²⁶ Chaymantam taytan Isaac nirqa: —Churilláy, asuykamuwaspayá muchaykuway —nispa.

²⁷ Jacob asuykuspan muchaykuptinmi Isaac muskiykurqa churinpa pachanta hinaspam bendicionta mañapurqa kaynata nispan: Kayqa churiypa asnayninmi, rikchakunqa Tayta Diospa bendicisqan campopa asnayninmanmi.

²⁸ Diosyá qosunki cielomanta parata chaynataq allin cosecha qoq allpata, trigotapas vinotapas mana pisiyta.

²⁹ Nacionkunam servisunki qamtaqa. Achka runakunam kumuykusunki qanmanqa. Aylluykikunapim munaychakunki. Aylluykikunam ñawpaqnikipi kumuykusunki. Ñakasqayá kachunku ñakasuqnikikunaqa. Bendecisqayá kachunku bendecisuqnikikunaqa.

³⁰ Jacobpaq bendicion mañakuyta Isaac tukuykuptillanmi otaq taytanpa ñawpaqninmanta Jacob lloqsiruptillanmi animal hapimusqanmanta wawqen Esau chayaykamurqa.

³¹ Paypas mikuyta yanuruspanmi taytanman apamurqa kaynata nispan: —Tiyaykuy, taytáy, hapimusqaytayá mikuykuy bendicionta mañaykapuwanaykipaq —nispa.

³² Chaymi taytan Isaac nirqa: —¿Pitaq qamqa kanki? —nispa. Hinaptinmi Esauñataq ñirqa: —Ñoqaqa kani piwi churiki Esaumi —nispa.

³³ Chaymi Isaacqa sinchita katkatataruspan nirqa: —¿Pitaq kayman hamuruspan hapimusqan animalta aparamuwarqa? ñoqaqa lliwtam mikururqani manaraq chayamuchkaptiki. Paypaqmi ñoqaqa bendicionta mañaykapuniña, chaynaqa payñam Diospa bendecisqan kanqa.

³⁴ Esaumi taytanpa nisqanta uyariykuspan llumpayllataña waqaspan qaparirqa: —Taytáy, ñoqapaqpas bendiciontayá mañaykapuway —nispa.

³⁵ Chaymi Isaac nirqa: —Wawqekim hamururqa engañowan hinaspam qampa kaq bendicionta chaskikurun —nispa.

³⁶ Chaymi Esauñataq nirqa: —Iskay kutitañam engañaruwan, puntatam qechuruwarqa piwi kayniypa derechonta, kunanñataqmi qechuruwan bendecisqa kanayta: ¿Manachum chayrayku sutinpas Jacob? Ñoqa bendecisqa kanaypaqa ¿manachum mañaykapuwankiman? —nispa.

³⁷ Chaymi Isaacñataq nirqa: —Jacobtam churaruni qampa hawaykipi munaychakunanpaq, llapan ayllunkunatapas churaruni payta servinanpaqmi, trigotapas vinotapas paymanmi qoykuni. Chaynaqa churilláy ¿imatañataq qanmanqa qoykiman? —nispa.

³⁸ Chaymi Esauñataq nirqa: —¿Taytáy, chulla kutillatachu pipaqpas bendicionta mañakuwaq? —nispa. —Chaymi Esauqa qaparispa waqarqa: —¡Taytáy, noqapaqpas bendiciontayá mañapuway! —ñispa.

³⁹ Chaymi taytan Isaac nirqa: Kay *f**yachanayki allpaqa manam qonqachu allin cosechatapas manataqmi kanqachu cielomanta allin parapas.

⁴⁰ Peleaspaykim kawsanki. Wawqekitataqmi servinki. Yugota pakiruq toro hinam lluptikunki. Wawqekipa munaychakuyninmantam librakunki.

Jacobpa lluptikusqanmanta

⁴¹ Jacobtam Esau cheqnirurqa paypaq bendicionta taytan mañakusqanrayku hinaspam rimapakurqa: “Taytay wañuruptinmi wawqey Jacobta wañurachisaq” nispa.

⁴² Rebecamanmi willaykurqaku piwi wawan Esaupa imam rimasqankunata chaymi sullka wawan Jacobta qayachispan nirqa: —Wawqeki Esaumi piensachkan wañurachisunaykipaq.

⁴³ Chaynaqa wawalláy, kay nisqayta kasuway: Ayqekuy Haran llaqtapi turiy Labanpa wasinman.

⁴⁴ Chaypiyá *f**yacharimuy wawqekipa piñakuynin pasanankama.

⁴⁵ Tukuy rurasqaykikunamanta wawqeki qonqaruptinñam chay llaqtamanta qayachimusqayki. Manam munanichu iskaynikichik huk punchawllapi chinkarunaykichikta —nispa.

⁴⁶ Chaymantam Isaacta Rebeca nirqa: —Amiruniñam Hetpa castan warmikunata. Sichu Jacobpas casarakurunqa paykunawan hinaptinqa ¿imaynaraq kanqa viday? —nispa.