Génesis 25 - Quechua Ayacucho Bible 1987

Yapakusqan warminpi Abrahampa churinkunamanta

¹ Abrahanmi Cetura sutiyoq warmiwan yapakururqa.

² Paymi wachakurqa Zimramta, Jocsanta, Medanta, Madianta, Isbacta hinaspa Sua sutiyoq qarita.

³ Jocsanpa churinmi karqa Sebawan Dedan. Dedanpa mirayninkunañataqmi karqa Asur runakuna, Letus runakuna hinaspa Leum runakuna.

⁴ Madianpa churinkunañataqmi karqa Efa, Efer, Hanoc, Abida hinaspa Elda. Kay llapallanmi karqaku Ceturapa mirayninkuna.

⁵ Abrahamqa lliw kapuqninkunatam Isaacman qoykurqa.

⁶ Ichaqa compañerankunapa wawankunamanmi Abraham qorqa regalokunata hinaspam kawsachkaspallaraq aviarurqa chay churinkunata. Paykunataqa aviarurqa Isaacpa ladonmantam intipa qespimunan lawman.

Abrahampa wañukusqanmantawan pampakusqanmanta

⁷ Abrahanmi kawsarqa pachak qanchis chunkan pichqayoq watata.

⁸ Chaymi Abraham allin wañukuyta wañukurqa sinchi yuyaqña hinaspam abuelonkunapa kasqanman rirqa.

⁹ Chaymi churin Isaacwan churin Ismael Macpela machaypi pamparqaku, chay machayqa karqa Het runa Zoharpa churin Efronpa chakranpim, chayqa karqa Mamre llaqtapa chimpanpim.

¹⁰ Abrahampa chay allpanqa karqa Hetpa castanmanta rantisqanmi, chaypim warmin Sarapa kasqanpi Abraham pampakurqa.

¹¹ Abraham wañuruptinmi churin Isaacta Dios bendecirqa, Isaacqa *f**yacharqa Rikuqniy Kawsaq Diospa Pozon sutiyoq lugarpa hichpanpim.

Ismaelpa mirayninkunamanta

^12-13 Sarapa sirvienten Egipto warmi Hagarmi wachakurqa Abrahampa churin Ismaelta. Ismaelpa mirayninkunam nacesqankuman hina kaykuna: Piwinmi karqa Nebaiot, sullkankunañataqmi karqa Cedar, Adbeel, Mibsam,

¹⁴ Misma, Duma, Massa,

¹⁵ Hadar, Tema, Jetur, Nafis hinaspa Cedema.

¹⁶ Kaykunamá Ismaelpa chunka iskayniyoq churinkunapa sutin, hina chay sutiwantaqmi reqsisqa karqa sapakama llaqtankupas, campamentonkupas, paykunataqmi karqa chaypi kamachikuqkunapas.

¹⁷ Ismaelmi wañukurqa pachak kimsa chunkan qanchisniyoq watanpi hinaspam abuelonkunapa kasqanman rirqa.

¹⁸ Ismaelpa mirayninkunam *f**yacharqaku Havila lawmantapuni Shur lawkama, chayqa kachkan Asiria nacionman rina Egiptopa chimpanpim. Llapallan ayllunkunapa cheqnisqan kachkaspapas chaypim *f**yacharqaku.

Jacobwan Esau nacesqanmanta

¹⁹ Kaykunam Abrahampa churin Isaacpa mirayninkuna: Abrahampa churinmi karqa Isaac.

²⁰ Isaacmi tawa chunka watanpi casarakurqa Rebecawan, Rebecaqa karqa Padan-aram lawmanta kaq Betuelpa churinmi hinaspa Aram runa Labanpa paninmi.

²¹ Isaacmi Tayta Diosta mañakurqa warmin qolluq kasqanrayku, chayta Tayta Dios uyariykuptinmi Isaacpa warmin Rebecaqa wiksayakururqa.

²² Chaymi wawankuna wiksan ukupi peleakuptin nirqa: —¿Imataq kayqa? —nispa. Chayraykum Tayta Diosta tapurqa.

²³ Chaymi Tayta Diosñataq nirqa: Iskay nacionkunam wiksaykipiqa kachkan. Iskay nacionkunataqmi wiksaykimantapuni rakinasqa kanqa. Huknin castam aswan kallpayoq kanqa. Puntata nacemuqmi sullkanta servinqa.

²⁴ Wachakunan punchaw chayaramuptinmi wiksanpiqa mellizo kasqa.

²⁵ Punta nacemuqmi kasqa puka pelosapallaña chaymi suticharqaku Esauwan.

²⁶ Qepantañataqmi wawqen nacemurqa Esaupa talonninman hapipakustin chaymi Jacobwan suticharqaku. Isaacqa soqta chunka watanpiñam karqa Rebeca wachakuptinqa.

Piwi kayninta Esau rantikusqanmanta

²⁷ Warmakunam wiñarurqaku hinaptinmi Esau karqa purun animalkuna allin hapiq hinaspa campopi puriq runa, Jacobñataqmi karqa karpallapi *f**yachaspa hawkalla kakuq runa.

²⁸ Esautam taytan Isaac masta kuyarqa purun animal hapimusqanta mikusqanrayku. Rebecañataqmi kuyarqa Jacobta.

²⁹ Huk puchawmi Jacob yanukuchkarqa lenteja picanteta. Esau campomanta pisipasqallaña kutimuspanmi

³⁰ nirqa Jacobta: —Llumpay yarqasqam kachkani. Ama hina kaspayá chay puka mikuynikita qaraykullaway —nispa. (Chayraykum Esauqa sutichasqa karqa Edonwan).

³¹ Chaymi Jacobñataq nirqa: —Qampa piwi kaynikipa derechuntam munani, rantikuruwayá —nispa.

³² Hinaptinmi Esauñataq nirqa: —Ñoqaqa wañuruchkaniñam yarqaymanta ¿Imapaqtaq serviwanqa piwi kayniyqa? —nispa.

³³ Chaymi Jacob nirqa: —Kunanpuni juramentaykuway —nispa. Chaymi Esauqa juramentaspa piwi kayninpa derechonta rantikururqa Jacobman.

³⁴ Chayraqmi Jacobqa tantatawan lenteja picanteta Esauman qoykurqa. Payñataqmi mikuykuspa, tomaykuspa pasakurqa. Chaynatam Esau piwi kayninpa derechonta despreciarurqa.