Génesis 24 - Quechua Ayacucho Bible 1987

Isaacpaq warmita maskasqankumanta

¹ Abrahanmi karqa llumpay machuña. Tayta Diosmi bendeceykurqa tukuy imakunapi.

² Abrahanmi machun kaq mayordomo sirviententa nirqa: —Kunanyá makikita churay piernaypa ukunman,

³ hinaspayá juramentaway cielokunapipas hinaspa kay pachapipas munaychakuq Tayta Diosrayku. Amam churiytaqa casarachinkichu kay *f**yachasqay Canaan allpapi kaq warmiwanqa.

⁴ Aswanqa llaqtaytam aylluykunapata rinki hinaspam churiy Isaacpaq warmita horqomunki —nispa.

⁵ Hinaptinmi chay sirvientenñataq nirqa: —Icha chay warmiqa kay allpamanqa manapas hamuyta munanqachu hinaptinqa ¿maymi lloqsimusqayki allpamanchu churikita kutichisaq? —nispa.

⁶ Chaymi Abrahamñataq nirqa: —¡Amapunim churiytaqa wakmanqa kutichinkichu!

⁷ Hanaq pachapi Tayta Diosmi taytaypa wasinmanta, aylluykunapa llaqtanmanta horqomuwarqa hinaspam juramentawarqa: “Kay allpatam miraynikikunaman qosaq” nispa. Paymi angelninta ñawpaqnikita kachanqa churiypaq warmita wakmanta pusamunaykipaq.

⁸ Warmi qanwan mana hamuyta munaptinqa librem kanki kay juramentawasqaykimanta, churiytam ichaqa ama kutichinkichu wakman —nispa.

⁹ Chaymi sirvientenqa makinta churaykurqa patronnin Abrahampa piernan ukuman hinaspam payman juramentarqa chay mañakusqanta rurananpaq.

¹⁰ Chaymi sirvienteqa patronninpa camellonkunata akllarqa chunkata hinaspam pasarqa patronninpa kapuqnninkunamanta allinnin regalokunata aparikuspan. Chaymantam chayarurqa Mesopotamia lawpi Nacorpa llaqtanman.

¹¹ Sipaskunapa yakuman lloqsimunan tardeykuq horapim llaqtapa hawa lawninpi yakuyoq pozopa ladonpi camellonkunata samachirqa.

¹² Hinaspam Diosta mañakurqa: —Patronniy Abrahampa yupaychasqan Tayta Dios, ruegakuykim patronniy Abrahanman prometisqaykiyta cumplinaykipaq. Yanapaykuwayá imamanmi hamusqay allin lloqsinanpaq.

¹³ Kay pukyupa waqtanpim kachkani, kay llaqtapi sipaskunañataqmi yakuman lloqsimuchkanku.

¹⁴ Chaynaqa ñoqam nisaq huk kaqnin sipasta: “Ama hina kaspaykiyá puyñuykita uraykachispa yakuykita tomaykachiway” nispa, hinaptinyá payñataq niwachun: “Tomaykuyá, tomaykachisaqtaqyá camelloykikunamanpas” nispa. Chaynata contestawaqniy sipasyá kachun serviqniki Isaacpaq akllasqayki warmiqa. Chaynapim yachasaq patronniyman prometisqayki cumplisqaykita —nispa.

¹⁵ Chaymi mañakuyta manaraqpas tukuchkaptin Betuelpa churin Rebeca hombronpi puyñuta aparikuspa hamuchkasqa. Nacormi karqa Betuelpa taytan, Milcañataqmi karqa maman. Nacorqa karqa Abrahampa wawqenmi.

¹⁶ Rebecaqa karqa buenamoza doncellam. Paymi pukyuman uraykuspan yakuta wisiruspa kutikuchkarqaña.

¹⁷ Hinaptinmi Abrahampa sirvienten payman kallpaykuspan nirqa: —Ruegakuykim. Puyñuykimantayá yakuchallaykita tomaykusaq —nispa.

¹⁸ Chaymi Rebecañataq nirqa: —Tomaykuyá taytáy —nispa. Utqaymanmi uraykachirqa puyñunta hinaspam hapiykuspa tomaykachirqa.

¹⁹ Tomaykachispanñataqmi nirqa: —Camelloykikunapaqwanyá yakuta horqoramusaq saksanankukama —nispa.

²⁰ Utqayllamanña puyñunmanta yakuta artesaman talliruspanmi huktawan pozoman kallparqa yaku horqoq, chaynatamá horqorqa llapallan camellonkunapaq.

²¹ Chaytam Abrahampa sirvienten qawarqa upallalla chaynapi viaje risqanpi Tayta Diospa imaynam rurasqanta yachananpaq.

²² Camellonkuna tomayta tukuruptinmi Rebecaman chay sirviente qoykurqa ancha precioyoq qorimanta areteta chaynataq ancha-ancha precioyoq qorimanta iskay brazaletekunatapas.

²³ Hinaspam nirqa: —Ruegakuykim, niykuwayá ¿pipa churintaq kanki? ¿Taytaykipa wasinpi kachkanchu campo samakunaykupaq? —nispa.

²⁴ Hinaptinmi payñataq nirqa: —Betuelpa churinmi kani, Nacorpawan Milcapa willkan.

²⁵ Kachkanmi pajaykupas achkallaña chaynataq pastoykupas, campopas kachkanmi samakunaykipaq —nispa.

²⁶ Hinaptinmi chay sirvienteqa qonqoranpa pampaman kumuykuspa Tayta Diosta adorarqa

²⁷ kaynata nispa: —Patronniy Abrahampa yupaychasqan Tayta Dios, alabaykim patronniyman prometisqayki cheqap cumplisqaykimanta hinaspa patronniypa ayllunkunapa wasinman pusamuwasqaykimanta —nispa.

²⁸ Chay sipasmi kallpaspan mamanpa wasinpi kaqkunaman kaykunata willakamurqa.

²⁹ Rebecapa turinmi karqa Laban, paymi pukyu ladonpi kaq runaman kallparqa.

³⁰ Paninpi aretetawan makinpiñataq brasaletekunata qawaykuspam chay runapa imam nimusqantawan uyariykuspan turin Laban rirqa chay runaman. Chay runaqa camellonkunawanmi pukyupa patanpi kachkasqa.

³¹ Chaymi Laban nirqa: —Tayta Diospa bendecisqan, hamuyá. ¿Imanasqataq hawallapiqa kachanki? Allicharamuniñam wasita. Camelloykikunapaqpas allicharamuniñam sitiota —nispa.

³² Hinaptinmi chay sirvienteqa rirqa wasiman, Labanñataqmi camellokunamanta cargata paskaspa uraykachirqa hinaspam pajatawan pastota qararqa. Yakutapas apamurqataqmi chay sirvientemanwan hamuqmasinkunaman chaynapi chakinkuta mayllakunankupaq.

³³ Abrahampa sirvientenman mikuyta apamuptinkum pay nirqa: —Manam mikuymanchu willakuyniy ninaykama —nispa. Hinaptinmi Laban nirqa: —Niykuwaykuyá —nispa.

³⁴ Chaymi willakurqa: —Ñoqaqa kani Abrahampa sirvientenmi.

³⁵ Patronniytam Tayta Dios sinchita bendecispan apuyarachin, Tayta Diosmi qorqa ovejakunata, vacakunata, qori-qollqeta, sirvientekunata, sirvientakunata, camellokunata chaynataq asnokunatapas.

³⁶ Patronniypa warmin Saram yuyaq kayninpiña huk wawata wachakururqa chaymi patronniyqa tukuy imantapas churinmanña qoykun.

³⁷ Chaymi patronniy juramentachiwarqa: “Kay *f**yachasqay Canaan allpapi kaq warmiwanqa amam churiytaqa casarachinkichu.

³⁸ Rinkim taytaypa castan aylluykunapata hinaspam chaymanta churiypaq warmita horqomunki” nispa.

³⁹ Chaymi nirqani patronniyta: “Icha chay warmiqa manapas hamuyta munanqachu ñoqawan” nispa.

⁴⁰ Hinaptinmi payñataq niwarqa: “Ñoqaqa kawsarqani Tayta Diospa qayllanpim, paymi kachanqa angelninta qanwan rispa yanapasunaykipaq hinaptinmi taytaypa castan aylluykunamanta churiypaq warmita horqomunki.

⁴¹ Aylluykunaman yaykuptiki mana qomusuptikiqa juramentoymantam libre kanki” nispa.

⁴² —Kunanmi pukyuman chayamuspay Tayta Diosta mañakurqani kaynata: “Patronniy Abrahampa yupaychasqan Tayta Dios, ruegakuykim imamanmi hamusqay allin lloqsinanpaq.

⁴³ Pukyupa waqtanpim kachkani. Chaynaqa huk doncellam yakuman hamunqa, paytam ñoqa nisaq: ‘Ama hina kaspaykiyá puyñuykimanta yakuykita tomaykachiway’ nispa.

⁴⁴ Payñataqyá niwachun: ‘Tomaykuyá, tomaykachisaqtaqyá camelloykikunamanpas’ nispa. Chaynata contestawaqniy sipasyá kachun patronniypa churinpaq akllasqayki warmiqa” nispa.

⁴⁵ —Mañakuyta manaraqpas tukuchkaptiymi Rebeca hombronpi puyñuyoq hamuchkasqa hinaspam pukyuman uraykurqa yakuta horqonanpaq, paytam nirqani: “Ama hina kaspayá yakuchallaykita tomaykachiway” nispa.

⁴⁶ Chaymi hombronmanta apurawman puyñunta uraykachispan niwarqa: “Tomaykuyá, tomaykachisaqtaqyá camelloykikunamanpas” nispa. Tomaykuptiymi, tomaykachirqataq camelloykunamanpas.

⁴⁷ Chaymi tapurqani: “¿Pipa churintaq kachkanki?” nispa. Hinaptinmi payñataq niwarqa: “Betuelpa churin Nacorpawan Milcapa willkanmi” nispa. Chaymi huk areteta senqanman churaykurqani churaykurqanitaqmi brazonkunamanpas brazaletekunata.

⁴⁸ Hinaspaymi qonqoranpa pampaman kumuykuspay adorarqani Tayta Diosta, patronniy Abrahampa Diosnintamá alabarqani. Paymi allinllata pusamuwarqa chaynapi patronniypa ayllunpa warmi churinta Isaacpaq horqonaypaq.

⁴⁹ Chaynaqa kunanyá niykuwaychik patronniypaq imam ruranaykichikta ¿cumplinkichikchu qowaspaykichik icha manachu? Mana chayqa niykuwaychikyá maymanpas pasakunaypaq.

⁵⁰ Chaymi Labanwan Betuel nirqaku: —Kay asuntoqa Tayta Diosmantam, manam “arí” niyta nitaq “manam” niytapas atikikumanchu.

⁵¹ Kayqaya Rebecaqa chaynaqa pusaspayá riychik. Tayta Diospa nisqanpi hinayá patronnikipa churinpa warmin kachun —nispa.

⁵² Abrahampa sirvientenmi chay nisqankuta uyariykuspan qonqoranpa pampaman kumuykurqa Tayta Diospa qayllanpi.

⁵³ Hinaspam horqomurqa qollqemanta qorimanta alhajakunatawan pachakunata hinaspam Rebecaman qoykurqa. Turinmanwan mamanmanpas qoykurqam kuyayllapaq regalokunata.

⁵⁴ Hinaspam hamuqmasinkunapiwan mikuspa tomarqaku, chay tutaqa chaypimá samarqaku. Paqarinnintinñataqmi hatarispa nirqa: —Aviawaychikñayá patronniyman kutinaypaq —nispa.

⁵⁵ Chaymi Rebecapa turinpiwan maman nirqa: —Sipasqa quedachunraqyá chunka punchawllapas chaymantañachá rinqa —nispa.

⁵⁶ Hinaptinmi chay sirvientañataq nirqa: —Amañayá harkawaychikchu kay hamusqaypi Tayta Dios allinta rurawachkaptinqa. Aviawaychikñayá patronniyman kutinaypaq —nispa.

⁵⁷ Hinaptinmi paykunañataq nirqaku: —Sipasta qayaspayá tapusun —nispa.

⁵⁸ Chaymi qayaspanku nirqaku: —¿Rinkichu kay runawan? —nispa. Hinaptinmi Rebecañataq nirqa: —Arí, risaqmi —nispa.

⁵⁹ Chaymi aviarqaku Rebecatawan wawa kaptin uywaqninta, aviarqakutaqmi Abrahampa sirviententapas riqmasinkunatawan.

⁶⁰ Rebecapaq Diospa bendecionninta mañakuspam nirqaku: Panillayku, wara-waranqa runakunayá qanmanta mirachunku. Miraynikikunayá enemigonkuta vencechunku.

⁶¹ Chaymantam Rebecaqa sirvientan sipaskunapiwan camellokunaman sillakuspa Abrahampa sirvientenwan pasarqaku. Chaynapimá Abrahampa sirvientenqa ripukurqa Rebecata pusarikuspan.

⁶² Isaacmi kutiramurqa Rikuqniy Kawsaq Diospa Pozon nisqanku lawmanta hinaspam chayamurqa *f**yachasqan Neguev lawman.

⁶³ Isaacmi lloqsirqa campota tardeykuq horataña pasearikuq chaymi qawariptin camellokuna hamuchkasqa.

⁶⁴ Rebecapas rikururqam Isaacta hinaspam camellomanta uraykuspan

⁶⁵ chay sirvienteta tapurqa: —¿Pitaq ñoqanchik lawman hamuq wak runaqa? —nispa. Hinaptinmi chay sirvienteñataq nirqa: —Paymi patronniy —nispa. Chaymi Rebecaqa hatun telanwan tapakuykurqa.

⁶⁶ Chay sirvientem willakurqa Isaacman tukuy ima ruramusqanta.

⁶⁷ Chaymantam Isaacqa maman Sarapa karpanman Rebecata pusarqa hinaspam casarakurqa. Rebecata kuyaspanmi consuelakurqa mamanpa wañukusqanmanta.