Génesis 23 - Quechua Ayacucho Bible 1987

Sarapa wañukusqanmantawan pampakusqanmanta

¹ Pachak iskay chunkan qanchisniyoq watata Sara kawsaruspam

² wañukurqa Quiriat-arba llaqtapi, chaypa huknin sutinqa Hebronmi. Chayqa kachkan Canaan allpapim, chaymi Abraham rirqa Saramanta llakikuspa waqaq.

³ Chaymi Abraham warminpa ayanta dejaykuspa rirqa Hetpa castankunawan rimaq:

⁴ —Forasterom kani qamkuna ukupi. Rantikuwaychik allpata sepulturapaq chaypi warmiyta pampanaypaq —nispa.

⁵ Hetpa mirayninkunañataqmi payta nirqaku:

⁶ —Señorniyku, uyariykuwayku: qamqa kanki Diospa akllasqan kamachikuqmi, allinnin sepulturapiyá pampay señoraykitaqa, pampanaykitaqa manam mayqanniykupas michakusqaykikuchu —nispa.

⁷ Hinaptinmi Abraham hatariykuspa Het casta runakunapa qayllanpi kumuykuspan

⁸ nirqa: —Sichu munankichik warmiypa ayan pampanayta hinaspaqa uyariykuspayá rimapayaykaysiwaychik Zoharpa churin Efronta

⁹ chaynapi chakranpi kaq Macpela sutiyoq machayta rantikuwananpaq. Allin preciotam pagasaq chawpikichikpi pampakunayku sitio kananpaq —nispa.

¹⁰ Efronqa Hetpa castankunawanmi huñunakuypi tiyachkarqa. Llaqtapa zaguan punkunta llapallan yaykuqkuna uyarichkaptinkum Hetpa mirayninkunapa qayllanpi. Abrahamta Efron contestarqa:

¹¹ —Manam, qollqepaqraqchu qoyki señorniy. Qoyllam-qoykuyki chakrataqa, qoykitaqmi chaypi kaq machaytapas, llaqtaypi kaqkunapa qawasqantam qoyki, chaynaqa pampamuyá ayallaykitaqa —nispa.

¹² Hinaptinmi Abraham chay allpapi runakunapa ñawpaqninpi huktawan kumuykurqa.

¹³ Hinaspam chay allpapi kaq runakunapa qayllanpi Efronta nirqa: —Ruegakuykim uyariykuwanaykipaq. Chay chakrapa preciontaqa chaskiykuwayá chaynapi warmiypa ayanta pamparamunaypaq —nispa.

¹⁴ Chaymi Abrahamta Efronñataq nirqa:

¹⁵ —Señorniy uyariykuway. Tawa kilo parten qollqem cuestan kay allpaqa, ñoqanchikpiqa ¿mayna achkamá chayqa? Warmikipa ayantaqa pampamuyá —nispa.

¹⁶ Chaymi Abraham “anri” nirqa Efrompa nisqanta. Rimanakusqankuman hinamá Hetpa castankuna uyarichkaptin Abraham pesarqa tawa kilo parten qollqeta imaynam negociantekunapa pagananku precioman hina.

¹⁷ Chaymi Abrahampaña karqa Mamrepa chimpan Macpela lawpi kaq Efrompa kasqan chakraqa, paypañataqmi karqa chaypi kaq machaypas hinaspa chakra ukupi kaq sachakunapas.

¹⁸ Hetpa castankuna chaynataq llaqtapa zaguan punkun lliw yaykuqkuna qawachkaptinkum Abraham dueñoña karqa.

¹⁹ Kaykunata allicharuspanmi Abraham warmin Sarapa ayanta pamparqa Mamrepa chimpan Macpela machaypi, chay Mamre llaqtapa huknin sutinmi karqa Hebron. Chayqa kachkan Canaan allpapim.

²⁰ Chaynapim Hetpa castankunamanta rantisqan chakrawan machaypas Abrahampaña karqa pampakunankupaq.