Génesis 22 - Quechua Ayacucho Bible 1987

Isaacta wañuchispa Abraham kañay munasqanmanta

¹ Kaykuna pasaruptinmi Abrahamta Dios pruebaspam nirqa: —Abraham —nispa. Hinaptinmi payñataq nirqa: —Niwayá —nispa.

² Chaymi Dios nirqa: —Sapallan kuyasqayki churiki Isaacta pusaspa riy Moria lawman hinaspa wañuchispa kañasqa ofrendata ofrecemuway ñoqapa nisqay kaq moqopi —nispa.

³ Chaymi Abraham tutapayta hatarispa asnota caronarqa hinaspam iskay sirvientenkunata pusarikuspa rirqa churin Isaacpiwan. Chitqarqataqmi yantatapas churinta wañuchispa kañananpaq hinaspam rirqaku Diospa nisqan lugarman.

⁴ Kimsa punchawninmanmi karullamantaraq Abraham rikururqa chay lugarta.

⁵ Hinaptinmi sirvientenkunata Abraham nirqa: —Suyawachkaychik kaypi asnontin, warmawan rispaymi Diosta adoraramusaqku hinaspañam kutimusaqku —nispa.

⁶ Wañuchispa kañananpaq yantatam churin Isaacta qepichirqa, aparqataqmi ninatawan cuchillotapas, paykunaqa kuskam rirqaku.

⁷ Chaymi taytan Abrahamta Isaac nirqa: —Taytáy —nispa. Chaymi payñataq nirqa: —Niwayá —nispa. Chaymi Isaac nirqa: —Kaypim kachkan yantapiwan nina. ¿Maypitaq kachkan wañuchispa kañanapaq carneroqa? —nispa.

⁸ Abrahamñataqmi nirqa: —Kikin Diosmi churamunqa wañuchispa kañanapaq carnerotaqa, churilláy —nispan. Hinaspam kuskanku rirqaku.

⁹ Diospa nisqan lugarman chayaruptinkum Abraham rurarqa altarta hinaspam churarqa yantata. Churintapas chaknaruspami altarpi yantapa hawanman churarqa.

¹⁰ Chaymantam Abrahamqa cuchillota hapirqa churinta kuchunanpaq.

¹¹ Hinaptinmi Tayta Diospa angelnin cielomanta qayamurqa: —Abraham, Abraham —nispa. Hinaptinmi payñataq nirqa: —Niwayá —nispa.

¹² Chaymi angelñataq nirqa: —Ama imanaychu warmata, ñam yachaniña Dios manchakusqaykita, chullalla churikitapas ofrecewanaykipaqmi mana harkakuwarqankichu —nispa.

¹³ Chaymi Abraham qawariykuspan rikururqa huk carnerota waqranmanta chaprapi arwikusqata. Chaymi Abraham carnerota hapirurqa hinaspam wañurachispan kañarqa churinpa rantinpi.

¹⁴ Abrahanmi suticharqa chay lugarta “Tayta Diosmi Churamunqa” niq sutiwan. Chayraykum kay libro qellqasqa kasqan tiempokama niqku: “Tayta Diospa orqonpim churamusqa kanqa” nispa.

¹⁵ Tayta Diospa angelnin cielomanta yapatawan qayamuspam Abrahamta nirqa:

¹⁶ —Tayta Diosmi nisunki: “Sapallan churikitapas ofrecewanaykipaq mana harkakusqaykiraykum kikiyrayku juramentani.

¹⁷ Anchallataña bendecispaymi mirachisqayki lucerokunata hinaspa lamar qochapa patanpi aqota hinaña, chaymi miraynikikuna enemigonkunata vencenqa.

¹⁸ Kasuwasqaykiraykum kay pachapi lliw runakuna miraynikirayku bendecisqa kanqa” nispa.

¹⁹ Chaymi Abraham kutirqa sirvientenkunapa kasqanman. Chaymantam kutirqaku Beerseba llaqtaman, chaypim Abraham *f**yacharqa.

Nacorpa churinkunamanta

²⁰ Kaykuna pasaruptinmi Abrahanman willarqaku: —Milcapas wachakurunmi wawqeki Nacorpa churinkunata,

²¹ piwinpa sutinmi Huz, qatiqninñataqmi wawqen Buz, hukninñataqmi Haranpa taytan Kemuel,

²² wakinpa sutinñataqmi Quesed, Hazo, Pildas, Jidlaf hinaspa Betuel —nispa.

²³ Betuelpa churinmi karqa Rebeca. Chay pusaqnintintam Milca wachakurqa Abrahampa wawqen Nacorpata.

²⁴ Reuma sutiyoq Nacorpa churi-wachanñataqmi wachakurqa Tebasta, Gahamta, Tahasta hinaspa Maacata.