Génesis 21 - Quechua Ayacucho Bible 1987

Abrahampa churin Isaac nacesqanmanta

¹ Saraman prometikusqantam Tayta Dios cumplirqa hinaspam nisqanman hina Sarawan rurarqa.

² Chaymi Sara wiksayakuruspan Diospa nisqan tiempopi wachakurqa Abrahampa machuyayninpiña churinta.

³ Hinaptinmi Abraham churinta suticharqa Isaacwan. Paytam wachakurqa Sara.

⁴ Chaymi Abraham Diospa kamachisqanman hina churin Isaacta pusaq punchawninpi señalarqa.

⁵ Churin Isaac naceptinmi Abraham pachak watayoq karqa.

⁶ Chaymi Sara nirqa: —Diosmi asirachiwarqa, pipas chayta yacharuqqa ñoqamantachá asikunqa.

⁷ ¿Piraq Abrahamta ninman karqa churinta ñoqa ñuñunaypaq? Ichaqa wachakurunim qosay machuña kachkaptinpas —nispa.

Agarwan wawan Ismael qarqosqa kasqankumanta

⁸ Wawa Isaac hatunyaruptinmi anukarqaku, chay punchawmi Abraham hatun convidota rurarqa.

⁹ Hinaptinmi Sara qawarqa Isaacmanta Agarpa wawan Ismael burlakusqanta, Ismaelqa karqa Abrahampa churintaqmi Egipto nacionniyoq Agar sutiyoq warmipi.

¹⁰ Chayraykum Abrahamta Sara nirqa: —Qarqoy kay sirvientata wawantinta, kay sirvientapa wawanqa manam herenciataqa chaskinmanchu waway Isaac hinaqa —nispa.

¹¹ Chay nisqanwanmi Abraham llumpayta llakikurqa churin Ismaelrayku.

¹² Chaymi Dios nirqa Abrahamta: —Amayá llakikuychu warmamantaqa nitaq sirvientaykimantapas. Sarapa tukuy nisusqaykita ruray. Cheqap castaykiwan sutichasqaqa kanqa Isaacllamantam.

¹³ Sirvientapa wawanmantapas nacion kananpaqmi mirachisaq churiki kasqanrayku —nispa.

¹⁴ Chaymi Abraham tutapaylla hatariruspan mikuyta qoqawcharqa huk odrepi yakutawan hinaspam Agartawan warmata aviarurqa. Ripukuspanmá Agarqa purillarqa Beer-seba chunniqpi mana maymanpas chayaykunanpaq kaptin.

¹⁵ Chaymi odrepi yaku tukuruptin warmata saqerurqa sachapa llantuyninpi.

¹⁶ Chaymanta pasaspam karuneq chimpanpi tiyaykurqa: —Waway wañuqtaqa amayá qawasaqchu —nispa. Chaymantam qaparispan waqallarqa.

¹⁷ Diosmi warmapa qaparisqanta uyarirqa. Diospa angelninñataqmi cielomanta qayamuspan Agarta nirqa: —¿Imanantaq Agar? Ama manchakuychu, warmapa qayakuynintam Dios uyarirun.

¹⁸ Hatariy, asuykuspayki warmata hatarichiy hinaspa aysay, paypa mirayninmantam hatun nacionta rurasaq —nispa.

¹⁹ Chaymantam qawariykachirqa huk pozota chaymi chayman rispan odreman yakuta huntarqa hinaspam warmaman tomachirqa.

²⁰ Chaymi warmata Dios yanaparqa. Wiñaruspanmi *f**yacharqa chunneqpi hinaspam flecha manejaq karqa.

²¹ Paymi Paran sutiyoq chunneqpi yacharqa, chaymantam Egipto nacionniyoq warmiwan maman casarachirqa.

Abrahanwan Abimelec contrato rurasqankumanta

²² Chay tiempopim Abimelec tropanpa capitannin Ficolpiwan Abrahamta nirqaku: —Diosmi tukuy ruraynikipi qanwan kachkan.

²³ Kunanyá juramentawayku Diosrayku chaynapi ñoqatapas churiykunatapas chaynataq willkaykunatapas ama engañawanaykikupaq. Ichaqa contrato rurasqanchikman hinayá ruray imaynam ñoqapas qanwan rurasqayman hina, hina chaynallatayá ruray forastero hina kay *f**yachasqayki allpapi runakunatapas —nispa.

²⁴ Chaymi Abrahamñataq nirqa: —Arí, juramentaykim —nispa.

²⁵ Abrahanmi Abimelecta anyarqa huk pozo yakuta Abimelecpa sirvientenkuna qechurusqanmanta.

²⁶ Chaymi Abimelecñataq nirqa: —Manam yachanichu pim chay rurarusqantaqa, qampas chaytaqa manam willawarqankichu, manamá chaytaqa kunankamapas uyarirqanichu —nispa.

²⁷ Hinaptinmi Abraham ovejakunata, vacakunata hapispan Abimelecman qoykurqa chaymi iskayninku contratota rurarqaku.

²⁸ Hinaspam Abraham kanchanmanta qanchis malta ovejakunata rakirqa.

²⁹ Chaymi Abrahamta Abimelec nirqa: —kay qanchis ovejakuna sapaqchasqaykiqa ¿imaninantaq? —nispa.

³⁰ Hinaptinmi Abrahamñataq nirqa: —Kay chaskiwasqayki qanchis ovejakunam kanqa testigo kay pozoqa ñoqapa uchkusqay kasqanmanta —nispa.

³¹ Chaymi chay lugarta suticharqa Beersebawan chaypi juramentota iskayninku rurasqankurayku.

³² Chay contratota Beerseba llaqtapi ruraruspam Abimelecqa capitannin Ficolpiwan kutikurqaku Filistea nacionman.

³³ Chaymi Abraham Beerseba llaqtapi plantarqa tamarisco sachata hinaspam chaypi mañakurqa wiñaypaq kawsaq Tayta Diosta.

³⁴ Abrahamqa Filistea nacionpim unay wata *f**yacharqa.