Génesis 20 - Quechua Ayacucho Bible 1987

Abrahanmantawan Abimelecmanta

¹ Chay lugarmantam Abraham Neguev lawman rirqa hinaspam *f**yacharqa Gerar llaqtapi, chayqa tarikun Cades llaqtamanta Shur lawman riq nanpim.

² Chaypi kaspanmi Abraham warmin Saramanta nirqa: “Paniymi” nispan. Hinaptinmi Gerar llaqtapi rey Abimelec Sarata pusachimurqa paywan casarakunanpaq.

³ Ichaqa tutanmi mosqoyninpi Dios rikuriykuspan Abimelecta nirqa: —Kunanqa wañunkim, kay warmi pusachimusqaykiqa qosayoqmi —nispa.

⁴ Ichaqa Abimelecmi manaraq Sarawan puñusqanrayku nirqa: —Señorniy, ¿mana huchallikuq runatapas wañuchinkichum?

⁵ Kikin Abrahanmi niwarqa: “Paniymi”, nispa, Sarapas niwarqataqmi: “turiymi” nispa, allin sonqoywanmi kaytaqa rurarqani, manam llullaytachu —nispa.

⁶ Hinaptinmi chay mosqoyninpi Dios nirqa: —Yachanim allin sonqoykiwan rurasqaykita chaymi harkaykurqayki contraypi huchallikunaykimanta. Chayraykum mana permitirqanichu pay llachpanaykita.

⁷ Kunanyá chay warmita qosan Abrahanman kutichipuy, payqa ñoqamanta willakuqmi, mañapusunkim mana wañunaykipaq. Aswanqa mana kutichispaykiqa wañurunkipunim llapallan runaykikunapiwan —nispa.

⁸ Chaymi Abimelec hatarirqa paqarinnintin tutapayta hinaspam llapallan serviqninkunata qayachispan nirqa Diospa tukuy nisqanta chaymi runakuna mancharikururqaku sinchillataña.

⁹ Chaymantam Abrahamta Abilemec qayachispa nirqa: —¿Imatataq kayta ruraruwankiku? ¿Imapitaq ñoqaqa huchallikurqayki ñoqatawan runaykunata llumpa-llumpayta huchallichiwanaykikupaqqa? Mana ruranaykitam kaytaqa ruraruwankiku.

¹⁰ ¿Imatataq piensarqanki kayta ruranaykipaqa? —nispa.

¹¹ Hinaptinmi Abrahamñataq nirqa: —Piensarqanim: “Kaypiqa manam Diosta manchakunkuchu, chaychá wañurachiwanqaku warmiyrayku” nispay.

¹² Cheqaptapunipas payqa taytaymanta paniymi ichaqa manam mamaypa wawanchu, chayraykum paywan casarakurqani.

¹³ Diosmi horqomuwarqa taytaypa wasinmanta forasterota hina chaymi warmiyta nirqani: “Ama hina kaspaykim turichakuwanki may lugarman chayaptinchikpas” nispay.

¹⁴ Abrahanmanmi Abimelec akllaykuspa qoykurqa ovejakunata, vacakunata, sirvientakunata, sirvientekunata, kutichipurqataqmi warmin Saratapas.

¹⁵ Chaymantam Abrahamta Abimelec nirqa: —Kay qawasqayki allpapipas munasqaykipiyá *f**yachakuy —nispa.

¹⁶ Saratapas nirqataqmi: —Kunanmi chunka hukniyoq kilo parten qollqeta turikiman qoni, kaymi kanqa llapallan qanwan kaqkunapi chaynataq lliwpa qayllanpi honorniki defiendesqa kananpaq chaynapim inocente kanki —nispa.

¹⁷ Diosta Abraham mañakuptinmi sanoyachirqa Abimelecta, warminta hinaspa sirvientankunata, hinaptinmi chayraq wachakurqaku.

¹⁸ Abrahampa warmin Sararaykum Abimelecpa wasinpi llapa warmipa madrenta Tayta Dios wichqarurqa.