Génesis 2 - Quechua Ayacucho Bible 1987

¹ Cielokunam kay pachapiwan ruray tukusqa karqa chaypi tukuy ima kaqkunapiwan.

² Chaymi qanchis kaq punchawpi Dios nirqa: —Rurasqaykunaqa tukusqañam —nispa. Chaymi qanchis kaq punchawpi samarqa.

³ Diosmi qanchis kaq punchawta bendecirqa hinaspam kikinpa punchawninpaq sapaqcharqa, chay punchawtaqa sapaqcharqa llapa imatapas unancharuspa samasqanraykum.

⁴ Chaynatamá chay punchawkunapi Dios unancharqa cielokunatawan kay pachata. Kay pachatawan cielokunata Tayta Dios unanchayta qallarichkaptinmi

Eden Huertapi Adanta Dios churasqanmanta

⁵ llapa plantapas kay pachapiqa manaraq karqachu, qorakunapas manaraqtaqmi paqarimurqachu, Tayta Diosqa manaraqmi parachimurqaraqchu nitaqmi runapas karqaraqchu llamkananpaq.

⁶ Ichaqa allpamantam yaku toqyarqa lliw allpata parqonanpaq.

⁷ Tayta Diosmi runata rurarqa ñutu allpamanta, senqanman kawsachiq samayta pukuykuptinmi kawsaq runaña karurqa.

⁸ Tayta Diosmi intipa qespimunan law Edenpi huertata rurarqa. Chaymanmi rurasqan runata churarqa.

⁹ Tayta Diosmi wiñachirqa sachakunata mikunapaq sumaqllaña ruruyoqta, wiñachirqataqmi huertapa chawpinpi kawsay qokuq sachatapas chaynataq allin kaqta hinaspa mana allin kaqta yachanapaq sachatapas.

¹⁰ Huerta parqonanpaqmi Edenmanta mayu lloqsimurqa hinaspam chaymanta rakikurqa tawa pallqaman.

¹¹ Huknin pallqaq mayupa sutinmi karqa Pison, chay mayum tukuy Havila law allpata muyumun, chaypim kan qori.

¹² Chay allpapi qoriqa sumaqllañam. Chaypiqa kantaqmi miski asnaq horqonanku sachapas chaynataq alhaja rumipas.

¹³ Iskay kaq mayupa sutinñataqmi Gihon, chay mayum tukuy Cus law allpata muyumun.

¹⁴ Kimsa kaq mayupa sutinñataqmi Tigris, chay mayuqa Asiria nacionmantam richkan intipa qespimunan lawman. Tawa kaq mayupa sutinñataqmi Eufrates.

¹⁵ Tayta Diosmi runata churarqa Eden Huertaman chaypi llamkananpaq hinaspa waqaychananpaq.

¹⁶ Runatam Tayta Dios kamachirqa: —Huertapi llapallan sachapa ruruntaqa mikunkim.

¹⁷ Allin kaqta hinaspa mana allin kaqta yachanapaq sachapa ruruntam ichaqa ama mikunkichu, chayta mikuruspaykiqa cheqaptapunim wañurunki —nispa.

¹⁸ Chaymantam Tayta Dios nirqa: —Manam allinchu qaripa sapallan kayninqa, yanapaqnintayá payman rikchakuqta rurasaq —nispa.

¹⁹ Tayta Diosmá purunpi tukuy animalkunata chaynataq alton pawaqkunata allpamanta rurarqa hinaspam runaman pusamurqa sutichananpaq. Runapa suti churasqanmi llapallan kawsaq animalkunapa sutinqa.

²⁰ Churarqamá sutinta llapallan uywa animalkunamanpas, alton pawaqkunamanpas chaynataq purunpi animalkunamanpas. Adanpaqmi ichaqa mana tarikurqachu payman rikchakuq yanapaqnin.

²¹ Chaymi runaman Tayta Dios qoykurqa sinchi puñuyta. Puñunankamam huknin costillanta horqoruspa aychanta kaqlla wichqaykurqa.

²² Tayta Diosmi qaripa costillan horqosqanmanta warmita rurarqa hinaspam qariman pusamurqa.

²³ Hinaptinmi Adan nirqa: Payqa tulluymanta hinaspa aychaymanta kaqmi. Paypaqa warmim sutin kanqa qarimanta rurasqa kasqanrayku.

²⁴ Chayraykum qariqa Tayta-mamanta saqespa hukllawakunqa warminmanña chaymi iskayninku huk runa hinallaña kanqaku.

²⁵ Warmipas qaripas mana pachayoq kachkaspapas manam penqakurqakuchu.