Génesis 19 - Quechua Ayacucho Bible 1987

Sodoma, Gomorra llaqtakuna puchukachisqanmanta

¹ Chayarurqakumá tardeykuqtaña iskaynin angelkuna Sodoma llaqtaman. Sodoma llaqtapa zaguanninpim Lot tiyachkarqa, Lot rikuruspanmi rirqa paykuna chaskiq hinaspam pampaman kumukuykuspan

² nirqa: —Señorkuna, ruegakuykichikmi kay serviqnikichikpa wasiyman rispa samakunaykichikpaq hinaspa chakikichiktapas mayllakuykunaykichikpaq, hinaspañachiki achikyaqtaña pasakunkichik —nispa. Chaymi paykunañataq nirqa: —Manam, hawa plazallapim kunan tutaqa samasaqku —nispa.

³ Ichaqa paykunata llumpayta Lot ruegaptinmi paywan rirqaku wasinman, chaypim Lot prepararqa cenaytawan mana qonchuyoq tantata hinaptinmi mikurqaku.

⁴ Manaraq camaman ustuchkaptinkum Sodoma llaqtapi lliw runakuna mozokunapas machukunapas muyururqaku Lotpa wasinta.

⁵ Chaymi Lotta qayaykacharqaku: —Kunan tuta hamusuqniki runakunaqa ¿maytaq? Horqomuy kunan tuta abusanaykupaq —nispa.

⁶ Chaymi Lot lloqsimurqa punkuman paykunawan rimaq, punkuta wichqaruspanmi

⁷ nirqa: —Llaqtamasillaykuna, amayá chay mana allintaqa ruraychikchu.

⁸ Iskay doncella warmi churiykunam kachkan, paykunata hawaman horqoramuptiyá munasqaykichikta ruraychik. Kay runakunatayá ichaqa ama imatapas ruraychikchu wasiypi samakusqanrayku —nispa.

⁹ Hinaptinmi chay runakunañataq nirqaku: —Suchuy kaymanta, qamqa kaymanqa forasterom hamurqanki ¿kunanñataqchum juezña rikurirunki? Kunanmi rurasqaykiku paykunamantapas aswan peortaraq —nispa. Chaymi tukuy kallpankuwan Lotta tanqarqaku hinaspam asuykurqaku punkuta pakinankupaq.

¹⁰ Hinaptinmi chay samakuqkuna Lotta aysaykurqaku wasi ukuman hinaspam punkuta wichqakururqaku.

¹¹ Hawapi llapa runakunatañataqmi ñawsayarachirqaku llapallankuta hinaptinmi paykuna manaña ima rurakuyta atistin punkuta maskarqaku.

¹² Chaymi chay samakuq runakuna nirqaku Lotta: —¿Kaypi kanraqchu aylluykikuna, masaykikuna, qari churikikuna hinaspa warmi churikikuna? Sichu kaptinqa llapallanta horqoy kay llaqtamanta.

¹³ Kay lugartaqa puchukachisaqkum. Paykunapa mana allin ruraynintam llumpaytaña Tayta Dios yacharun chaymi Tayta Dios kachamuwanku puchukachinaykupaq —nispa.

¹⁴ Chaymi Lot lloqsirqa warmi churinkuna casaray munaqkunata rimapayaq: —Chaylla lloqsiychik kay lugarmanta, Tayta Diosmi kay llaqtata puchukachinqa —nispa. Aswanqa masanpaq kaq runakunaqa burlapaq hinam hapirqaku.

¹⁵ Achikyaykuchkaptinñam angelkuna Lotta apurarqaku: —Lloqsispayki warmikita pusay, kaypi kaq iskaynin warmi churikikunatawan chaynapi kay llaqtapa castigonwan mana puchukanaykipaq —nispa.

¹⁶ Lot mana apuraptinmi Tayta Diospa kuyapayakuyninman hina chay iskaynin runakuna Lotta, warminta hinaspa iskaynin warmi churinkunata makinmanta aysarqa llaqtapa hawa lawninman.

¹⁷ Chaymi paykunata hawaman horqoramuspaña huknin angel nirqa: —Vidaykirayku lluptiy. Amam qepaykita qawarikamunkichu nitaqmi kay tukuy pampapiqa sayayllapas-sayaykunkichu, lluptiy orqoman ama puchukanaykipaq —nispa.

¹⁸ Chaymi Lot nirqa: —Señorniykuna, amayá chaynachu kachun, ruegakuykichikmi.

¹⁹ Kay runallaykitam favoreceykuwanki, hatun kuyapayakuynikiwantaqmi vidayta salvaykuwanki, orqoman ayqeytaqa manam atiymanchu, qonqaytachá imapas pasawaptin wañuruyman.

²⁰ Waqaya wak llaqtachaqa hichpallapi kachkan, wakmanyá lluptikusaq hinaspaqa manam wañusaqchu ¿Manachu wakqa taksalla? —nispa.

²¹ Chaymi huk kaqnin nirqa: —Kay mañakusqaykitapas chaskikim chaymi wak niwasqayki llaqtachatapas mana puchukachisaqchu.

²² Apurawman lluptiy wakman, manam imatapas rurasaqchu chayanaykikama —nispa. Chayraykum chay llaqtachapa sutin karqa Zoar.

²³ Zoar llaqtachaman Lot chayaruptinñam inti qespiramurqa.

²⁴ Chaymi Tayta Dios cielomanta azufretawan ninata parachimurqa Sodoma, Gomorra llaqtakunaman.

²⁵ Hinaptinmi chay pampapi llaqtantin llapallan *f**yachaq runakunata llapallan wiñaqkunatawan puchukarachirqa.

²⁶ Chaymi Lotpa qepanta hamuq warmin qepaman qawariruspan suytu kachiman tikrakururqa.

²⁷ Paqarinnintin tutapaytañataqmi Tayta Dioswan rimasqanku sitioman Abraham rirqa.

²⁸ Chaymi Sodoma, Gomorra llaqtakuna lawta chaynataq lliw pampata qawariptin hornomanta hinaña qosnirichkasqa.

²⁹ Tukuy pampapi llapallan llaqtakunata puchukarachispanmi Abrahamtaqa Dios mana qonqarurqachu, salvarqataqmi Lottapas *f**yachasqan llaqtapi puchukarunanmanta.

Moab hinaspa Amon runakunapa qallarisqanmanta

³⁰ Lotmi Zoar llaqtachapi *f**yachayta manchakuspan rirqa orqoman. Chaypim machaypi yacharqa iskaynin warmi churinkunapiwan.

³¹ Chaymi mayor kaq churin nirqa sullkanta: —Papanchikqa machuñam, kay lawpiqa runakunapa costumbrenman hina ñoqanchikwan kasarakunanpaqqa manam kanchu qari.

³² Chaynaqa papanchikman vinota tomarachispayá paywan puñurusunchik chaynapi paypa miraynin mana tukunanpaq —nispa.

³³ Chay tutam taytankuman tomarachirqaku vinota chaymi mayor kaq puñururqa taytanwan. Aswanqa taytanqa manam musyakurqachu puñunanpaq churin ustuykusqantaqa nitaq hatarisqantapas.

³⁴ Paqarinnintinñataqmi sullkanta mayor kaq nirqa: —Chisi tutam papanchikwan puñururqani, kunan tutapas vinotayá tomarachisun paywan qamñataq puñunaykipaq chaynapi taytanchikpa miraynin mana tukunanpaq —nispa.

³⁵ Chaynapimá chay tutapas taytankuman vinota tomarachirqaku chaymi sullkan kaq paywan puñururqa aswanqa taytanqa manam musyakurqachu puñunanpaq churin ustuykusqantaqa nitaq hatarisqantapas.

³⁶ Chaymi Lotpa iskaynin churinkuna taytankupata wiksayakururqaku.

³⁷ Mayor kaq churinmi wachakururqa wawanta hinaspam Moabwan suticharqa, paypa castanmi Moab runakuna kay libro qellqasqa kasqan tiempokama.

³⁸ Sullkanpas wachakuruspanmi wawanta suticharqa Ben-amiwan, paypa castanmi Amon runakuna kay libro qellqasqa kasqan tiempokama.