Génesis 18 - Quechua Ayacucho Bible 1987

Abraham churiyoq kananpaq Diospa prometesqanmanta

¹ Mamre sutiyoq runapa encina sachankunapa kasqanpi rupayllaña kaptinmi Abraham karpanpa punkunpi tiyachkarqa, chaypim Tayta Dios payman rikuriykurqa.

² Abrahanmi rikururqa chimpanpi sayachkaq kimsa runakunata hinaspam chaskinanpaq karpanpa punkunmanta kallparqa chaymi qonqoranpa pampaman kumuykuspan

³ nirqa: —Taytáy, ama hina kaspayá suyaykuwayraq.

⁴ Yakuta aparachimuptiyá chakikichikta mayllakuykuychik hinaspayá samariychik sachapa llantuyninpi.

⁵ Mikuytayá aparamusaq mikuykuspa kallpanchakuykunaykichikpaq, chaymantañachiki pasakunkichikqa, chaychiki chayaykamuwarqankichik serviqnikichikpa kasqaymanqa —nispa. Hinaptinmi paykunañataq nirqaku: —Nisqaykiman hinayá ruray —nispanku.

⁶ Chaymi Sarapa kasqan karpaman Abraham kallpaspan nirqa: —Apurawman chapuy iskay chunka kilo harinata hinaspa ruray tortillakunata —nispa.

⁷ Chaymi vacakunapa kasqanman Abraham kallparqa hinaspam huknin allin wira malta torota hapispan qoykurqa sirvientenman chaymi payñataq utqayllamanña nakaspa preparamurqa.

⁸ Hinaspam quesillotawan lecheta apamurqa preparasqan malta toropa aychantawan hinaspam paykunapa ñawpaqninman churaykurqa. Abraham ladonkupi sayaykuptinmi paykuna mikurqaku sachapa llantuyninpi.

⁹ Chaymantam Abrahamta tapurqaku: —¿Maypitaq kachkan warmiki Sara? —nispa. Chaymi payñataq nirqa: —Wak karpapim —nispa.

¹⁰ Chaymi Tayta Dios nirqa: —Watamanmi kunan hinatapuni kutimusaq hinaptinmi warmiki Sarapas wawayoqña kanqa —nispa. Sarañataqmi Abrahanpa qepanpi kaq karpapa punkunmanta uyarimuchkarqa.

¹¹ Abrahanwan Saraqa llumpay yuyaqñam karqaku. Sarapa killanpas manañam hamuqchu.

¹² Chaymi Saraqa sonqollanpi asikuspan nirqa: —¿Señorniypas chaynataq ñoqapas yuyaqña kachkaspachum wawayoq kaspay kusisqa kayman? —nispa.

¹³ Chaymi Abrahamta Tayta Dios nirqa: —¿Imanasqataq Saraqa asikurqa “¿Cheqaptachu wachakuymanraq yuyaqña kachkaspay?” nispa?

¹⁴ ¿Kanmanchu ñoqapaq imapas sasa? Watamanmi kunan hinatapuni nisqay tiempopi watukamusqayki chaymi Saraqa wawayoqña kanqa —nispa.

¹⁵ Chaymi Sara manchakuspan llullakurqa: —Manam asikurqanichu —nispa. Tayta Diosñataqmi nirqa: —Cheqaptapunim asikurqanki —nispa.

Sodoma llaqtapa favorninpi Abraham mañakusqanmanta

¹⁶ Chay runakuna chay sitiomanta rispankum qawarqaku Sodoma lawta. Abrahamñataqmi paykunata compañarqa despedikamunanpaq.

¹⁷ Chaymi Tayta Dios piensarqa: —Manam pakaymanchu Abrahanmanqa imam ruranaytaqa.

¹⁸ Abrahampa castankunaqa ancha hatun nacionmi kanqa, payraykum llapallan nacionkunata bendecisaq.

¹⁹ Abrahamtaqa akllarqani churinkunatapas hinaspa mirayninkunatapas kamachinanpaqmi chaynapi munasqayman hina allin kaqta ruraptinku Abrahanman nisqaykuna cumplikunanpaq —nispa.

²⁰ Chaymi Tayta Dios nirqa: —Sodoma llaqtapi hinaspa Gomorra llaqtapi runakunapa mana allin rurasqanwan huchallikusqankum llumpayña kachkan.

²¹ Chaynaqa rispayá qawamusaq ñoqaman niwasqankupi hinachus rurayninku kasqanmanta, chaynapim yachamusaq —nispa.

²² Hinaptinmi kimsankumanta iskay runakuna chay sitiomanta rakikuykuspanku rirqaku Sodoma lawman, Abrahamñataqmi Tayta Dioswan qeparurqa.

²³ Chaymi payman asuykuspa Abraham tapurqa: —¿Puchukarachinkichu allin ruraq runakunatapas mana allin runakunatawan kuskata?

²⁴ Pichqa chunka allin ruraq runakuna wak llaqtakunapi kaptinpas ¿puchukarachiwaqchu? ¿Castigawaqraqchu chay lugarta pichqa chunka allin ruraq runakuna paykunawan kachkaptinpas?

²⁵ ¡Amayá chaynataqa ruraychu! ¡Amayá allin ruraq runakunataqa mana allin runakunatawanqa wañuchiychu, amayá chaynachu kachun! Tukuy kay pachapa Jueznin kachkaspaqa ¿manachum allin kaqta mana rurawaq? —nispa.

²⁶ Chaymi Tayta Dios nirqa: —Pichqa chunka allin ruraq runakunata Sodoma llaqtapi tarispayqa paykunaraykum lliw lugarta mana castigasaqchu —nispa.

²⁷ Hinaptinmi Abraham nirqa: —Señorniy, rimapayaykuykim mana imapaq valeq ñutu allpa hinaspa uchpa hina kachkaspaypas.

²⁸ Icha faltanpas pichqa chunkamantaqa pichqaraqpas ¿puchukarachinkichu lliw llaqtata pichqa faltasqanrayku? —nispa. Hinaptinmi payñataq nirqa: —Manam puchukachisaqchu tawa chunka pichqayoqllata tarispaypas —nispa.

²⁹ Chaymantam Abraham kasqallan rimapayaspa nirqa: —Icha tawa chunkallapas kachkanku —nispa. Hinaptinmi Tayta Diosñataq nirqa: —Tawa chunkaraykum mana imanasaqpaschu —nispa.

³⁰ Chaymi Abrahamñataq nirqa: —Señorníy, amayá piñakuychu yapamanta rimapayasqaywanqa. Ichapas kimsa chunkallapas kachkanku —nispa. Chaymi Tayta Dios nirqa: —Manam imanasaqpaschu kimsa chunkallata chaypi tarispaypas —nispa.

³¹ Chaymantam Abraham nirqa: —Señor, rimapayachkaspayqa niykusqaykiyá. Icha iskay chunkallapas kachkanku —nispa. Chaymi Señorñataq nirqa: —Manam puchukachisaqchu iskay chunkalla kaptinpas —nispa.

³² Chaymi Abrahamñataq kasqallan nirqa: —Señorníy, amayá piñakuychu kunanllañayá rimapayaykusqayki. Ichapas chaypiqa chunkallapas kachkanku —nispa. Hinaptinmi Señorñataq nirqa: —Manam puchukachisaqchu chunkantinrayku —nispa.

³³ Chaymantam Abrahanwan rimayta tukuruspan Tayta Dios pasakurqa, Abrahamñataqmi kutikurqa maymi kasqanman.