Génesis 16 - Quechua Ayacucho Bible 1987

Abrampa churin Ismaelta Agar wachakusqanmanta

¹ Abrampa warmin Saraimi mana wachakuq karqa. Paypam karqa Agar sutiyoq Egiptomanta kaq sirvientan.

² Saraimi Abramta nirqa: —Mana wachakuqta Tayta Dios rurawasqanraykum ruegakuyki sirvientaywanña puñunaykipaq, icharaqpas paymantaña kanman wawaykuna —nispan. Hinaptinmi Saraipa nisqanta Abram kasukurqa.

³ Chunka wata Canaan allpapi *f**yachasqanku hawañam Abrampa warmin Sarai Egiptomanta kaq sirvientan Agarta qoykurqa Abranman warminpaq.

⁴ Chaymi Agarwan Abram puñurqa, Agarñataqmi wiksayakuruspan patronanta despreciowan qawarqa.

⁵ Chaymi Abramta Sarai nirqa: —Qanmi huchayoq kanki kay sirvientay insultawananpaq, qanman qoykuptiymi wiksayakuruspan despreciowan qawawan. Tayta Diosyá juzgawasun qamtawan ñoqata —nispa.

⁶ Hinaptinmi Saraita Abram nirqa: —Kayqayá sirvientaykiqa makikipi, munasqaykitayá paywan ruray —nispa. Chaymi Agarta Sarai ñakarichiptin ladonmanta lluptirurqa.

⁷ Chaymi Agartaqa Tayta Diospa angelnin tarirurqa chunniqpi kaq pukyupa waqtanpi, chay pukyuqa kachkan Shur lawman riq ñanpim.

⁸ Paytam angel nirqa: —Saraipa sirvientan Agar ¿maymantataq hamuchkanki, maytataq richkanki? —nispa. Hinaptinmi Agarñataq nirqa: —Patronay Saraipa ladonmantam lluptikuchkani —nispa.

⁹ Hinaptinmi Tayta Diospa angelnin nirqa: —Kutiy patronaykipa ladonman hinaspa humillakuspa kasukuy —nispa.

¹⁰ Tayta Diospa angelninqa nirqataqmi: Mirachisaqpunim miraynikikunata nana-nanaq kasqanrayku mana yupay atinata. Wiksayoqñam kachkanki.

¹¹ Qari wawatam wachakunki. Paytam Ismaelwan sutichanki. Waqasqaykitam Tayta Dios uyarirusunki.

¹² Ismaelqa purun asno hina torpe runam kanqa. Lliwpa contranpim sayarinqa. Llapa runakunam paypa contranpi sayarinqa. Wawqenkunawan cheqnichikuspapas paykunawanmi *f**yachanqa.

¹³ Tayta Dioswan rimasqanraykum payta Agar suticharqa: —Qanmi kanki rikusqay Dios —nispa. Agarqa nirqataqmi: —Kawsachkaniraqmi Diosta rikuruchkaspaypas —nispa.

¹⁴ Chayraykum chay pozota suticharqa Rikuqniy Kawsaq Diospa Pozon nispa. Chay pozoqa kachkan Cades llaqtamanta Bered llaqtaman riq ñanpim.

¹⁵ Chaymantam Abrampa churinta Agar wachakururqa hinaptinmi Agarpa wachakusqan churinta Abram suticharqa Ismaelwan.

¹⁶ Abram pusaq chunka soqtan watayoq kachkaptinmi churin Ismaelta Agar wachakurqa.