Génesis 15 - Quechua Ayacucho Bible 1987

Abranwan Dios contrato rurasqanmanta

¹ Kaykunapa qepantam Abranman revelaspan Tayta Dios nirqa: Abram, ama manchakuychu, ñoqam waqaychasqayki, anchatataqmi premiasqayki.

² Hinaptinmi Abramñataq nirqa: —Señor Dios ¿Imapaqtaq imatapas qowankiman mana churiyoq kachkaptiyqa chaynataq Damasco llaqtayoq Eliezerlla wasiypi herenciay chaskiq kachkaptinqa?

³ Manamá qowankichu churitaqa, uywasqay Eliezerchiki kanqa herenciay chaskiqqa —nispa.

⁴ Chaymi Tayta Diosñataq nirqa: —Manam paychu kanqa herenciayki chaskiqqa, churikipunim herenciayki chaskiqqa kanqa —nispa.

⁵ Tayta Dios hawaman pusaruspanmi nirqa: —Qaway cielokunapi lucerokunata, yupayyá atispaykiqa. Wakna mana yupay atinam kanqa miraynikikunapas —nispa.

⁶ Abramqa Tayta Diosman iñisqanraykum mana huchayoqpaqña chaskisqa karqa.

⁷ Paytam Tayta Dios nirqa: —Ñoqam kani Tayta Dios. Caldea law Ur llaqtamantam horqomurqayki kay allpata herencia qonaypaq —nispa.

⁸ Hinaptinmi Abramñataq nirqa: —Señor Dios ¿imapitaq yachasaq kay allpaqa herenciay kananta? —nispa.

⁹ Chaymi Diosñataq nirqa: —Aparamuway kimsa watayoq vaquillatawan kimsa watayoq cabrata, apamuwaytaq kimsa watayoq carnerotawan kullkutapas chaynataq mallqo palomatapas —nispa.

¹⁰ Chaymi Abram chaykunata Diosman aparuspan partirqa chawpimanta hinaspam churarqa sapa partisqanta chimpapurata, palomatawan kullkutam ichaqa mana partirqachu.

¹¹ Chaymi nakasqan animalkunapa hawanman ullachkukuna tiyaramuptin Abramñataq manchachirqa.

¹² Inti seqaykuytañam Abramta puñuy hapiruptin puñururqa hinaptinmi llumpay tutayay payta mancharirachirqa.

¹³ Chaymi Abramta Tayta Dios nirqa: —Cheqaptapunim miraynikikunaqa runapa allpanpi *f**yachanqaku hinaspam servinqaku chaypi kaqkunata, paykunaqa ñakarichisqataqmi kanqaku tawa pachak wata.

¹⁴ Aswanqa servichikuqninku runakunatam castigasaq, hinaptinñam lloqsinqaku sinchi riquezayoq.

¹⁵ Hinaptinmi hawkayaypi kawsaruspa yuyaq kaynikipiña wañukunki hinaspam pampasqa kaspa abueloykikunapa kasqanman rinki.

¹⁶ Willkaykipa willkankunam kutimunqa kay allpaman. Amor runakunataqa huchallapiña kachkaptinkupas manaraqmi castigasaqchu —nispa.

¹⁷ Inti seqaykuytaña sinchita tutayaruptinmi rikurirurqa huk qosnichkaq hornochapiwan lenguachkaq nina hinaspam partisqa animalkunapa chawpinta pasarqa.

¹⁸ Chay punchawllapim Abranwan Tayta Dios rurarqa contratota, Diosmi nirqa: —Miraynikikunamanmi kay allpata qosaq Egipto mayuchamanta Eufrates sutiyoq hatun mayukama.

¹⁹ Qosqaykitaqmi Cain runakunapa, Cenaz runakunapa, Cadmon runakunapa,

²⁰ Het runakunapa, Feres runakunapa, Refaim runakunapa,

²¹ Amor runakunapa, Canaan runakunapa, Gerges runakunapa hinaspa Jebus runakunapa allpantapas —nispa.