Génesis 13 - Quechua Ayacucho Bible 1987

Abranmanta Lot rakikusqanmanta

¹ Egiptomantam Abram rirqa Neguev lawman warminwan kuska llapa imankunatapas aparikuspan, paykunawantaqmi rirqa Lotpas.

² Abranmi apullaña karqa, kapurqam animalninkunapas chaynataq qori-qollqepas.

³ Neguev lawmantam kutirqa ñawpaq karpan sayachisqan Betelkama, chay sitioqa karqa Betel llaqtapa hinaspa Hai llaqtapa chawpinpim.

⁴ Chaypimá ñawpaqta altarta rurarqa. Chaypim Tayta Diosta Abram mañakurqa.

⁵ Abranwan puriq sobrinon Lotpapas kapurqam ovejankuna, vacankuna hinaspa karpankuna.

⁶ Chaymi kuska *f**yachanankupaq allpa mana hayparqañachu animalninku achka kasqanrayku, manataqmi huk hawaqllapiqa yachayta atirqakuñachu.

⁷ Abrampa animalnin michiqkunam Lotpa animalnin michiqkunawan liriaqku. Chaypitaqmi yacharqaku Canaan runakunapas chaynataq Ferez runakunapas.

⁸ Chaymi Lotta Abram nirqa: —Amayá lirianakuyqa kachunchu ñoqanchikpiqa nitaq michiqninchikkunapipas, ñoqanchikqa ayllupuram kanchik.

⁹ Kayqaya kay allpaqa kachkan ñawpaqnikipi. Ruegakuykim ñoqamanta rakikunaykipaq. Ichoq lawman riptikiqa ñoqam risaq alleq lawman otaq alleq lawman riptikiqa ñoqam ichoq lawman risaq —nispa.

¹⁰ Chaymi Lot qawarirqa Jordan Mayupa enteron qechwanta, rikurqataqmi chay sitioqa Tayta Diospa huertan hina Zoar llaqtachakama yakuyoq kasqanta. Egipto allpamanmi rikchakurqa. Chaynaqa karqa Sodoma llaqtatawan Gomorra llaqtata Tayta Dios manaraq purmarachichkaptinmi.

¹¹ Lotmi akllakuykurqa kikinpaq lliw Jordan Qechwata. Lotmi pasakurqa intipa qespimunan lawman, chaynatamá rakinakururqaku.

¹² Abranmi *f**yacharqa Canaan allpapi, Lotñataqmi yacharqa chay qechwapa llaqtankunapi Sodoma lawman karpankunata suchuchistin.

¹³ Sodomapi kaq runakunaqa karqaku llumpa-llumpay huchasapa mana allin runakunam, Tayta Diospa contranpim huchallikuqku.

¹⁴ Lot pasakuptinmi Abramta Tayta Dios nirqa: —Maymi kasqaykimanta qawariy norte lawtawan surlawta hinaspa intipa qespimunan lawtawan intipa seqaykunan lawta.

¹⁵ Llapallan kay allpa qawasqaykitam qanmanwan miraynikikunaman qosqayki wiña-wiñaypaq.

¹⁶ Allpapa ñutunta hinam miraynikita mirachisaq. Manam pipas allpapa ñutuntaqa yupayta atinmanchu chaynataqmi miraynikipas mana yupay atina kanqa.

¹⁷ Qawamuy chay allpapa largontawan anchonta, chay allpatam qosqayki —nispa.

¹⁸ Chaymi Abram karpanta apaspan *f**yacharqa Hebron llaqtapa hichpanpi otaq Mamre sutiyoq runapa encina sachankunapa kasqanpi, chayqa kachkan Hebron llaqtapa hichpanpim, chaypim huk altarta rurarqa Tayta Diosta adorananpaq.