Génesis 12 - Quechua Ayacucho Bible 1987

Abramta Dios qayasqamanta

¹ Chaymantam Abramta Tayta Dios nirqa: —Llaqtaykimanta, aylluykimanta hinaspa taytaykipa familianmanta lloqsiy qawachinay allpaman.

² Hatun naciontam qanmanta rurasaq. Bendecispaymi sutikitapas sinchi reqsisqata rurasaq. Qamraykutaqmi wakin runakunatapas bendecisaq.

³ Bendecisaqmi bendecisuqnikikunata. Ñakasaqmi ñakasuqnikikunata. Qamraykum bendecisaq kay pachapi llapallan familiakunata.

⁴ Chaymi Tayta Diospa nisqanman hina Abram lloqsirqa, Lotpas paywanmi rirqa. Abranmi qanchis chunka pichqan watayoq karqa Haran llaqtamanta lloqsispan.

⁵ Abranmi warmin Saraita pusarqa, pusarqataqmi wawqenpa churin Lott sutiyoq runatapas chaynataq Haran llaqtapi rantisqan runakunatapas. Aparqataqmi tukuy ima armakusqankunatapas hinaspam Canaan lawman rispa chayman chayarqaku.

⁶ Abranmi pasarurqa chay allpanta Siquem llaqtapi yupaychana lugarkama otaq Morey lawpi encina sachapa kasqankama. Chay lawpim Canaan runakuna *f**yachachkarqaku.

⁷ Hinaptinmi Abranman Tayta Dios rikuriykuspan nirqa: —Miraynikimanmi kay allpata qosaq —nispa. Hinaptinmi rikuriqnin Tayta Diosta adorananpaq chaypi altarta rurarqa.

⁸ Hinaspam chaymanta pasakurqa Betelpa waklawnin intipa qespimunan law orqoman, karpantam chaypi sayachirqa. Betel llaqtam karqa intipa seqaykunan lawninpi, Hai llaqtañataqmi karqa intipa qespimunan lawninpi. Chaypim Tayta Diospaq altarta ruraspan payta mañakurqa.

⁹ Abranmi chay sitiomanta pasarqa kaypi-chaypi samastin Neguev lawkama.

Egipto nacionman Abram yaykusqanmanta

¹⁰ Chaylawkunapi muchuy karusqanraykum Abram rirqa Egipto nacionman chaypi *f**yachananpaq. Canaan allpapimá llumpayllaña muchuy karqa.

¹¹ Egipto nacionman chayaykuchkaspankuñam nirqa warmin Saraita: —Qamqa kanki buenamoza warmim.

¹² Chaynaqa Egipto runakunachá qawaykususpayki: “kayqa warminmi” nispanku wañurachiwanqa, qamtañataqchá kawsachisunki qanwan quedakunankupaq.

¹³ Chaynaqa ninkim paniy kasqaykita chaynapi qamrayku allin kanaypaq hinaspa qamraykutaq kawsanaypaq —nispa.

¹⁴ Chaymi Egipto nacionman Abram yaykuptin, Egipto runakuna qawarqa Saraiqa buenamoza warmi kasqanta,

¹⁵ Faraonpa ministronkunapas qawaykuspam alabarqa hinaspam Faraonpa palacionman Saraita pusaykurqaku.

¹⁶ Allintam atienderqaku Abramta Sarairayku. Abrampamá kapurqa ovejankuna, vacankuna, asnonkuna, qaripas, warmipas sirvientenkuna hinaspa *f**camellonkuna.

¹⁷ Tayta Diosñataqmi Faraonta wasinpi kaqkunatawan onqorachirqa sinchi hatun onqoykunawan Abrampa warmin Sarairayku.

¹⁸ Chaymi Abramta Faraon qayaspan nirqa: —¿Imatataq kaytaqa ruraruwanki? Sarai warmiki kasqantaqa ¿imanasqataq manaqa willawarqankichu?

¹⁹ ¿Imanasqataq “Paniymi” nirqanki? Yaqallam casarakururqanipas. Kayqaya warmiki, kunanqa pusakuspayá ripukuy —nispa.

²⁰ Chaymi Faraon kamachirqa runankunata chaynapi Abramta hinaspa warminta tukuy kapuqnintinta pusaspa aviamunankupaq.