Génesis 11 - Quechua Ayacucho Bible 1987

Babel llaqtapi torre hatarichisqankumanta

¹ Kay pachapiqa lliw runakunam karqaku huk rimayniyoqlla.

² Chaymi intipa qespimunan lawmanta lloqsimuspanku tarirurqaku Sinar lawpi huk pampata hinaspam chaypi *f**yacharqaku.

³ Paykunam ninakurqaku: —Rurasunchik ladrillokunata hinaspa kañasunchik hornopi —nispa. Chaymi rumikunapa rantinpi ladrillokuna servikurqa. Breañataqmi mezclamanta servikurqa.

⁴ Paykunam ninakurqaku: —Hatarichisunchikyá llaqtata, perqasuntaqyá cielokama haypaq torretapas chaynapi ancha reqsisqa kananchikpaq. Yanqañataqmi tukuy hinastinman kay pachapi cheqeruchwanchik —nispa.

⁵ Ichaqa Tayta Diosmi uraykamuspan qawarqa runakunapa rurasqan llaqtata chaynataq torretapas.

⁶ Chaymi Tayta Dios nirqa: —Kay runakunaqa kachkan huk castallam, rimankupas huk rimayllatataqmi. Chayraykum kay ruraytapas qallaykunku, chaynaqa ruray munasqankumantaqa manam imapas sayachiyta atinmanchu.

⁷ Chaynaqa uraykuspanchikyá pantarachimusun rimayninkuta chaynapi mayqanninkupas rimasqankuta mana entiendenakunankupaq —nispa.

⁸ Chaynatam Tayta Dios cheqerachirqa tukuy hinastinman chay sitiomanta chayraykum llaqta hatarichiytapas dejarurqakuña.

⁹ Chayraykum chay llaqtata Babelwan suticharqaku, chaypim Tayta Dios kay pachapi runakunapa rimayninta pantanarachirqa hinaspam tukuy kay pachapa hawanman cheqerachirqa.

Sem sutiyoq runapa mirayninkunamanta

¹⁰ Kaykunam Sempa mirayninkuna: Sem pachak watayoq kachkaptinmi churin Arfaxad nacerqa iskay wataña sinchi para pasaruptin.

¹¹ Churin Arfaxadpa nacesqanmantam Sem kawsarqa pichqa pachak watataraq, chay watakunapim karqaraq qarikunapas warmikunapas churinkuna.

¹² Arfaxad kimsa chunka pichqan watayoq kachkaptinmi churin Sala nacerqa.

¹³ Arfaxadmi churin Salapa nacesqanmanta kawsarqa tawa pachak kimsan watataraq, chay watakunapim karqaraq qarikunapas warmikunapas churinkuna.

¹⁴ Sala kimsa chunka watayoq kachkaptinmi churin Heber nacerqa.

¹⁵ Churin Heberpa nacesqanmantam Sala kawsarqa tawa pachak kimsan watataraq, chay watakunapim karqaraq qarikunapas warmikunapas churinkuna.

¹⁶ Heber kimsa chunka tawan watayoq kachkaptinmi churin Peleg nacerqa.

¹⁷ Churin Pelegpa nacesqanmantam Heber kawsarqa tawa pachak kimsa chunkan watataraq, chay watakunapim karqaraq qarikunapas warmikunapas churinkuna.

¹⁸ Peleg kimsa chunka watayoq kachkaptinmi churin Reu nacerqa.

¹⁹ Churin Reu nacesqanmantam Peleg kawsarqa iskay pachak isqonnin watataraq, chay watakunapim karqaraq qarikunapas warmikunapas churinkuna.

²⁰ Reu kimsa chunka iskaynin watayoq kachkaptinmi churin Serug nacerqa.

²¹ Churin Serugpa nacesqanmantam Reu kawsarqa iskay pachak qanchisnin watataraq, chay watakunapim karqaraq qarikunapas warmikunapas churinkuna.

²² Serug kimsa chunka watayoq kachkaptinmi churin Nacor nacerqa.

²³ Churin Nacorpa nacesqanmantam Serug kawsarqa iskay pachak watataraq, chay watakunapim karqaraq qarikunapas warmikunapas churinkuna.

²⁴ Nacor iskay chunka isqonnin watayoq kachkaptinmi churin Tarey nacerqa.

²⁵ Churin Tareypa nacesqanmantam Nacor kawsarqa pachak chunka isqonniyoq watataraq, chay watakunapim karqaraq qarikunapas warmikunapas churinkuna.

²⁶ Tarey qanchis chunka watayoq kachkaptinmi nacerqa churin Abram, Nacor hinaspa Haran.

Tareypa mirayninkunamanta

²⁷ Tareypa mirayninkunam kaykuna: Tareypa churinkunam karqa Abram, Nacor hinaspa Haran. Haranpa churinñataqmi karqa Lot.

²⁸ Haranmi wañukurqa taytan Tareymantapas puntataraq, wañukurqaqa Caldea law Ur sutiyoq nacesqan llaqtapim.

²⁹ Chaymi Abrampas Nacorpas casarakurqa. Abrampa warminmi karqa Sarai, Nacorpa warmiñataqmi karqa Milca. Haranmi karqa Milcapawan Iscapa taytan.

³⁰ Saraiñataqmi qolluq kasqanrayku mana wawayoq karqa.

³¹ Caldea lawpi Ur llaqtamantam Tarey lloqsirqa Canaan lawman rinanpaq hinaspam pusarqa churin Abramta, Abrampa warmin llumchuynin Saraita chaynataq Haranpa churin willkan Lottapas. Ichaqa Haran llaqtaman chayaruspankum chaypi *f**yacharqaku.

³² Tareymi iskay pachak pichqan watata kawsaruspan Haran llaqtapi wañukurqa.