Gálatas 6 - Quechua Ayacucho Bible 1987

Yanapanakunanchikmanta

¹ Wawqe-panillaykuna, pipas huchallikuruptinqa Chuya Espirituta kasukuqkunam yanapanaykichik Diosman kutirikunanpaq. Chaytaqa ruraychik llampu sonqollayá yanqañataq qampas tentasqa kawaq.

² Ima sasachakuykunapipas yanapanakuychikyá, chaynata ruraspayá Jesucristopa kamachikuyninkunata cumpliychik.

³ Pipas yanqapas-yanqa hatun tukuspaqa kikillanmi engañakun.

⁴ Sapakamam kikinpa vidanta qawakunan. Sichum allin kaspaqa kikillanpaqchá allin, hukpa vidanwanqa manam tupachikunmanchu.

⁵ Rurasqanchikmantaqa sapakamam Diosman cuentata qosunchik.

⁶ Diospa palabran uyariqkunaqa yachachiqnintam yanapananku imallawanpas.

⁷ Amayá qamkunaqa pantachinakuychikchu, Diostaqa manam pipas burlakunmanchu runaqa imapas tarpusqantam cosechanqa.

⁸ Aychapa munasqallan tarpuqqa aychaman hinallam wañuyta cosechanqa. Chuya Espirituman hina tarpuqmi ichaqa cosechachkaq hina paymanta wiñay kawsayta chaskinqa.

⁹ Chaynaqa amayá amirusunchu imapas allin ruraytaqa, mana amiruspaqa tiempo chayaramuptinmi cosechata hina premiota chaskisunchik.

¹⁰ Atispaqa lliwtayá yanapasun, aswan llapanmanta llalliriqtaqa iñiqmasinchikkunata.

Pablopa kunasqankunamanta

¹¹ Qawaychikyá, mayna hatun letrakunawanmi kikiypuni qellqamuchkaykichik.

¹² Sichum pipas: “Judiokuna hina *f**señalachikuychik” nisuspaykichikqa, runakunallata agradanankupaqmi obligasunkichik chaynapi cruzpi Jesucristopa wañusqanmanta rimaspa mana ñakarichisqa kanankupaq.

¹³ “*f**Señalachikuychik” niqkunapas manam lliw kamachikuykunatachu kasukunku, señalachikunaykichiktaqa munachkanku cuerpoykichikpi kaq señalmanta alabakunankupaqmi.

¹⁴ Ñoqam ichaqa imamanta alabakuytapas munanichu, aswanqa Señorninchik Jesucristopa cruzpi wañusqallanmantam. Arí, cruzpi Cristopa wañusqanraykum kay pachapi mana allin ruraykunataqa wañusqata hinaña saqeruni, kay pachapi mana allin ruraykunapas wañusqata hinañam saqeruwan.

¹⁵ Manam imapaqpas valenchu judiokuna hina *f**señalasqa kaypas otaq mana señalasqa kaypas, valenqa mosoq runaña kaymi.

¹⁶ Kay yachachisqayman hina purispa Diospa cheqap akllasqankunatam nimuykichik: Diosyá kuyapayarispa hawkalla kawsanaykichikta munachun.

¹⁷ Jesucristorayku ñakarichiwasqankupa marcankunam pimanpas qawachin Señorninchikpa cheqap serviqnin kasqayta. Chaynaqa amañayá kunanmantaqa pipas sonqoyta nanachichunchu.

¹⁸ Wawqe-panillaykuna, Señorninchik Jesucristoyá sonqoykichikpi kawsaspa yanapasunkichik. Chaynayá kachun.