Gálatas 5 - Quechua Ayacucho Bible 1987

Qaqa hina sayananchikmanta

¹ Cristom judiokunapa kamachikuyninkunamanta librawarqanchik. Chaynaqa, qaqa hina sayaspayá amaña kutiriychikchu sirviente hina sasallaña kawsaymanqa.

² Ñoqa Pablopa nisqaytayá uyariychik: Judiokuna hinaraq *f**señalachikuspaykichikqa yanqapaqmi Cristomanqa hapipakunkichik.

³ Huktawanmi nimuykichik: Pipas judio hina señalachikuqqa Moisespa lliw kamachikuyninkunatam kasukunan.

⁴ Wakinnikichikmi ninkichik: —Moisespa leyninta kasukuptinchikmi mana huchayoqpaqña Dios chaskiwanchik —nispa. Chaynata nispaykichikmi Jesucristomantawan Diospa favorninmanta karunchakurunkichik.

⁵ Ñoqanchikmi ichaqa Chuya Espiritupa yanapakuyninwan hinaspa Cristoman hapipakuspa mana huchayoqña kananchikpaq suyachkanchik.

⁶ Jesucristowan huklla kaptinchikqa manam imananchu *f**señalasqa otaq mana señalasqa kayninchikpas. Diosmi ichaqa munan Jesucristoman hapipakuspallanchik kuyakuspa kawsananchikta.

⁷ Allin kallpachkaq hina yachachisqaykunata kasukuchkaptikichikqa ¿pimá cheqapmantaqa pantarachisunkichik mana kasukunaykichikpaqqa?

⁸ Chay yachachikuykunaqa manam qayasuqnikichik Diosmantachu.

⁹ Cuidakuychikyá, yachankichikmi aslla qonchupas achka masa poqochisqantaqa.

¹⁰ Señorpim confiakuchkani yachachisqaypa contranpiqa mana hukmanrayanaykichikmanta. Qamkunata pantachiqkunaqa pi runaña kaspapas Diospa castigasqanmi kanqa.

¹¹ Wawqe-panillaykuna, sichum “*f**Señalachikuychik” nispayraq yachachiptiyqa judiokunaqa manach ñakarichiwanmankuchu hinaspapas Jesucristopa cruzpi wañusqanmanta willakusqaymantaqa manach piñakunmankuchu.

¹² Aswanqa “Qari kaynikichikpi *f**señalakuychik” nispa yachachiqkunaqa enterontapas kuchuchikuchunkuyá.

¹³ Wawqe-panillaykuna, Diosqa qayasurqankichik libre kanaykichikpaqmi. Ichaqa: “Librem kani” nispaqa amayá runapa mana allin munasqantaqa ruraychikchu aswanqa kuyakuywanyá yanapanakuychik.

¹⁴ Diosmi kamachiwarqanchik: —Kuyankim runamasikita kikikita hina —nispa. Kayta kasukuspam lliw kamachikuyninta cumplinchik.

¹⁵ Animalkuna hina kachunakuspa mikunakuspaykichikqa yanqañataq kikikichikpura tukunakuruwaqchik.

Aychapa rurunmantawan Chuya Espiritupa rurunmanta

¹⁶ Chaynaqa nimuykichikmá: Chuya Espiritupa munasqanman hina kawsaspayá aychapa munasqallantaqa amaña ruraychikchu.

¹⁷ Aychapa munasqanqa Chuya Espiritupa contranpim kachkan, Chuya Espiritupa munasqanñataqmi aychapa munasqankunapa contranpi kachkan. Iskayninku contranakuptinmi munasqaykichik rurayta mana atinkichikchu.

¹⁸ Chuya Espiritu pusasuptikichikmi ichaqa manaña leypa munaychakusqanchu kachkankichik.

¹⁹ Yachasqanchikpi hinapas aychapa munasqallanpi kawsaqkunaqa huchapakuyllapim purinku, millakuypaq kaqkunallatam ruranku, manaña penqakuspam qanrakunku,

²⁰ taytacha-mamachakunallatam adoranku, paykunaqa layqanakuyllapi, cheqninakuyllapi, liryanakuyllapi, envidianakuyllapi hinaspa piñanakuyllapim purikunku, kikillankupaqmi imatapas munanku, rakinakuyllatam hatarichinku, sapa-sapaqmi huñunakunku,

²¹ munapayarinkum hukpa imankunatapas, tomakuyllapi fiestakunallapim purikunku, rurankutaqmi chayna rikchaq huchakunatapas. Ñawpaq nisqaytam huktawan nimuykichik: Chayna mana allin ruraqkunaqa manam yaykunqakuchu Diospa munaychakusqanman.

²² Chuya Espirituñataqmi kawsachiwanchik: kuyakuqta, kusisqallata, hawkallata, pacienciakuqta, sumaq sonqollata, kuyapayakuqta, cumpliqta,

²³ llampu sonqollata hinaspa imapipas controlakuqta. Manam ima kamachikuypas kay allin ruraykunapa contranpiqa kanchu.

²⁴ Jesucristopaña kaqkunaqa chakatasqata hinañam saqerunchik aychapa munasqankunataqa.

²⁵ Chuya Espirituman hina kawsaqkunaqa payta kasukuspañam purinanchik.

²⁶ Ama hatun tukuspayá ama piñanakusunchu nitaq envidianakusunchu.