Éxodo 9 - Quechua Ayacucho Bible 1987

Peste onqoy castigomanta

¹ Tayta Diosmi Moisesta nirqa: —Hebreo castakunapa yupaychasqan ñoqa Tayta Diospa nisqaytayá Faraonman yaykuspa kaynata nimuy: “Kachariy runaykunata adoramuwanankupaq.

² Mana kacharispa hapikuykuptikiqa

³ ñoqa Tayta Diosmi llumpa-llumpay peste onqoywan castigasaq campopi kaq animalnikikunata otaq caballokunata, asnokunata, camellokunata, vacakunata, hinaspa ovejakunata.

⁴ Ichaqa ñoqa Tayta Diosmi sapaqchasaq Israel castakunapa animalninkunataqa, manam wañunqachu chulla animalpas Israel castakunapaqa” nispa.

⁵ Tayta Diosmi plazota qospan nirqa: —Chaytam paqarin rurasaq kay nacionpi —nispa.

⁶ Hinaptinmi paqarinnin punchaw Tayta Dios chaynata rurarqa. Egipto nacionpi animalkunam lliw wañururqa, Israelpa mirayninkunapa animalninmi ichaqa mana chullapas wañurqachu.

⁷ Chaymi Faraon kacharqa Israel castakunapa animalnin qawaq hinaptinmi chaypiqa mana chullapas wañusqachu. Chaywan Faraonpa sonqon rumiyaruptinmi Israel runakuna kachariyta mana munarqachu.

Chupu onqoy castigomanta

⁸ Tayta Diosmi Moisestawan Aaronta nirqa: —Huk aptiyninka hoqariychik hornomanta uchpata hinaptin Moises maqchichun cielo lawman Faraonpa qayllanpi.

⁹ Enteron Egipto nacionpa hawanpi uchpa polvoyaruspanmi chupukunata rikurirachinqa runakunapipas chaynataq animalkunapipas —nispa.

¹⁰ Hornomanta uchpata hoqarispankum Faraonpa ñawpaqninpi sayaykurqaku chaymi Moises maqchirqa cielo lawman. Hinaptinmi chupukuna rikurirurqa runakunapipas chaynataq animalkunapipas.

¹¹ Hinaptinmi Moisespa ñawpaqninpi brujokuna mana aguantayta atirqakuchu chupuwan kasqankurayku. Chupukunamá rikurirurqa brujokunapipas chaynataq lliw Egipto runakunapipas.

¹² Ichaqa Tayta Diosmi Faraonpa sonqonta rumiyarachirqa hinaptinmi paykunata mana kasurqachu, chaynaqa karqa Moisesman Tayta Diospa nisqanpi hinam.

Runtu para castigomanta

¹³ Tayta Diosmi Moisesta nirqa: —Tutapayta hatarispaykiyá yaykuy Faraonman hinaspayá Hebreo castakunapa yupaychasqan ñoqa Tayta Diospa nisqayta kaynata nimuy: “Kachariy runaykunata adoramuwanankupaq.

¹⁴ Kunanmi tukuy castigoyta kacharimusaq qanman, serviqnikikunaman hinaspa runaykikunaman chaynapim yachanki ñoqa hina huk diosqa tukuy kay pachapi mana kasqanta.

¹⁵ Sichu qanmanwan runaykikunaman peste onqoyta kachaykamuptiyqa kay pachamantam chinkaruwaqña karqa.

¹⁶ Cheqaptaqa ñoqam hatarichirqayki qanman atiyniyta qawachinaypaq chaynapi sutiy lliw kay pachapi willakusqa kananpaq.

¹⁷ ¿Qamchu hatun tukunkiraq runaykunata mana kacharichkaspayki?

¹⁸ Paqarinmi kay horata nisyu-nisyu runtu parata chayachimusaq. Chayna paraqa manam karqachu Egipto nacionpa qallarisqan punchawmanta kunankamapas.

¹⁹ Kachayá animalnikiman hinaspa campopi tukuy imaykipas kaqkunaman, chaynapi wasiki ukuman huñumunanpaq. Runapas, animalpas wasiman mana huñusqa kaspaqa runtu parawanmi wañurunqa” nispa.

²⁰ Faraonpa wakiq serviqninkunallam Tayta Diospa nisqanta manchakuspanku wasi ukuman lluptichirqaku servientinkunata chaynataq animalninkutapas.

²¹ Wakinmi ichaqa Tayta Diospa nisqanta mana kasukuspanku sirvientenkutawan animalninkuta campopi saqeramurqaku.

²² Hinaptinmi Tayta Dios nirqa Moisesta: —Haywariy makikita cielo lawman chaynapi lliw Egipto runakunapa hawanman, animalkunapa hawanman hinaspa campopi lliw qorakunapa hawanman runtu para chayamunanpaq —nispa.

²³ Moisesmi tawnanta haywarirqa cielo lawman hinaptinmi rayokunata tunrururuchimuspa runtu parata Tayta Dios chayachimurqa, chay rayokunam pampaman chayarqa. Runtu paratamá Tayta Dios chayachirqa Egipto nacionman.

²⁴ Llipyachkaq rayowan runtu param taqrukuykuspan kaynaman-waknaman purirqa. Chayna sinchi runtu paraqa manam karqachu Egipto nacionpa qallarisqanmantapunipas.

²⁵ Runtu param dañarurqa enteron Egipto nacionpa camponpi tukuy ima kaqta, dañarurqamá runakunatapas chaynataq animalkunatapas. Runtu paraqa dañarurqataqmi campopi tukuy qorakunatapas hinaspam pakiparurqataq campopi llapa sachakunatapas.

²⁶ Israelpa mirayninkunapa maymi kasqanku Gosen lawllapim ichaqa runtu para mana karqachu.

²⁷ Chaymi Moisestawan Aaronta Faraon qayachispan nirqa: —Kunanpas huchallikurunim. Tayta Diosqa allin ruraqmi, ñoqam ichaqa runaykunapiwan huchasapa kaniku.

²⁸ Mañakuychiká Tayta Diosta truenoskunawan runtu para chayllaña kananpaq. Ñoqaqa kachaykusqaykichikñam, manam quedankichikñachu —nispa.

²⁹ Chaymi Moises nirqa: —Kay pachaqa Tayta Diospa kasqanta yachanaykipaqmi llaqtamanta lloqsispalla brazoyta kicharisaq Tayta Diosman hinaptinmi rayokuna tanirunqa, runtu parapas manañam kanqachu.

³⁰ Aswanqa ñoqam yachani qampas chaynataq serviqnikikunapas yupaychasqayku Tayta Diostaqa manaraq manchakunaykichikta.

³¹ Linazamá cebadapiwan dañasqa karurqa, cebadaqa espigayoqñam karqa, linazapas sisapiñam karqa.

³² Trigom ichaqa cebadillapiwan mana dañasqachu karqa qepaña kasqanrayku.

³³ Moisesñataqmi Faraonpa ñawpaqninmanta lloqsirqa llaqtapa hawa lawninman hinaspam brazonta kicharispan Tayta Diosta mañakurqa. Chayraqmi truenoskunapas hinaspa runtu parapas tanirurqa hinaptinmi manaña paramurqachu.

³⁴ Parapas, runtu parapas, truenopas tanirusqanta Faraon qawaykuspanmi huktawan huchallikururqa. Paypa hinaspa serviqninkunapa sonqonmi rumiyarurqa.

³⁵ Moiseswan Tayta Diospa nichisqanman hina Faraonpa sonqon rumiyaruptinmi Israelpa mirayninkunata mana kacharirqachu.