Éxodo 8 - Quechua Ayacucho Bible 1987

¹ Moisesta Tayta Dios nirqa: —Faraonpa kasqanman yaykuspayá ñoqa Tayta Diospa nisqayta kaynata nimuy: “Runaykunata kachariy adoramuwananpaq.

² Sichu mana kachariyta munaptikiqa ñoqam castigasaq kayrakunawan enteron nacionnikita.

³ Mayupi kayrakuna nana-nanaqta miraruspanmi lloqsimunqa palacioykiman, puñunayki cuartoman, camaykiman, serviqnikikunapa wasinman, runaykikunapa wasinman, hornoykikunaman chaynataq artesaykikunamanpas.

⁴ Kayrakunaqa seqanqataqmi qampa hawaykimanpas, runaykikunapa hawanmanpas chaynataq llapallan sirvientekikunapa hawanmanpas” nispa.

⁵ Chaymi Tayta Dios nirqa Moisesta: —Aarontayá niy kaynata: “Haywariy tawnaykita mayukunapa hawanman, hatun mayumanta lloqsiq yarqakunapa hawanman hinaspa qochakunapa hawanman chaynapi chaykunamanta Egipto nacionman kayrakuna lloqsinanpaq” nispa.

⁶ Hinaptinmi Aaron makinta haywarirqa Egipto yakukunapa hawanman chaymi kayrakuna lloqsirimurqa Egipto allpata tapaykunankama.

⁷ Brujokunapas brujeriankuwan chaynata ruraspankum Egipto allpaman kayrakunata lloqsirachimurqaku.

⁸ Chaymi Moisestawan Aaronta Faraon qayachispan nirqa: —Tayta Diosta ruegakuychik ñoqamantawan runaykunamanta kayrakuna asuchinanpaq hinaptinqa castaykikunatam kacharisaq animalkunata wañuchipuspa Tayta Diosta adoramunankupaq —nispa.

⁹ Hinaptinmi Faraonta Moises nirqa: —Kikikipuniyá niway haykapim qampaqwan, serviqnikikunapaq hinaspa runaykikunapaq ruegapunaypaq chaynapi kayrakunata qanmanta hinaspa palacioykikunamanta Dios qechunanpaq chaynapi Nilo Mayullapiña kananpaq.

¹⁰ Hinaptinmi Faraon nirqa: —Paqarinpuniyá chinkachichun —nispa. Chaymi Moises nirqa: —Yupaychasqayku Tayta Dios hina mana huk dios kasqanta yachanaykipaqmi mañakusqaykiman hina rurasqa kanqa.

¹¹ Kayrakunam pasakunqa qanmanta, palacioykimanta, serviqnikikunamanta hinaspa runaykikunamanta. Kaspaqa-kanqa hatun mayullapiñam.

¹² Moiseswan Aaronmi lloqsirqaku Faraonpa qayllanmanta chaymi Moises mañakurqa Tayta Diosta Faraonman kachasqan kayrakunata chinkachinanpaq.

¹³ Hinaptinmi Moisespa nisqanman hina Tayta Dios rurarqa chaymi wasikunapi, patiokunapi hinaspa chakrakunapi kayrakuna wañururqa.

¹⁴ Chaymi wañusqakunata monto-montonta runakuna huñururqaku allpapas asnarinankama.

¹⁵ Aswanqa Faraonmi tukuy ima sosegarusqanta qawaykuspan Tayta Diospa nisqanpi hina sonqonta rumiyarachispan mana kasukurqachu.

Puka chuspi castigomanta

¹⁶ Tayta Diosmi nirqa Moisesta: —Aarontayá niy: “Tawnaykita hoqarispayki waqtay allpapa polvonta chaynapi puka chuspiman tikrakuspan enteron Egipto nacionpi kananpaq” nispa.

¹⁷ Hinaptinmi paykuna chaynata rurarqaku. Aaronmi tawnanta haywarispan allpapa polvonta waqtarurqa hinaptinmi puka chuspi waykarqa runakunatawan animalkunata. Allpapa polvonmi puka chuspiman tikrakururqa enteron Egipto nacionpi.

¹⁸ Chaynataqmi brujokunapas brujeriankuwan puka chuspi lloqsichiypi karqa aswanqa manam atirqakuñachu, puka chuspimá waykarqa runakunatawan animalkunata.

¹⁹ Chaymi Faraonta brujokuna nirqaku: —Diosmantam kayqa —nispa. Aswanqa Tayta Diospa nisqanpi hina Faraonpa sonqon rumiyaruptinmi mana kasukurqachu.

Tankayllu castigomanta

²⁰ Tayta Diosmi Moisesta nirqa: —Tutapayta hatarispaykiyá Faraonman presentakamuy, payqa mayumanmi lloqsichkan. Ñoqa Tayta Diospa nisqaytayá kaynata nimuy: “Kachariy runaykunata adoramuwananpaq.

²¹ Runaykunata mana kachariptikiqa ñoqam kachamusaq nana-nanaq tankayllukunata qampa hawaykiman, serviqnikikunapa hawanman, runaykikunapa hawanman hinaspa palacioykikunamanpas. Egipto runakunapa wasinmanmi huntanqa nana-nanaq tankayllukuna, huntanqataqmi kasqanku allpamanpas.

²² Ichaqa chay punchawmi runaykunapa *f**yachasqan Gosen lawta sapaqchasaq chaypiqa tankayllukuna mana kananpaq chaynapim yachanqaku kay pachapiqa ñoqa Tayta Dios kasqayta.

²³ Runaykunataqa rakinasaqmi runaykikunamanta. Paqarinmi kay señal rurasqa kanqa” nispa.

²⁴ Chaynatamá Tayta Dios rurarqa. Nana-nanaq tankayllukunam yaykururqa Faraonpa palacionman, serviqninkunapa wasinman chaynataq llapallan Egipto allpapa hawanmanpas chaymi chay nacionqa tankayllukunawan pasaypaq purmachisqa karqa.

²⁵ Chaymi Moisestawan Aaronta qayaspan Faraon nirqa: —Rispayá Diosnikichikpaq animalkunata wañuchipamuychik ichaqa kay nacionmanta ama lloqsispalla —nispa.

²⁶ Hinaptinmi Moises nirqa: —Manam kayllapiqa ruraymankuchu. Yupaychasqayku Tayta Diospaq wañuchinayku animalkunataqa adorankichikmi. Kay Egipto runakuna qawachkaptin chay adorananku animalkunata wañuchiptiykuqa rumiwanchá choqaparuwanmanku.

²⁷ Kimsa punchaw puriy chunniqtam risaqku hinaspam yupaychasqayku Tayta Diospaq animalkunata wañuchimusaqku, chaynataqa ruramusaqku paypa niwasqankuman hinam —nispa.

²⁸ Chaymi Faraon nirqa: —Ñoqam chunniqman kachaykusqaykichik Diosnikichikpaq animalkunata wañuchimunaykichikpaq ichaqa amam llumpayta karunchakunkichikchu. Mañapamuwaychikyá ñoqapaqpas —nispa.

²⁹ Hinaptinmi Faraonta Moises nirqa: —Ñawpaqnikimanta lloqsiykuspallaymi Tayta Diostaqa mañakusaq nana-nanaq tankayllukunata qanmanta, serviqnikikunamanta hinaspa runaykikunamanta paqarinpuni chinkachinanpaq. Ichaqa amañayá engañawaykuchu aswanqa kachariyá Israel runakunata chaynapi Tayta Diospaq animalkunata wañuchimunaykupaq —nispa.

³⁰ Chaymi Faraonpa ñawpaqninmanta Moises lloqsispan Tayta Diosta mañakurqa.

³¹ Chaynatamá Tayta Dios rurarqa Moisespa nisqanman hina, lliw tankayllukunam pasakurqa Faraonmanta, serviqninkunamanta chaynataq runankunamantapas. Manam chullallapas puchurqachu.

³² Aswanqa Faraonmi yapatawan sonqonta rumiyarachispan mana kacharirqachu Israel runakunata.