Éxodo 6 - Quechua Ayacucho Bible 1987

¹ Tayta Diosmi Moisesta nirqa: —Kunanmi qawanki Faraonta imam rurasqayta, hatun atiyniywanmi kachaykusunkichik, atiyniywantaqmi wischurusunkichik nacionninmantapas.

Moiseta huktawan Dios kamachisqanmanta

² Moisesta rimapayaspam Dios nirqa: —Ñoqam kani Tayta Dios.

³ Rikurirqanim Abrahanman, Isaacman hinaspa Jacobman “Tukuy Atiyniyoq Dios” sutiywan reqsichikuspay, aswanqa Tayta Dios sutiypiqa paykunamanqa manam reqsichikurqanichu.

⁴ Chaynataqmi contratoyta rurarqani paykunawan Canaan allpata qonaypaq. Chaypim paykunaqa *f**yachapakuspanku forastero karqaku.

⁵ Yachanitaqmi Israelpa mirayninkunaqa sonqonkumanta llakikusqankuta. Paykunatam Egipto runakuna servichikuchkanku ichaqa contratoytaqa manam qonqanichu.

⁶ Chayraykum Israelpa mirayninkunata ninki: “Ñoqam kani Tayta Dios chaymi ñoqa horqosqaykichik Egipto nacionpi sasa llamkaykunamanta, librasqaykichiktaqmi servipakuq kasqaykichikmantapas. Atiyniywanmi salvasqaykichik hatun castigokunawan.

⁷ Runaykunaña kaptikichikmi ñoqañataq Diosnikichik kasaq. Qamkunam yachankichik Egipto nacionpi sasa llamkaykunamanta horqoq yupaychasqaykichik Tayta Dios kasqayta.

⁸ Abrahanman, Isaacman hinaspa Jacobman qonaypaq jurasqay allpamanmi yaykuchisqaykichik. Chay allpatam qosqaykichik dueñoña kanaykichikpaq. Ñoqa Tayta Diosmi chaynata nini.”

⁹ Chaymantam Moises rimapayarqa Israelpa mirayninkunata. Aswanqa paykunam Moisesta mana kasurqakuchu sasallaña servipakuypi kaspa mana pacienciayoq kasqankurayku.

¹⁰ Chaymi Moisesta Tayta Dios nirqa:

¹¹ —Yaykuspayá Egipto nacionpi Rey Faraonta rimapayay Israelpa mirayninkunata kay allpamanta kachaykunanpaq —nispa.

¹² Chaymi Moisesñataq Tayta Diosta nirqa: —Israelpa mirayninkunaqa manam kasuwanchu. Chaynaqa Faraonqa ¿imaynamá kasuwanqa kay mana rimakuy atiqtaqa —nispa.

¹³ Hinaptinmi Tayta Dios rimapayarqa Aarontawan Moisesta. Kamachirqataqmi Israelpa mirayninkunatapas hinaspa Rey Faraontapas Egipto nacionmanta Israelpa mirayninkunata horqonanpaq.

Aaronpa hinaspa Moisespa ñawpa abuelonkunamanta

¹⁴ Ñawpa abuelonkupa familianman hina jefekunam kaykuna: Israelpa piwi churin Rubenpa churinkunam karqa Hanoc, Falu, Hezron hinaspa Carmi. Paykunamá karqa Rubenpa ayllunkuna.

¹⁵ Simeonpa churinkunam karqa Jemuel, Jamin, Ohad, Jaquin, Zohar hinaspa Canaan warmipa wawan Saul. Paykunamá karqa Simeonpa ayllunkuna.

¹⁶ Leviypa churinkunañataqmi mirayninkuman hina karqa Gerson, Coat hinaspa Merari. Leviymi kawsakurqa pachak kimsa chunkan qanchisniyoq watata.

¹⁷ Gersonpa churinkunam ayllunkunaman hina karqa Libni hinaspa Simei.

¹⁸ Coatpa churinkunam karqa Amram, Izhar, Hebron hinaspa Uziel. Chay Coatmi kawsakurqa pachak kimsa chunkan kimsayoq watata.

¹⁹ Meraripa churinkunam karqa Mahliwan Musi. Paykunamá Leviypa ayllunkuna karqa mirayninkuman hina.

²⁰ Amranmi casarakurqa tian Jocabedwan chaymi pay wachakururqa Aarontawan Moisesta. Amranmi kawsakurqa pachak kimsa chunkan qanchisniyoq watata.

²¹ Izharpa churinkunam karqa Corey, Nefeg hinaspa Zicri.

²² Uzielpa churinkunam karqa Misael, Elzafan hinaspa Sitri.

²³ Aaronmi casarakurqa Aminadabpa churin otaq Naasonpa panin Elizabetwan. Elizabetmi wachakurqa Nadabta, Abiuta, Eleazarta hinaspa Itamarta.

²⁴ Coreypa churinkunam karqa Asir, Elcana hinaspa Abiasaf. Paykunam Corey castapa ayllunkuna karqa.

²⁵ Aaronpa churin Eleazarpas, Futielpa huknin warmi churinwanmi casarakurqa chaymi wachakurqa Fineesta. Paykunam jefekuna karqaku taytanku Leviy casta ayllukunaman hina.

²⁶ Kay Aarontawan Moisestam Tayta Dios kamachirqa Egipto nacionmanta Israelpa mirayninkunata tropa-tropata horqomunankupaq.

²⁷ Moiseswan Aaronmi kikinkupuni Rey Faraonta rimapayarqaku Egipto nacionmanta Israelpa mirayninkunata kacharinanpaq.

Moisestawan Aaronta Dios qayasqanmanta

²⁸ Egipto nacionpi chay punchaw Moisesta Tayta Dios rimapayaspanmi

²⁹ nirqa: —Ñoqam kani Tayta Dios. Ñoqapa tukuy nisqaykunatayá willay Egipto nacionpi Rey Faraonman.

³⁰ Aswanqa Moisesmi nirqa Tayta Diosta: —Ñoqaqa mana rimakuy atiq runam kani ¿imaynamá uyariwanqa Faraonqa? —nispa.