Éxodo 4 - Quechua Ayacucho Bible 1987

¹ Chaymi Moisesñataq Diosta nirqa: —Paykunaqa manachá creewanqachu nitaqchá kasuwanqachu. Paykunaqa niwanqachá: “Tayta Diosqa manam rikurisurqankichu” nispa.

² Chaymi Tayta Dios nirqa: —¿Imataq chay makikipi kachkan? —nispa. Hinaptinmi payñataq nirqa: —Tawnam —nispa.

³ Hinaptinmi Dios kamachirqa: —Pampaman wischuy —nispa. Moises pampaman wischuykuptinmi culebraman tikrakururqa chaymi Moises ayqekurqa.

⁴ Ichaqa Moisestam Tayta Dios nirqa: —Chupanmanta hapiruy —nispa. Moises hapiruptinmi makinpi kaqlla tawnayarurqa. Chaymi Tayta Dios nirqa:

⁵ —Kay señalraykum creenqaku abueloykichik Abrahampa, Isaacpa hinaspa Jacobpa yupaychasqan Tayta Dios qanman rikurisusqaykita.

⁶ Makikita hinay oqllaynikiman —nispa. Moises oqllayninman makinta hinaykuspa horqoykuptinmi makinqa riti hina yuraqllaña lepra onqoywan kachkasqa.

⁷ Hinaptinmi Tayta Dios nirqa: —Yapatawan makikita oqllaynikiman hinay —nispa. Chaymi makinta oqllayninman hinaykuspa horqoykuptin makinqa cuerpon hina sanoy-sanoyña kachkasqa.

⁸ Tayta Diosqa nirqataqmi: —Sichu punta kaq señalwan mana creespa mana kasukuspankuqa ichapas qepa kaq señalwanqa creenmanku.

⁹ Chay iskay señalkunata mana creeptinkuqa nitaq nisqaykitapas mana kasukuptinkuqa yakutam wisiykunki mayumanta hinaspam hichaykunki chaki allpaman hinaptinmi mayumanta wisisqayki yakuqa allpapi yawaryarunqa —nispa.

¹⁰ Chaymi Tayta Diosta Moises nirqa: —¡Ay Señorlláy! Ñawpaqpas-kunanpas ñoqaqa manam rimaysapa runachu kani, kay serviqnikiqa mana rimakuy atiqmi kani —nispan.

¹¹ Hinaptinmi Tayta Dios payta nirqa: —¿Pitaq runaman simita qorqa? ¿Pitaq unancharqa mana rimaqta, mana uyariqta? ¿Pitaq unancharqa qawakuqta hinaspa ñawsata? ¿Manachu ñoqa Tayta Dios?

¹² Chaynaqa kunanyá riy, ñoqam rimachiqniki kasaq, ñoqataqmi yachachisqayki imam rimanaykitapas —nispa.

¹³ Chaymi Moises nirqa: —¡Ay Señorllay! Pim kachanaykitayá kachayqa —nispa.

¹⁴ Tayta Diosñataqmi Moisespaq llumpayta piñakuspan nirqa: —Ñoqaqa reqsinim Leviy casta wawqeki Aaronta. Paymi rimanqa. Paymi taripamusuchkanki, qawaykususpaykim sonqonpi kusikunqa.

¹⁵ Qanmi rimapayanki payta, yachachinkitaqmi imam ninantapas, ñoqam yachachisqaykichik imam rimanaykichiktawan imam ruranaykichiktaqa.

¹⁶ Paymi rimapayanqa runakunaman qampa rantikipi, qampa rimanaykita hinam rimanqa, qamñataqmi kanki ñoqapa rantiypi.

¹⁷ Chay tawnata apaspam señalkunata ruranki.

Egipto nacionman Moisespa kutisqanmanta

¹⁸ Moisesmi suegron Jetropa wasinman kutiruspan nirqa: —Kunanmi kutisaq Egipto nacionpi kaq castaykunaman kawsasqankupas wañusqankupas yachamunaypaq —nispa. Hinaptinmi suegronñataq nirqa: —Riyá allinlla —nispa.

¹⁹ Madian lawpi Moises kachkaptinraqmi payta Tayta Dios nirqa: —Kutiy Egipto nacionman, llapallan wañuchiy munasuqnikikunaqa wañurunñam —nispa.

²⁰ Chaymi Moisesqa warmintawan churinkunata huk asnoman sillaykachispa kutikurqa Egipto nacionman. Moisesqa aparqataqmi Diospa tawnantapas.

²¹ Chaymantam Moisesta Tayta Dios nirqa: —Egipto nacionman kutispaykiqa amam qonqankichu chay rurachisqay llapallan milagrokuna Faraonpa qayllanpi rurayta. Ñoqañataqmi sonqonta rumiyarachisaq runaykunata mana kacharinanpaq.

²² Faraontam ninki: “Tayta Diosmi kaynata nin: ‘Israel casta runakunaqa piwi churiy hinam,

²³ ñam nirqaykiña serviwananpaq churiyta kacharinaykipaq aswanqa manam munarqankichu kachariyta. Chaynaqa ñoqam piwi churikita wañurachisaq’ nispa.”

²⁴ Ñanpi familiantin samana wasipi kachkaptinmi Tayta Dios tuta rikuriykurqa Moisesta wañurachinanpaq.

²⁵ Chaymi warmin Sefora ñawchi rumita hapiykuspan wawanpa qari kayninpa qarachanta kuchururqa hinaspam Moisespa chakinman tupaykachirqa: —Cheqaptapas qamqa kanki yawarwan chapukusqa qosaymi —nispa.

²⁶ Chaymi Dios mana wañurachirqachu. Chay señalraykum Sefora nirqa: “yawarwan chapukusqa qosaymi” nispa.

²⁷ Aarontapas Tayta Diosmi nirqa: —Chunniqta riy Moises taripaq —nispa. Chaymi pay rispan tupaykurqa Diospa orqonpi, payta rimakuykuspanmi muchaykurqa.

²⁸ Chaymi Aaronman Moises willarqa: —Tayta Diosmi kachamuwan kaykunata rimanaypaq, kamachiwantaqmi tukuy kay señalkuna ruranaypaqpas —nispa.

²⁹ Moiseswan Aaron rispankum Israelpa mirayninkunamanta llapallan ancianokunata huñururqaku.

³⁰ Chaymi Aaron paykunaman willarqa Tayta Diospa tukuy ima Moisesman nimusqanta, runakunapa rikusqantataqmi señalkunatapas rurarqa.

³¹ Chaymi paykunata runakuna creerqaku. Israelpa mirayninkunam Tayta Dios paykunata watukusqanta yachaykuspanku hinaspa ñakarisqankuta Dios qawaykusqanta uyariykuspanku kumuykuspa adorarqaku Diosta.