Éxodo 39 - Quechua Ayacucho Bible 1987

Sacerdotekunapaq pachakuna rurasqankumanta

¹ “Chuya” lugarpi servikunanpaqmi bordasqa pachakunata rurarqaku morado qaytumanta, grosella qaytumanta hinaspa guindo qaytumanta. Aaronpaqmi rurarqakutaq sapaqchasqa pachakunatapas, rurarqakuqa Moisesman Tayta Diospa kamachisqanpi hinam.

² Efodtapas rurarqakumá qorimanta, morado qaytumanta, grosella qaytumanta, guindo qaytumanta hinaspa lino kawpusqamanta.

³ Qorita llaspayachispam kuchurqaku qaytu formaman, chaytam morado qaytuwan, grosella qaytuwan, guindo qaytuwan hinaspa llañu lino qaytuwan kuruyoqta awarqaku.

⁴ Iskaynin hombronkunapim karqa tirantenkuna efodta huñunaspa hapinanpaq.

⁵ Efodpa hawanpi kaq watakupas huk piezallam karqa qorimanta, morado qaytumanta, grosella qaytumanta, guindo qaytumanta hinaspa lino kawpusqamanta, chayqa karqa Moisesman Tayta Diospa kamachisqanman hinam.

⁶ Onice alhaja rumikunapim qellqarqa Israelpa churinkunapa sutinkunata imaynam sellopi churachkaq hina, chaymantam chay alhaja rumikunata churarqa qorimanta hapichinaman.

⁷ Chay iskay alhaja rumikunatam churarqaku efodpa hombronpa hawanpi, chaytaqa churarqaku Israelpa mirayninkunata Tayta Dios mana qonqarunanpaqmi, Moisesman Tayta Diospa kamachisqanpi hinamá rurarqaku.

⁸ Efod rurasqankuta hinataqmi pecheratapas rurarqaku. Chayqa karqa qorimanta, morado qaytumanta, grosella qaytumanta, guindo qaytumanta hinaspa lino kawpusqamantam.

⁹ Chay pecheraqa karqa cuadradom chawpinmanta doblasqa, tawa waqtankunam karqa cuarto metrokama.

¹⁰ Chay pecherapa hawanmanmi churarqaku tawa seqe alhaja rumikunata. Huknin seqepim karqa sardio, topacio hinaspa carbunclo alhaja rumikuna.

¹¹ Iskay kaq seqepiñataqmi karqa esmeralda, zafiro hinaspa diamante alhaja rumikuna.

¹² Kimsa kaq seqepiñataqmi karqa jacinto, agata hinaspa amatista alhaja rumikuna,

¹³ Tawa kaq seqepiñataqmi karqa berilo, onice hinaspa jaspe alhaja rumikuna. Tukuy chay alhaja rumikunam sapakama qoriwan hapichisqa karqa.

¹⁴ Chaynaqa Israelpa chunka iskayniyoq churinkunapa sutinman hinam alhaja rumikunapas karqa chunka iskayniyoqtaq. Sellopi hinam sapakamapa sutin huk rumipi qellqasqa karqa chunka iskayniyoq ayllukunaman hina.

¹⁵ Rurarqakutaqmi pecherapi qori puromanta simpasqa cadenakunatapas cordon hina rurasqata.

¹⁶ Rurarqakutaqmi qorimanta iskay anillokunatapas, chay anillokunatam churarqaku pecherapa iskaynin patankunaman.

¹⁷ Hinaspam pecherapa puntankunapi kaq iskay anillokunapi churarqaku qorimanta iskay cordonkunata.

¹⁸ Iskaynin qori cordonkunapa puntankunatañataqmi churarqaku onice alhaja rumipa iskaynin hapichiqninkunaman otaq efodpa tirantenkunapa ñawpaqnin lawman.

¹⁹ Qorimanta iskay anillokunatawanmi rurarqaku, chaykunatam pecherapa iskaynin puntankunaman churarqaku otaq efodwan tupanakuq ukun law patanpi.

²⁰ Rurarqakutaqmá qorimanta anillokunatapas, chaykunatam churarqaku efodpa iskaynin tirantekunapa ñawpaqninpi otaq uran kaq costurapa hichpan efodpa watakunpa tumpa hawachanpi

²¹ hinaspam morado qaytumanta cordonwan pecherapa anillonkunamanta hapichirqaku efodpa anillonkunaman chaynapi pecheraqa efodpa watakunpa hawanpi kananpaq hinaspa efodmanta mana rakikunanpaq, chaynataqa rurarqaku Moisesman Tayta Dios kamachisqanpi hinam.

²² Efodpa ukunpi kaq sotanatapas rurarqakumá, chayqa karqa enteronmi morado qaytumanta.

²³ Sotanapa chawpinpim karqa uma ustuchikunanpaq huk uchku, chaypa muyuriqninmi mana llikikunanpaq ribetesqa karqa ponchopa uchkun hina.

²⁴ Hinaspam chay sotanapa uraylaw muyuriq patanpi kananpaq granadapa rurunta hina adornokunata rurarqaku. Chaykunam karqa morado qaytumanta, grosella qaytumanta, guindo qaytumanta hinaspa lino kawpusqamanta.

²⁵ Rurarqataqmi qori-puromanta campanillachakunatapas, chay campanillachakunatam sotanapa patanpa muyuriqninpi churarqaku granada paychawan chawpichasqata.

²⁶ Servicio ruranapaq sotanapa patan muyuriqninpim churarqaku huk campanillachata, chaypa waqtanmanñataqmi churarqaku granadaman rikchakuq paychata, chayna pawa-pawam karqa lliw muyuriqninpi imaynam Moisesman Tayta Diospa kamachisqanpi hina.

²⁷ Aaronpaqwan churinkunapaqmi awarqaku llañu lino qaytumanta camisonkunata.

²⁸ Lino kawpusqamantam rurarqaku uma wankinata, uma watakunata hinaspa calzoncillokunata.

²⁹ Moisesman Tayta Diospa kamachisqanpi hinam sumaq kuruyoq chumpitapas rurarqaku lino kawpusqamanta, morado qaytumanta, grosella qaytumanta hinaspa guindo qaytumanta.

³⁰ Rurarqataqmi sacerdoteta sapaqchananpaq qori puromanta huk letrerotapas. Chay letreropim sellopi hina qellqarqa “TAYTA DIOSPAQ SAPAQCHASQA” niqta.

³¹ Moisesman Tayta Diospa kamachisqanpi hinam, uman wankinapa hawanpi morado qaytumanta huk cordonta churarqaku chaywan letrerota watanankupaq.

Karpa ruray tukusqankumanta

³² Chaynamá Diosman asuykuna karpa ruray tukusqa karqa. Moisesman Tayta Diospa tukuy kamachisqanpi hinam Israelpa mirayninkuna lliwta rurarqaku.

³³ Moisesman apamuspankum entregarqaku Diospa *f**yachanan otaq Diosman asuykuna karpata, entregarqakutaqmi kay llapallan servicionkunatapas: corchetenkunata, marconkunata, qerunkunata, pilarninkunata hinaspa toqosqa tiyanankunata.

³⁴ Apamurqakutaqmi karpata qatanapaq carneropa pukaman teñisqa qalasnintapas, fino qalaskunatapas hinaspa cuarto rakinaq telatapas,

³⁵ Chunkantin Kamachikuy waqaychana baultapas, varillankunatapas, huchakuna pampachana baulpa tapantapas,

³⁶ mesatawan llapallan servicionkunatapas, Diospa tantantapas,

³⁷ qori-puromanta candelerotapas, mecheronkunatapas otaq seqella kananpaq mecherokunatapas chaynataq llapallan servicionkunatawan achkipaq aceitetapas.

³⁸ Apamurqakutaqmi qorimanta altartapas, untanapaq aceitetapas, especeriamanta inciensotapas, karpapa punkunpaq telatapas,

³⁹ broncemanta altartapas, broncemanta rejillasnintapas, qerunkunatapas, llapallan servicionkunatapas, lavatoriotapas chaynataq chaypa tiyanantapas.

⁴⁰ Apamurqakutaqmi patiopaq cortinakunatapas, pilarkunatapas, toqosqa tiyanakunatapas, patiopa punkunpaq cortinatapas, waskakunatapas, estacakunatapas, apamurqakumá Diosman asuykuna karpapi servichikunapaq llapallan serviciokunatapas.

⁴¹ Apamurqakutaqmi “Chuya” sutiyoq lugarpi servichikuna bordasqa pachakunatapas. Chaykunaqa karqa Dios servinanpaq sacerdote Aaronpa pachankunawan churinkunapa pachankunam.

⁴² Moisesman Tayta Diospa tukuy kamachisqanpi hinamá Israelpa mirayninkunaqa llapallanta rurarqaku.

⁴³ Tayta Diospa kamachisqanman hina tukuy rurasqankuta Moises qawaykuspanmi paykunapaq mañakurqa Tayta Diospa bendicionninta.