Éxodo 38 - Quechua Ayacucho Bible 1987

Bronce altar rurasqankumanta

¹ Bezaleelqa rurarqataqmi acacia sutiyoq tablamanta lliw ofrenda kañana cuadrado altartapas, tawan lawpa medidanmi karqa iskay metro cuartonkama, sayayninñataqmi karqa huk metro cuarton.

² Rurarqataqmi altarpa tawan esquinanpi waqrachakunatapas. Chaykunaqa karqa altarpa piezallanmantam. Chay altartam qaracharqa broncewan.

³ Rurarqataqmi uchpa hoqarina mankakunatapas, palankunatapas, tazonninkunatapas, trinchenkunatapas chaynataq ninapaq kallanankunatapas. Chay serviciokunaqa lliwmi broncemanta karqa.

⁴ Mallankunatapas broncemantam rurarqa altarpa patanpa chawpi ukunpi churasqa kananpaq.

⁵ Rejillaspa puntankunapi varillakunata ustuchinanpaqmi broncemanta fundirqa tawa anillokunata.

⁶ Altarpaqpas acacia kaspimantam rurarqa raku varillakunata, chaykunatam qaracharqa broncewan.

⁷ Chay varillakunatam pasachirqa altarpa waqtanpi kaq anillokunapa ukunta chaykunawan altarta hombronapaq, altarpa ukunqa karqa vaciom, waqtankunañataqmi karqa tablamanta.

Bronce lavatorio rurasqanmanta

⁸ Diosman asuykuna karpapa punkunpi huñunakuq warmikunapa bronce espejonkunamantam Bezaleel rurarqa broncemanta lavatoriota, hina chay broncellamantam karqa tiyananpas.

Santuariopa muyuriqnin pationmanta

⁹ Bezaleelqa rurarqataqmi karpapa pationtapas, *f**alleq lawnin patiopa cortinankunaqa karqa lino kawpusqamantam, medidanñataqmi karqa tawa chunka pichqayoq metron.

¹⁰ Iskay chunka pilarkunapiwan iskay chunka toqosqa tiyanankunaqa broncemantam karqa, pilarkunapa ganchonkunawan varillakunañataqmi karqa qollqemanta.

¹¹ *f**Ichoq lawnin patiopa cortinankunapa largonñataqmi karqa tawa chunka pichqayoq metron. Iskay chunka pilarninkunapiwan iskay chunka toqosqa tiyanankunapas karqa broncemantam. Pilarkunapa ganchonkunawan varillankunañataqmi karqa qollqemanta.

¹² Karpapa qepan law otaq intipa seqaykunan law pationñataqmi karqa iskay chunka iskayniyoq metro parten anchoyoq. Chay medidallam karqa cortinankunapas. Pilarninkunañataqmi karqa chunka, toqosqa tiyanankunapas karqa chunkataqmi, qollqemantataqmi karqa pilarkunapa ganchonkunawan varillankunapas.

¹³ Punku law otaq intipa qespimunan law patiopa cortinanñataqmi karqa iskay chunka iskayniyoq metro parten.

¹⁴ Punkupa huknin waqtanpi kaq cortinakunaqa karqa yaqa qanchis metrom, kimsam karqa pilarninkuna, hina kimsataq toqosqa tiyanankunapas.

¹⁵ Punkupa huklawnin cortinankunapas karqa qanchis metrom, kimsam karqa pilarninkuna, hina kimsataq toqosqa tiyanankunapas.

¹⁶ Patiopa muyuriqninpi llapallan cortinakunam karqa lino kawpusqamanta.

¹⁷ Pilarkunapa toqosqa tiyanankunapas karqa broncemantam, pilarkunapa ganchonkunawan varillankunañataqmi karqa qollqemanta, chay pilarkunapa puntanpas karqa qollqewan qarachasqam, qollqemantataqmi karqa patiopa llapallan pilarninkunapas hinaspa varillakunapas.

¹⁸ Patiopa punkunpi cortinam karqa morado qaytumanta, grosella qaytumanta, guindo qaytumanta hinaspa lino kawpusqamanta suma-sumaq bordasqa, chay cortinapas karqa isqon metro largoyoqmi, sayayninñataqmi karqa iskay metro parten, chay sayayninqa karqa patiopa cortenankunapa medidan hinam.

¹⁹ Chay cortinapa tawa pilarninkunawan tawa toqosqa tiyanankunam karqa broncemanta, ganchonkunawan varillankunañataqmi karqa qollqemanta, qollqewan qarachasqataqmi karqa pilarkunapa puntanpas.

²⁰ Diospa *f**yachanan karpapa lliw estacankunapas hinaspa patiopa muyuriqninpi estacankunapas karqa broncemantam.

Santuario ruranankupaq metalkunamanta

²¹ Moises kamachikuptinmi sacerdote Aaronpa churin Itamar dirigirqa Leviypa mirayninkunata. Payqa dirigirqa Diospa *f**yachanan karpa ruraypi otaq Chunkantin Kamachikuypa kasqan karpa ruraypi imakunam yaykusqan cuenta apanankupaqmi.

²² Moisesman Tayta Diospa lliw kamachisqanman hinam rurarqa Bezaleel, payqa karqa Uripa churinmi otaq Juda ayllumanta Hurpa willkanmi.

²³ Bezaleeltataqmi yanaparqa Aholiab, paymi karqa Dan ayllumanta Ahisamacpa churin. Aholiabmi karqa rumikunapi letrakuna ruraq, dibujo ruraq, morado qaytuwan, grosella qaytuwan, guindo qaytuwan hinaspa llañu lino qaytuwan bordadokuna ruraq.

²⁴ “Chuya” lugarta rurananpaqmi lliw ofrenda qori karqa isqon pachak soqta chunkan pichqayoq kilo cuarton. Chayqa karqa santuariopi pesoman hinam.

²⁵ Chay huñunasqa runakunata yupaspa qollqe huñusqankum karqa kimsa waranqa kimsa pachaknin chunka isqonniyoq kilo parten maschan. Chayqa karqa santuariopi pesoman hinam.

²⁶ Iskay chunka watayoqmanta hanaymanmi runakuna yupasqa karqaku soqta pachak kimsa waranqa pichqa pachak pichqa chunkan. Paykunam sapakama qorqaku pichqa gramo parten qollqeta. Chayqa karqa santuariopi pesoman hinam.

²⁷ Karqataqmi kimsa waranqa kimsa pachaknin kilo qollqepas. Chay qollqemantam fundirqaku santuariopaq toqosqa tiyanakunata, fundirqakutaqmi cuarto rakinaq tela warkuna pilarkunapaq toqosqa tiyanakunatapas. Chay qollqemantam rurarqaku pachak toqosqa tiyanakunata. Sapa toqo tiyanapa llasayninmi karqa kimsa chunka kimsayoq kilo qollqe.

²⁸ Wakin chunka isqonniyoq kilo parten maschan qollqewanñataqmi Bezaleel rurarqa pilarkunapa ganchonkunatawan varillankunata, chaywantaqmi qaracharqa pilarkunapa puntankunatapas.

²⁹ Bronce ofrendañataqmi karqa iskay waranqa kimsa pachaknin kimsa chunkan soqtayoq kilo tumpa maschan.

³⁰ Chay broncemantam rurarqa Diosman asuykuna karpapa punkunpa toqosqa tiyanankunatapas, altartapas, rejillastapas hinaspa altarpa llapallan servicionkunatapas.

³¹ Hina chay broncemantamá rurarqa patiopa muyuriqninpi toqosqa tiyanakunatapas, Diospa *f**yachanan karpapi llapallan estacakunatapas hinaspa patiopa muyuriqninpi llapallan estacakunatapas.