Éxodo 37 - Quechua Ayacucho Bible 1987

Tayta Diospa baulnin rurasqankumanta

¹ Bezaleelmi rurarqa acacia sutiyoq tablamanta huk baulta, largonmi karqa huk metro tumpa maschan. Anchonñataqmi karqa parte metro masnin, sayayninpas karqa parte metro masninmi.

² Hawantawan ukuntam qaracharqa qori-purowan hinaspam muyuriqninpipas qorimanta moldurata rurarqa.

³ Fundispam rurarqa qorimanta tawa anillokunata, chaykunatam churarqa tawantin esquinapa waqtanman, iskaynin anillotam churarqa huklawninman, chayna iskaytataqmi churarqa huklawninmanpas.

⁴ Rurarqataqmi acacia kaspimanta varillakunatapas, chaykunatam qaracharqa qoriwan.

⁵ Hinaspam chay varillakunata baulpa waqtanpi anillokunaman hinarqa chaykunawan baulta hombronankupaq.

⁶ Chay baulpaqmi rurarqataq qori-puromanta huk tapatapas chaypa hawanpi huchakuna pampachasqa kananpaq. Chay tapapa largonmi karqa huk metro tumpa maschan, anchonñataqmi karqa parte metro masnin.

⁷ Hinaspam chay tapapa iskay lawnin cantonpi rurarqa qorimanta martillasqa querubin sutiyoq iskay angelkunata.

⁸ Chay tapawan iskay angelqa huk piezallamanta rurasqam karqa, huknin angelmi karqa kaylaw cantonpi hukninñataq waklaw cantonpi.

⁹ Angelkunapa raprankunam kicharisqa karqa llantuchkaq hina tapapa hawanman, uyankunañataqmi qawanakurqa, kumuykanakuykuq hinam tapata qawarqaku.

Diospa tantanpaq mesamanta

¹⁰ Bezaleelqa rurarqataqmi acacia sutiyoq tablamanta huk mesatapas, largonmi karqa huk metro, anchonñataqmi karqa yaqa parte metron, sayayninñataqmi karqa parte metro masnin.

¹¹ Chay mesatam qori-purowan qoracharqa, muyuriqninpiñataqmi rurarqataq qorimanta huk moldurata.

¹² Rurarqataqmi mesapa muyuriqninpi media cuarta maschan huk adornotapas, chay adornopa muyuriqninpiñataqmi qorimanta moldurata rurarqa.

¹³ Rurarqataqmi qorimanta tawa anillokunatapas, chaykunatam churarqa mesapa chakinpa waqtankunapi.

¹⁴ Anillokunaqa karqa adornopa uraychanpim varillakunata ustuchispa mesata apanankupaq.

¹⁵ Acacia sutiyoq kaspimanta varillakunata ruraspam qoriwan qaracharqa, chaywanmi mesata aparqaku.

¹⁶ Mesapa hawanpi kananpaqpas rurarqataqmi servicionkunata, platonkunata, wisllankunata, aysakunkunata hinaspa vino ofrenda tallinapaq tazonninkunatapas. Lliw chaykunam karqa qori-puromanta.

Qori candelero rurasqanmanta

¹⁷ Bezaleelqa rurarqataqmi qori-puromanta martillasqa huk candelerotapas, huk piezallamanta rurasqam karqa tiyananpas, sayaq tronconpas, copankunapas hinaspa umpawan waytankunapas.

¹⁸ Chay candeleropa waqtankunamantam soqta kallmakuna lloqsirqa, kimsa kallmam lloqsirqa huknin waqtanmanta, chayna kimsataqmi lloqsirqa huknin waqtanmantapas.

¹⁹ Chay candeleropa tronconmanta lloqsiq soqta sapa kallmakunapim karqa kimsa copakuna, chay copakunapa formanñataqmi karqa almendras wayta hina, sapakamam karqa umpayoq hinaspa waytayoq.

²⁰ Candeleropa tronconpipas karqa tawa copakunam, chay copakunapa formanqa karqa almendras wayta hinam, chaykunaqa karqa umpayoqkamam hinaspa waytayoqkamam.

²¹ Candeleropim karqa kimsa pares kallmakuna. Chay kallmakunapa qallariyninpim karqa sapakamapaq huk umpa, chay umpakunam hapirqa chay soqtantin kallmakunata.

²² Umpakunawan kallmakunapas hina chay piezallamantam karqa qori-puromanta martillasqa.

²³ Rurarqataqmi qanchis mecherokunatapas, mecha limpianakunatapas chaynataq mecha limpianapaq platochankunatapas, chaykunam karqa qori-puromanta.

²⁴ Candelerotawan servicionkunatam rurarqa kimsa chunka kimsayoq kilo qori-puromanta.

Incienso kañanapaq altarmanta

²⁵ Bezaleelqa rurarqataqmi incienso kañanapaq altartapas, chayqa karqa acacia sutiyoq tablamantam. Chay altarqa cuadradom karqa, tawan lawninpa medidanmi karqa yaqa parte metrokama, sayayninñataqmi karqa yaqa huk metro. Huk piezallamantam karqa altarwan tawan esquinanpi waqrachankunapas.

²⁶ Qori-purowanmi qaracharqa hawantapas, muyuriqnin waqtankunatapas hinaspa waqrachankunatapas, alton muyuriqninpiñataqmi rurarqa qorimanta moldurata.

²⁷ Qorimanta tawa anillokunata ruraspanmi, chay moldurapa urayninpi churarqa kaylawninpi iskayta, waklawninpiñataq iskaytataq chaynapi varillakunata anillokunaman ustuchispa altarta hombronapaq.

²⁸ Acacia sutiyoq kaspimanta chay varillakunata ruraspam qaracharqa qoriwan.

Untana aceitetawan incienso preparasqankumanta

²⁹ Bezaleelqa rurarqataqmi Diospaq sapaqchasqa untana aceitetapas chaynataq especeria puromanta inciensotapas, chaykunataqa rurarqa perfumekuna ruraqpa rurasqanta hinam.